![ផ្លូវដែក](https://cdn.cambonomist.com/media/images/thnnglvnngtphchb11112222.2e16d0ba.fill-960x540.jpg)
រដ្ឋាភិបាលថៃ កំពុងសម្លឹងទាញផលប្រយោជន៍ពីផ្លូវដែកឡាវ តាមរយៈការតភ្ជាប់ផ្លូវដែកជាតិរបស់ខ្លួនជាមួយបណ្តាញផ្លូវដែកល្បឿនលឿនឡាវ-ចិន ដើម្បីជំរុញពាណិជ្ជកម្មក្នុងចំណោមប្រទេសទាំងបី ដោយរំពឹងទុកថា ប្រទេសថៃនឹងដើរតួជាមជ្ឈមណ្ឌលដឹកជញ្ជូនក្នុងតំបន់កាន់តែសកម្ម។ ការតភ្ជាប់ផ្លូវដែកនេះនឹងចេញដំណើរពីស្ថានីយកណ្តាលទីក្រុងបាងកកទៅកាន់ស្ថានីយនៅក្នុងខេត្ត អ៊ូប៊ុន ថានី ហើយបន្តទៅស្ថានីយនៅខេត្ត ណង ខៃ រហូតដល់ស្ថានីយខាំសាវ៉ាតនៅទីក្រុងវៀងចន្ទន៍ប្រទេសឡាវ។
ពាក់ព័ន្ធនឹងការតភ្ជាប់នេះដែរ អភិបាលរងផ្លូវដែករដ្ឋនៃប្រទេសថៃ លោក អាវីរុទ្ធ ថុងណាត ( Awirut Thongnate) បាននិយាយប្រាប់សារព័ត៌មាន Nikkei ថា ថៃកំពុងធ្វើការជាមួយអាជ្ញាធរផ្លូវដែកជាតិឡាវ ដើម្បីរៀបចំសម្រាប់ការបើកជាផ្លូវការនៃបណ្តាញផ្លូវដែកថៃ-ឡាវ ដែលគ្រោងធ្វើនៅខែក្រោយ ដើម្បីតភ្ជាប់បន្តទៅប្រទេសចិន។
បណ្តាញផ្លូវដែកថៃ-ឡាវ នេះនឹងជួយតភ្ជាប់មិនត្រឹមតែភស្តុភារ និងពាណិជ្ជកម្មប៉ុណ្ណោះទេ ថែមទាំងជួយជំរុញវិស័យទេសចរណ៍តាមបណ្តោយប្រទេសថៃ និងឡាវ ហើយ ក៏នឹងតភ្ជាប់បន្ថែមទៀតទៅកាន់តំបន់ភាគខាងត្បូងនៃប្រទេសចិន ផងដែរ។
តាំងពីខែធ្នូឆ្នាំ២០២១ មកគេដឹងថា ឡាវគឺជាអធិរាជផ្លូវដែកមួយនៅក្នុងតំបន់ ដោយសារតែគម្រោងរថភ្លើងល្បឿនលឿនចិន-ឡាវ ហើយការប្រញាប់ជំរុញការតភ្ជាប់របស់់ថៃទៅនឹងបណ្តាញផ្លូវដែកឡាវនេះ គឺថៃប្រឹងប្រែងដើម្បីជំរុញការដឹកជញ្ជូនទំនិញឆ្លងកាត់ព្រំដែនពីថៃ ទៅឡាវ និងទៅចិន ពោលគឺទៅកាន់ទីក្រុងគុនមីង ភាគខាងត្បូងប្រទេសចិន។
លោក អាវីរុទ្ធ បានឲ្យដឹងថា ផ្លូវដែកប្រវែង១ពាន់គីឡូម៉ែត្រនេះ បានជួយកាត់បន្ថយពេលវេលាដឹកជញ្ជូនពីថៃ ទៅកាន់ប្រទេសចិន មកត្រឹម១៥ម៉ោងប៉ុណ្ណោះ ខណៈដែលការដឹកជញ្ជូនតាមរថយន្តគឺត្រូវចំណាយដល់ទៅ៤៨ម៉ោងឯណោះ។
ការនាំចេញរបស់ថៃ ទំនងជាទទួលបានអត្ថប្រយោជន៍ពីការតភ្ជាប់ផ្លូវដែក រួមមាន ការដឹកជញ្ជូនម្ហូបអាហារ ផលិតផលតាមរដូវ និងទំនិញដែលមានការបរិច្ឆេទប្រើប្រាស់ខ្លីផ្សេងៗ។ មជ្ឈមណ្ឌលស្រាវជ្រាវកសិករថៃ បានព្យាករណ៍ថា ការនាំចេញរបស់ថៃទៅកាន់ប្រទេសចិនតាមរយៈផ្លូវដែកថៃ-ឡាវ អាចនឹងពង្រីកប្រមាណ១៧% នៅឆ្នាំនេះ ជាមួយនឹងសាច់ប្រាក់កើនឡើងមានតម្លៃដល់ទៅជិត៧ពាន់លានដុល្លារ៕
ដោយៈ សរ សុជាតិ