សម្ដេច ហ៊ុន ម៉ាណែត ផ្ញើសាររំលែកទុក្ខជាមួយរដ្ឋាភិបាលជប៉ុន ដែលរងគ្រោះដោយសាររញ្ជួយដី

នៅក្នុងសាររំលែកទុក្ខនោះ សម្ដេចធិបតី បានបង្ហាញអារម្មណ៍សោកស្ដាយជាពន់ពេកចំពោះការខូចខាតទ្រព្យសម្បត្តិរដ្ឋ និងឯកជន និងការបាត់បង់អាយុជីវិតរបស់ពលរដ្ឋ ដែលបណ្តាលមកពីគ្រោះធម្មជាតិដ៏មហាប្រល័យមួយនេះ។

ទន្ទឹមគ្នានេះ ក្នុងនាមរាជរដ្ឋាភិបាល និងប្រជាជនកម្ពុជា សម្ដេចនាយករដ្ឋមន្រ្តី ហ៊ុន ម៉ាណែត ក៏បានចូលរួមរំលែកទុក្ខ និងអាណិតអាសូរយ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ជាពិសេសអ្នកដែលរងគ្រោះដោយគ្រោះមហន្តរាយនេះ និងបានជូនពរឱ្យអ្នករបួសឆាប់ជាសះស្បើយ ហើយរំពឹងថា ប្រទេសជប៉ុននឹងអាចយកឈ្នះលើគ្រោះមហន្តរាយនេះបានយ៉ាងឆាប់រហ័សផងដែរ។

យោងតាមសារព័ត៌មានធំៗបានរាយការណ៍ថា គ្រោះរញ្ជួយដីកាលពីថ្ងៃចូលឆ្នាំសកលកន្លងទៅ បានវាយប្រហារចំតំបន់ភាគកណ្តាលប្រទេសជប៉ុន បណ្ដាលឱ្យមានអ្នកស្លាប់ប្រមាណ៩០នាក់ និងជាង២០០នាក់ទៀតបានបាត់ខ្លួន ខណៈហេដ្ឋារចនាសម្ព័ន្ធជាច្រើនបានរងការខូចខាតយ៉ាងដំណំ៕

អត្ថបទ៖ បូ ដូឡា