រដ្ឋាភិបាលម៉ាឡេស៊ី មានបំណងប្រែក្លាយទីក្រុងគូឡាឡាំពួ ទៅជាមជ្ឈមណ្ឌលឌីជីថលដ៏ធំមួយនៅក្នុងតំបន់ ដោយមានមហិច្ឆតាក្លាយជាប្រទេសមួយក្នុងចំណោមប្រទេសកំពូលទាំង២០ នៅក្នុងបញ្ជីប្រទេសក្នុងប្រព័ន្ធសន្ទស្សន៍ប្រព័ន្ធអេកូឡូស៊ីនៃអាជីវកម្មឌីជីថលសកល នាឆ្នាំ២០៣០ ខាងមុខ។
លោកនាយករដ្ឋមន្ត្រី អាន់វ៉ា អ៊ីប្រាហ៊ីម បាននិយាយថា សួនឧទ្យានអេឡិចត្រូនិករួម ដែលបានស្នើឡើង គឺជាផ្នែកមួយនៃកិច្ចខិតខំប្រឹងប្រែងរបស់ប្រទេសម៉ាឡេស៊ី ដើម្បីផ្លាស់ទីលើសពីការដំឡើងបន្ទះឈីប មកជាការដំឡើងផលិតផលបច្ចេកវិទ្យា និងការងាររចនាផលិតផលសម្រេចផ្សេងៗ។
បច្ចុប្បន្នម៉ាឡេស៊ី កំពុងតែពង្រឹង និងពង្រីកតួនាទីនៅក្នុងឧស្សាហកម្មដំឡើងបន្ទះឈីប ប៉ុន្តែមកដល់ពេលនេះមានតែផលិតផលប្រហែល១៣%ប៉ុណ្ណោះ ដែលត្រូវបានគេយកមកធ្វើការសាកល្បង និងដំឡើងទៅជាផលិតផលសម្រេចដើម្បីវេចខ្ចប់នាំចេញ។
លោកបានអះអាងថា នៅពេលនេះក្រុមហ៊ុនផលិតបន្ទះឈីបរបស់អង់គ្លេសមួយ ដែលមានឈ្មោះថា Arm Holdings កំពុងតែបង្ហាញចំណាប់អារម្មណ៍នឹងគម្រោងនេះ ប៉ុន្តែលោកមិនទាន់ផ្តល់ព័ត៌មានលម្អិតនៅឡើយទេ៕
ដោយៈ សរ សុជាតិ
