តើមានមូលហេតុអ្វីបានជាតម្លៃសត្វរស់ចុះថោក តែសាច់លក់នៅលើទីផ្សារនៅតែមានតម្លៃខ្ពស់?

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា កត់សម្គាល់ឃើញថា បច្ចុប្បន្នជ្រូករស់ត្រូវបានឈ្មួញចុះទិញក្នុងតម្លៃចន្លោះពីជាង៥ពាន់ទៅ៦ពាន់រៀលក្នុង១គីឡូក្រាម ប៉ុន្តែការដាក់លក់នៅលើទីផ្សារមានតម្លៃចាប់ពីជាង១ម៉ឺនរៀលទៅ២ម៉ឺនរៀលក្នុង១គីឡូក្រាម ដែលបញ្ហានេះពុំបានផ្ដល់ផលចំណេញដល់អ្នកទទួលទាននោះទេ។ លើសពីនេះបញ្ហានេះ ក៏បានជះឥទ្ធិពលអវិជ្ជមានដល់អ្នកចិញ្ចឹម និងមកលើវិស័យចិញ្ចឹមសត្វទាំងមូលនៅកម្ពជាផងដែរ។ បើតាមអ្នកជំនាញរូបនេះ កត្តាដែលធ្វើឱ្យតម្លៃជ្រូករស់ចុះថោក តែការលក់នៅលើទីផ្សារនៅតែមានតម្លៃថ្លៃ គឺអាចបណ្តាលមកពីការលក់របស់អាជីវករនៅលើទីផ្សារមានការធ្លាក់ចុះបរិមាណ ដែលជំរុញឱ្យពួកគេត្រូវលក់ក្នុងកម្រិតតម្លៃមួយខ្ពស់ដើម្បីរក្សាប្រាក់ចំណូល។ ម្យ៉ាងទៀតដោយសារផ្នែកខ្លះនៃជ្រូកដូចជាត្រចៀក អណ្ដាត គ្រឿងក្នុង និងឆ្អឹងជាដើមលក់បានក្នុងតម្លៃថោក ដោយសារការហូរចូលនៃគ្រឿងក្នុងបង្កក បានជំរុញឱ្យអាជីវករត្រូវពង្រឹងតម្លៃនៃការលក់សាច់ និងផ្នែកមួយចំនួនទៀត។

ទោះបីការលក់សាច់នៅលើទីផ្សារមានតម្លៃខ្ពស់មិនសមតុល្យជាមួយតម្លៃសាច់សត្វរស់ក៏ពិតមែន តែសម្រាប់លោក ស្រ៊ុន ពៅ ការលក់ក្នុងតម្លៃខ្ពស់នេះ គឺអាជីវករលក់បានតែអំឡុងពេលព្រឹកប៉ុណ្ណោះ លុះដល់អំឡុងម៉ោង១០តទៅ គឺអាជីវករអាចនឹងលក់ក្នុងតម្លៃប្រមាណ៨ពាន់រៀលប៉ុណ្ណោះក្នុង១គីឡូក្រាម។

ជុំវិញបញ្ហាតម្លៃសត្វរស់នៅកម្ពុជានេះដែរ កាលពីថ្ងៃទី៩ ខែមករា ឆ្នាំ២០២៤ អគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទបានដឹកនាំកិច្ចប្រជុំជាមួយក្រុមហ៊ុននាំចូលសាច់បង្កក អ្នករកស៊ីពាក់ព័ន្ធ និងសមាគមអ្នកចិញ្ចឹមសត្វនៅកម្ពុជា ដើម្បីពិភាក្សាគ្នាស្វែងរកដំណោះស្រាយលើបញ្ហាប្រឈមរបស់អ្នកចិញ្ចឹមសត្វក្នុងស្រុក ដែលកំពុងជួបបញ្ហាការធ្លាក់ចុះតម្លៃសត្វរស់។ ប្រធានសមាគមអ្នកចិញ្ចឹមសត្វនៅកម្ពុជា បានចាត់ទុកការជួបពិភាក្សាគ្នានេះ គឺជាការផ្តល់ក្តីសង្ឃឹមថ្មីមួយទៀតសម្រាប់កសិករចិញ្ចឹមសត្វនៅកម្ពុជា៕

អត្ថបទ៖ បូ ដូឡា