តើហាងឆេងមាស ប្រាក់ដុល្លារ រូបិយប័ណ្ណធំៗ និងទីផ្សារភាគហ៊ុនក្នុងពិភពលោកមានការប្រែប្រួលបែបណា ក្រោយធនាគារកណ្ដាលអាម៉េរិក បញ្ចុះអត្រាការប្រាក់?

ប្រាក់ដុល្លារអាម៉េរិក បានធ្លាក់ថ្លៃភ្លាមៗ ក្រោយធនាគារកណ្តាលអាម៉េរិក បានបញ្ចុះអត្រាការប្រាក់០,៥០% កាលពីថ្ងៃពុធ ទី១៨ ខែកញ្ញា ហើយការបញ្ចុះអត្រាការប្រាក់នេះឆ្លុះបញ្ចាំងពីទំនុកចិត្តកាន់តែខ្លាំងឡើងថា អតិផរណានឹងបន្តធ្លាក់ចុះដល់កម្រិតគោលដៅប្រចាំឆ្នាំ២% របស់ធនាគារកណ្ដាលអាម៉េរិក​។ នេះបើយោងតាមការចុះផ្សាយរបស់ទីភ្នាក់ងារព័ត៌មានធំៗជាច្រើន។

សន្ទស្សន៍តម្លៃប្រាក់ដុល្លារអាម៉េរិក បានធ្លាក់ចុះ០,៤៦% ដែលជាកម្រិតទាបបំផុតមិនធ្លាប់មានចាប់តាំងពីខែកក្កដា ឆ្នាំ២០២៣ មក។ ទន្ទឹមនេះប្រាក់អឺរ៉ូ បានហក់ឡើងថ្លៃឈានដល់ជិត១,១២ដុល្លារអាម៉េរិកក្នុង១អឺរ៉ូ ហើយប្រាក់ដុល្លារអាម៉េរិក ក៏បានធ្លាក់ថ្លៃ០,៨៦% ផងដែរ ធៀបនឹងប្រាក់យ៉េន ជប៉ុន ដោយក្នុង១ដុល្លារអាម៉េរិក ប្ដូរបានប្រមាណ១៤៣យ៉េន។

ងាកមកផ្សារភាគហ៊ុនវិញឃើញថា ភាគហ៊ុននៅអាស៊ី រួមទាំងប្រទេសចិន ហុងកុង ឥណ្ឌូនេស៊ី និងសិង្ហបុរីផង ក៏ដូចជានៅសហរដ្ឋអាម៉េរិក អូស្ត្រាលី និងប្រទេសជប៉ុន សុទ្ធតែបានហក់ឡើង បន្ទាប់ពីធនាគារកណ្តាលអាម៉េរិក បានបញ្ចុះអត្រាការប្រាក់០,៥០% និងផ្ដល់សញ្ញាថា ខ្លួនអាចនឹងបញ្ចុះអត្រាការប្រាក់បន្ថែមទៀតនៅប៉ុន្មានខែខាងមុខ។ នេះបើយោងតាមការចុះផ្សាយរបស់សារព័ត៌មាន The Economic Times។

ហើយអ្វីដែលជាគួរឱ្យកត់សម្គាល់នោះ គឺផ្សារភាគហ៊ុនជប៉ុន បានហក់ឡើងខ្ពស់រហូតដល់ទៅ២,៨% បន្ទាប់ពីធនាគារកណ្ដាលអាម៉េរិក បញ្ចុះអត្រាការប្រាក់។ នេះយោងតាមការចុះផ្សាយរបស់សារព័ត៌មានជប៉ុន នីកេ អេស៊ា។

ក្រឡេកមកមើលទីផ្សារមាសឯណេះវិញឃើញថា ហាងឆេងមាសនៅលើទីផ្សារអន្តរជាតិ បានហក់ឡើងរហូតដល់ទៅ១,២% ឈានដល់២.៦០០ដុល្លារអាម៉េរិក ក្នុង១អោន ឬ ៣.១៧០ដុល្លារអាម៉េរិកក្នុង១តម្លឹង នៅថ្ងៃទី១៩ ខែកញ្ញា ឆ្នាំ២០២៤។ នេះបើយោងតាមការចុះផ្សាយរបស់សារព័ត៌មានអន្តរជាតិ ដ៏ល្បីល្បាញ Bloomberg៕

ដោយ: តែម សុខុម