តើការជំរុញការផ្ដល់កម្ចីសិក្សាដល់សិស្ស និស្សិត បានរួមចំណែកសំខាន់យ៉ាងណាដល់ការអភិវឌ្ឍសេដ្ឋកិច្ច និងសង្គមនៅកម្ពុជា?

លោក កុក ថា អគ្គនាយកគ្រឹះស្ថាន អេហ្វអេចអេហ្វ ឃែភីថល បានឱ្យដឹងថា កម្មវិធីផ្តល់កម្ចី ឬឥណទានសម្រាប់សិស្ស និស្សិត ជាកម្មវិធីមួយដែលនឹងរួមចំណែកជួយសម្រាលដល់សិស្ស និស្សិត ដែលមានជីវភាពខ្សត់ខ្សោយអាចមានលទ្ធភាពបន្តការសិក្សារបស់ពួកគេ។ បើតាមថ្នាក់ដឹកនាំរូបនេះ គ្រឹះស្ថាននេះ មានផលិតផលសេវាហិរញ្ញវត្ថុទូទៅដូចបណ្ដាគ្រឹះស្ថានដទៃដែរ ប៉ុន្តែកម្មវិធីកម្ចីអប់រំ គឺផ្ដោតតែលើក្រុមគោលដៅសិស្ស និស្សិត និងសិក្ខាកាម ពោលគឺការផ្តល់កម្ចីធ្វើឡើងតែក្នុងរង្វង់វិស័យអប់រំប៉ុណ្ណោះ។ ទោះបីការផ្តល់កម្ចីនេះមិនទាមទារទ្រព្យតម្កល់ក៏ពិតមែន តែមុនផ្ដល់កម្ចីគ្រឹះស្ថាននឹងសិក្សាព័ត៌មានពីសិស្ស និស្សិត ឱ្យបានគ្រប់ជ្រុងជ្រោយ ដើម្បីចៀសវាងការប្រើប្រាស់ឥណទានខុសគោលដៅ ខណៈការផ្ដល់កម្ចីមានទំហំចន្លោះពី១លានរៀល ដល់៤លានរៀល។

​បើតាមលោក កុក ថា ការបង្កើតកម្មវិធីកម្ចី ឬឥណទានសម្រាប់សិស្ស និស្សិតនេះ គឺបន្ទាប់ពីគ្រឹះស្ថាន អេហ្វអេចអេហ្វ ឃែភីថល សិក្សាឃើញថា យុវជននៅកម្ពុជា មានសក្ដានុពលខ្ពស់ លើការស្រលាញ់ការសិក្សា គួបផ្សំពួកគេនឹងក្លាយជាធនធានមនុស្សដ៏សំខាន់ក្នុងការចូលរួមអភិវឌ្ឍន៍ប្រទេសជាតិ នាពេលអនាគត។

​ជាមួយគ្នានេះ អគ្គនាយកគ្រឹះស្ថាន អេហ្វអេចអេហ្វ ឃែភីថល ជឿជាក់ថា តាមរយៈឥណទានសម្រាប់សិស្ស និស្សិតនេះ វានឹងរួមចំណែកដល់ការកាត់បន្ថយអត្រាបោះបង់ចោលការសិក្សា និងអភិវឌ្ឍន៍ចំណេះដឹងរបស់យុវជន ដើម្បីឈានទៅសម្រេចបានជាប្រទេសដែលមានសេដ្ឋកិច្ចចំណូលខ្ពស់នៅឆ្នាំ២០៥០ ខាងមុខផងដែរ៕

អត្ថបទ៖ បូ ដូឡា​