ការបង្ហាញពីការគាំទ្រលើផែនការពង្រីកកងកម្លាំងប្រដាប់អាវុធកាន់តែច្រើនថែមទៀតរបស់លោកពូទីននេះ គឺធ្វើឡើងនៅចំពេលពេលជាមួយគ្នាដែល ប្រធានាធិបតីអ៊ុយក្រែនលោកហ្សេលេនស្គីបានធ្វើដំណើរជាលើកដំបូងទៅកាន់ទឹកដីសហរដ្ឋអាមេរិក តាំងពីមានសង្គ្រាមផ្ទុះឡើងមក ដើម្បីបង្ហាញពីការប្តេជ្ញាចិត្តរបស់អ៊ុយក្រែន និងស្វែងរកការគាំទ្របន្ថែមទៀតពីទីក្រុងវ៉ាស៊ិនតោន ក្នុងការប្រយុទ្ធទប់ទល់ជាមួយទីក្រុងម៉ូស្គូ។ នេះបើតាមការចុះផ្សាយដោយសារព័ត៌មាន រ៉យទ័រ។
នៅក្នុងសន្និសីទចុងឆ្នាំនៃមន្ត្រីយោធាកំពូលៗរបស់រុស្ស៊ី រដ្ឋមន្ត្រីការពារជាតិរុស្ស៊ី លោក Sergei Shoigu បានស្នើឱ្យមានការបង្កើនកម្លាំងប្រដាប់អាវុធពីផែនការ ១ លាន ១សែននាក់ ដល់ដល់ ១លាន៥ សែននាក់។ លោក Shoigu បានប្រាប់លោក Putin ក្នុងព្រឹត្តិការណ៍ដែលបានចាក់ផ្សាយនៅក្នុងកម្មវិធីទូរទស្សន៍រដ្ឋរុស្ស៊ីថា ការស្នើពង្រីកនេះគឺ «ដើម្បីធានាដោះស្រាយបញ្ហាទាក់ទងនឹងសន្តិសុខយោធារបស់រុស្ស៊ី»។ លោកបាននិយាយថា យុទ្ធជនចំនួនជិត ៧ សែននាក់គួរតែជាទាហានជាប់កិច្ចសន្យាដែលមានជំនាញវិជ្ជាជីវៈ ផ្ទុយពីទាហានដែលបម្រើការយោធាជាកាតព្វកិច្ច។
អត្ថបទគួរអាន
គួររំលឹកថា លោកពូទីនបានចុះហត្ថលេខាលើក្រឹត្យមួយនៅរដូវក្តៅនេះ ដោយបញ្ជាឱ្យបង្កើនចំនួនកងទ័ពពីចំនួនជាង ១៣ម៉ឺន ឲ្យបានដល់ជាង ១លាន ១សែននាក់ ហើយថែមទាំងបានបម្រុងទុក ៣០ ម៉ឺននាក់ទៀត ដើម្បីគាំទ្រការឈ្លានពានរបស់រុស្ស៊ីលើអ៊ុយក្រែន។
កាលពីពេលកន្លងទៅ សហរដ្ឋអាមេរិកនិងអ្នកវិភាគយោធាលោកខាងលិច ធ្លាប់បានឱ្យដឹងដែរថា ទាហានរុស្ស៊ីរាប់ម៉ឺននាក់បានស្លាប់ក្នុងរយៈពេល ១០ ខែមកនេះ ចាប់តាំងពីទីក្រុងមូស្គូបានឈ្លានពានអ៊ុយក្រែន។ ដោយឡែក បើតាមលោក Shoigu រដ្ឋមន្ត្រីការពារជាតិរុស្ស៊ីបានបញ្ជាក់តាមតួលេខផ្លូវការត្រូវបានចែករំលែកជាសាធារណៈនៅចុងក្រោយនេះ គឺគិតត្រឹមថ្ងៃទី២១ ខែកញ្ញា ថា មានទាហានរុស្ស៊ីក្បែរ ៦ ពាន់នាក់ប៉ុណ្ណោះ ត្រូវបានស្លាប់ក្នុងសមរភូមិអ៊ុយក្រែន។
បន្ថែមពីនេះ លោក សឺហ្កេ ក៏បានស្នើឱ្យបង្កើនចន្លោះអាយុសម្រាប់កាតព្វកិច្ចបម្រើយោធារុស្ស៊ីផងដែរ ដែលនឹងគ្របដណ្តប់លើពលរដ្ឋរុស្ស៊ីដែលមានអាយុពី ២១-៣០ ឆ្នាំ។ យ៉ាងណាមិញ នៅក្រោមប្រព័ន្ធបច្ចុប្បន្ន ជនជាតិរុស្ស៊ីដែលមានអាយុចន្លោះពី ១៨-២៧ ឆ្នាំអាចត្រូវបានហៅឱ្យចូលបម្រើយោធាជាកាតព្វកិច្ច៕
