រោងចក្រផ្គុំ និងដំឡើងរថយន្តអគ្គិសនីដ៏ធំមួយ នឹងផុសត្រដែតឡើងនៅខេត្តពោធិ៍សាត់

នៅពេលអនាគតដ៏ខ្លីខាងមុខ ខេត្តពោធិ៍សាត់ ដែលមានភាពអំណោយផលខាងវិស័យអគ្គិសនីនឹងមានរោងចក្រផ្គុំ និងដំឡើងរថយន្តអគ្គិសនីប្រភេទដឹកទំនិញមួយបន្ថែមទៀត បន្ទាប់ពីខេត្តនេះទទួលបានរោងចក្រផ្គុំ និងដំឡើងរថយន្តហ្វត កាលពីពេលកន្លងទៅ។ បើតាមការអះអាងរបស់ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល រោងចក្រផ្គុំ និងដំឡើងរថយន្តអគ្គិសនីរបស់ក្រុមហ៊ុន ZO Motor នេះ នឹងបើកការដ្ឋានសាងសង់នៅថ្ងៃទី១៨ ខែសីហា ឆ្នាំ២០២៤ ចុងសប្តាហ៍នេះ លើផ្ទៃដី១០ហិកតានៅក្នុងតំបន់សេដ្ឋកិច្ចពិសេសក្នុងស្រុកក្រគរ ខេត្តពោធិ៍សាត់។

ថ្នាក់ដឹកនាំរូបនេះរំពឹងថា តាមរយៈវត្តមានរបស់រោងចក្រផ្គុំ និងដំឡើងរថយន្តអគ្គិសនីប្រភេទដឹកទំនិញនេះ វានឹងរួមចំណែកជួយជំរុញការប្រើប្រាស់រថយន្តអគ្គិសនីនៅកម្ពុជា ជួយកាត់បន្ថយការចំណាយ និងការបំពុលបរិស្ថាន និងជាពិសេសជួយបង្កើនសមត្ថភាពប្រកួតប្រជែងក្នុងវិស័យដឹកជញ្ជូនរបស់កម្ពុជា។

គួរបញ្ជាក់ថា ក្រុមហ៊ុន ZO Motors នេះ គឺជាក្រុមហ៊ុនផលិតរថយន្តពាណិជ្ជកម្មដើរដោយថាមពលស្អាតជំនាន់ក្រោយរបស់ប្រទេសជប៉ុន-ចិន ដែលផលិត និងចែកចាយរថយន្តដឹកទំនិញពាណិជ្ជកម្ម ដែលមិនបញ្ចេញឧស្ម័ន និងត្រូវបានរចនា និងផលិតនៅអាស៊ីជាមួយនឹងខ្សែសង្វាក់ផ្គត់ផ្គង់ជាសកល។ នេះជារោងចក្រផ្គុំ និងដំឡើងរថយន្ដទីពីរហើយ ដែលមានវត្តមាននៅលើទឹកដីខេត្តពោធិ៍សាត់ បន្ទាប់ពីរោងចក្រផ្គុំ និងដំឡើងរថយន្តម៉ាក Ford តម្លៃជាង២០លានដុល្លារបានសម្ភោធដាក់ឱ្យដំណើរការជាផ្លូវការកាលពីថ្ងៃទី១៦ ខែមិថុនា ឆ្នាំ២០២២ កន្លងទៅ៕

អត្ថបទ សោម ស្រីពេជ្រ និងរូបភាពឯកសារ