អង្គការ OPEC បានបន្ទាបការព្យាករពីកំណើនតម្រូវការប្រើប្រាស់ប្រេងនៅលើទីផ្សារពិភពលោកនៅឆ្នាំ២០២៤ នេះពី២,២៥លាន ធុងបារ៉ែលក្នុង១ថ្ងៃ ដែលខ្លួនបានព្យាករកាលពីខែមុនមកនៅត្រឹម២,១១លានធុងបារ៉ែល ក្នុង១ថ្ងៃវិញ។
ការព្យាករបន្ទាបកំណើនតម្រូវការប្រើប្រាស់ប្រេងនេះ ធ្វើឡើងក្រោយអង្គការ OPEC មើលឃើញទិន្នផលប្រើប្រាស់ប្រេងឥន្ធនៈ នៅក្នុងឆមាសទី១ ទាបជាងការរំពឹងទុក ស្របពេលមានការរំពឹងការធ្លាក់ចុះតម្រូវការប្រើប្រាស់ប្រេងនៅក្នុងប្រទេសចិន។
នេះគឺជាការកាត់បន្ថយលើកដំបូងសម្រាប់ការព្យាករក្នុងឆ្នាំ២០២៤ របស់អង្គការ OPEC ចាប់តាំងពីខែកក្កដា ឆ្នាំ២០២៣ ហើយការបន្ទាបការព្យាករកំណើនតម្រូវការប្រេងជាសកលនេះ អាចម្យ៉ាងដោយសារតម្រូវការប្រេងនៅប្រទេសចិន ធ្លាក់ចុះ ស្របពេលនិន្នាការរបស់ប្រទេសនានា លើពិភពលោកកំពុងផ្តោតការយកចិត្តទុកដាក់លើការប្រើប្រាស់ថាមពលស្អាត ឬថាមពលកកើតឡើងវិញជំនួសឱ្យការប្រើប្រាស់ប្រេងឥន្ធនៈ ដើម្បីកាត់បន្ថយការបំភាយឧស្ម័ន និងសារធាតុកាបូន។
ទន្ទឹមនឹងនេះ អង្គការបណ្ដាប្រទេសនាំចេញប្រេងនេះ ក៏មិនទាន់ហ៊ានព្យាករសម្រាប់កំណើនតម្រូវការប្រេងសម្រាប់ឆ្នាំក្រោយនោះដែរ៕
អត្ថបទ៖ សុខ មង្គល
