ជាក់ស្ដែង បើទោះបីជា មួយរយៈពេលថ្មីៗនេះ កម្ពុជាមានករណីឆ្លងអូមីក្រុងក្នុងសហគមន៍ក្ដី ប៉ុន្ដែ វាមិនបានចោទជាបញ្ហាធ្ងន់ធ្ងរដល់ចរន្ដទិញលក់អចលនទ្រព្យផ្ទៃក្នុងរបស់កម្ពុជានោះទេ។ អ្នកជំនាញថែមទាំងរំពឹងខ្ពស់ទៀតថា វិស័យអចលនទ្រព្យនៅកម្ពុជានឹងមានកំណើនល្អប្រសើរនៅឆ្នាំ២០២២ នេះ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម អះអាងថា ផលប៉ះពាល់ដោយសារការឆ្លងរាលដាលនៃមេរោគបំប្លែងខ្លួនថ្មីនេះ មកលើវិស័យអចលនទ្រព្យនៅមិនទាន់សញ្ញាធ្ងន់ធ្ងរគួរឲ្យកត់សម្គាល់នោះទេ។ លោកសង្កត់ធ្ងន់ថា វិស័យអចលនទ្រព្យអាចរងផលប៉ះពាល់ធ្ងន់ធ្ងរបាន លុះត្រាតែការឆ្លងរាលដាលនៃជំងឺកូវីដ-១៩ ប្រភេទអូមីក្រុងមានស្ថានភាពធ្ងន់ធ្ងររហូតធ្វើឲ្យមានការបិទខ្ទប់នៅតំបន់ណាមួយ។
អត្ថបទគួរអាន
ទោះបីយ៉ាងនេះក្តីសម្រាប់លោក ច្រឹក សុខនីម នៅឆ្នាំ២០២២នេះ ការរីកចម្រើននៃវិស័យអចលនទ្រព្យកម្ពុជាអាចមានសន្ទុះខ្លាំងក្នុងក្របខណ្ឌទិញលក់ក្នុងស្រុក ខណៈទីផ្សារក្រៅស្រុកអាចបន្តរីកចម្រើនយឺត ដោយសារប្រទេសមួយចំនួនក្នុងតំបន់អាស៊ាន ពិសេសចិននៅតែបន្តរឹតបន្តឹងការធ្វើដំណើរ ក្រោយកូវីដ-១៩ បន្តវាយលុកនៅតាមប្រទេសទាំងនោះ។
សូមបញ្ជាកថា នៅថ្ងៃទី២៤ មករា កម្ពុជាបានប្រកាសពីការរកឃើញអ្នកឆ្លងជំងឺកូវីដ-១៩ ប្រភេទអូមីក្រុងចំនួន ៤០នាក់ ក្នុងនោះរកឃើញឆ្លងក្នុងសហគមន៍ចំនួន ២៥នាក់ និងនាំចូល១៥នាក់។ ប៉ុន្តែអ្វីដែលគួរឲ្យកត់សម្គាល់ ទោះបីមេរោគអូមីក្រុងបានវាយលុកសហគមន៍ក៏ដោយ តែក្នុងរយៈពេលជាង១ខែ ដែលកម្ពុជារកឃើញមានអ្នកឆ្លងកូវីដ-១៩ អូមីក្រុង កម្ពុជាមិនទាន់មានអ្នកស្លាប់ដោយសារមេរោគថ្មីនេះនោះទេ។ អ្នកឆ្លងកូវីដ-១៩ សរុបនៅកម្ពុជាមកទល់ពេលនេះកើនដល់ជាង១២ម៉ឺននាក់ ខណៈអ្នកជាសះស្បើយមានជាង១១ម៉ឺននាក់ និងស្លាប់មានជាង៣ពាន់នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
