បើតាមការអះអាងរបស់សម្តេចធិបតី គម្រោងវិនិយោគទាំងនេះភាគច្រើនកើតចេញពីជំនួបរវាងសម្តេចជាមួយក្រុមហ៊ុន សហគ្រាសនៅក្រៅប្រទេស។
នាពិធីបើកកិច្ចប្រជុំពេញអង្គគណៈរដ្ឋមន្ត្រីនៅព្រឹកថ្ងៃទី១៥ ខែមីនា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានបង្ហាញពីវឌ្ឍនភាពការងារ និងសមិទ្ធផលមួយចំនួន ដែលរាជរដ្ឋាភិបាលអាណត្តិទី៧ នៃរដ្ឋសភាសម្រេចបានទាំងលើឆាកជាតិ និងអន្តរជាតិនាពេលកន្លងមក។
សម្តេចធិបតីកត់សម្គាល់ឃើញថា តាំងពីរាជរដ្ឋាភិបាលអាណត្តិថ្មីត្រូវបានបង្កើតឡើងមានក្រុមហ៊ុនវិនិយោគបរទេសជាច្រើនបានចាប់អារម្មណ៍ចង់វិនិយោគនៅកម្ពុជា។ ជាក់ស្តែងនៅក្នុងរយៈពេល៦ខែចាប់ពីខែកញ្ញា ឆ្នាំ២០២៣ ដល់ខែកុម្ភៈ ឆ្នាំ២០២៤ ក្រុមប្រឹក្សាអភិវឌ្ឍន៍បានអនុម័តគម្រោងពង្រីកផលិតកម្ម និងគម្រោងវិនិយោគថ្មីចំនួន១៧៣គម្រោងជាមួយទុនវិនិយោគជាង៤ពាន់១រយលានដុល្លារអាមេរិក។
បើតាមសម្តេចធិបតី គម្រោងវិនិយោគទាំងនេះភាគច្រើនកើតចេញពីជំនួបរវាងសម្តេចជាមួយក្រុមហ៊ុន សហគ្រាសនៅក្រៅប្រទេសនាពេលកន្លងមក។
អត្ថបទគួរអាន
គម្រោងវិនិយោគទាំងនេះភាគច្រើនស្ថិតនៅក្នុងវិស័យកសិកម្ម កសិ-ឧស្សាហកម្ម ឧស្សាហកម្មទេសចរណ៍ និងហេដ្ឋារចនាសម្ព័ន្ធផ្សេងៗ ដោយគម្រោងទាំងនេះមានមកពីចិន សិង្ហបុរី សហរដ្ឋអាម៉េរិក កូរ៉េខាងត្បូង វៀតណាម ថៃ ស៊ុយអែត កាណាដា និងជប៉ុនជាដើម។
ការលើកឡើងបែបនេះរបស់សម្តេចធិបតី ហ៊ុន ម៉ាណែត ធ្វើឡើងដើម្បីជាការបកស្រាយចម្ងល់របស់បងប្អូនប្រជាពលរដ្ឋ ក៏ដូចជាដើម្បីឆ្លើយតបទៅនឹងការរិះគន់ចំអកឌឺដងរបស់បុគ្គលមួយចំនួន ដែលថា សម្តេចធិបតីចេញទៅជួបវិនិយោគិន(ទាក់ម៉ូយ)នៅប្រទេសជាច្រើន តែគ្មានសម្រេចបានលទ្ធផលអ្វីជាដុំកំភួន។ យ៉ាងណាក៏ដោយសម្តេចធិបតីទទួលស្គាល់ថា ស្ថានភាពសេដ្ឋកិច្ចរបស់កម្ពុជាមិនល្អឥតខ្ចោះក្នុងការទាក់ទាញក្រុមហ៊ុន ដែលសម្តេចបានជួបនៅក្រៅប្រទេសទាំងអស់ឱ្យមកបោះទុនវិនិយោគនៅកម្ពុជានោះទេ ហើយការជួបប្រាស្រ័យទាក់ទងជាមួយក្រុមហ៊ុន សហគ្រាសទាំងនោះ ក៏មិនប្រាកដថា ពួកគេទាំងនោះមកវិនិយោគនៅកម្ពុជានោះដែរ។
ទន្តឹមនឹងនេះសម្តេចធិបតីបានគូសបញ្ជាក់ថា សម្រាប់លក្ខខណ្ឌចុះបញ្ជីវិនិយោគនៅក្រុមប្រឹក្សាអភិវឌ្ឍន៍កម្ពុជា គឺកម្ពុជាទាមទារឱ្យក្រុមហ៊ុន សហគ្រាសទាំងនោះត្រូវមានឯកសារ និងទីតាំងវិនិយោគច្បាស់លាស់។ បើតាមសម្តេច បើពលរដ្ឋចង់ដឹងពីគម្រោងវិនិយោគត្រូវឆែកជាមួយក្រុមប្រឹក្សាអភិវឌ្ឍន៍កម្ពុជា ហើយបើចង់ដឹងពីទំហំនៃការធ្វើពាណិជ្ជកម្មត្រូវសួរពាណិជ្ជកម្ម និងចង់ដឹងពីចំនួនភ្ញៀវទេសចរបរទេសត្រូវឆែកមើលនៅក្រសួងទេសចរណ៍៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
