បើទោះបីជា អង្គការសុខភាពពិភពលោក បានព្រមានជាច្រើនលើកច្រើនសារថា មិនគួរមានដាក់បម្រាមហាមឃាត់ការធ្វើដំណើរ ក៏ដូចជាការបិទជើងហោះហើរយ៉ាណាក៏ដោយ តែមជ្ឈមណ្ឌលគ្រប់គ្រង និងការពារជំងឺឆ្លងរបស់សហរដ្ឋអាមេរិក (CDC) រហូតមកដល់ពេលនេះ បានដាក់ប្រទេសចំនួន ៣៨ហើយចូលក្នុងបញ្ជីធ្វើដំណើរមានហានិភ័យកម្រិតខ្ពស់បំផុតទី ៤ ដែលមានន័យថា ពលរដ្ឋអាមេរិកត្រូវចៀសវាងការធ្វើដំណើរទៅកាន់ប្រទេសទាំងនោះ។
សហរដ្ឋអាមេរិកបានដាក់ច្បាប់ថ្មីដែលចូលជាធរមានកាលពីថ្ងៃច័ន្ទសប្ដាហ៍នេះ ដោយបានតម្រូវឱ្យអ្នកដំណើរតាមផ្លូវអាកាសអន្តរជាតិទាំងអស់ ត្រូវតែធ្វើតេស្តអវិជ្ជមានកូវីដ១៩ នៅមុនថ្ងៃធ្វើដំណើរទៅសហរដ្ឋអាមេរិក។ ក្នុងនោះ CDC ក៏បានណែនាំឱ្យអ្នកដំណើរទាំងអស់ត្រូវធ្វើតេស្តរកមេរោគកូវីដ១៩ពី ៣ ទៅ ៥ ថ្ងៃបន្ទាប់ពីការមកដល់សហរដ្ឋអាមេរិក ហើយចំពោះអ្នកដំណើរ ដែលមិនបានចាក់វ៉ាក់សាំងគួរតែដាក់ឱ្យធ្វើចត្តាឡីស័ករយៈពេល ៧ ថ្ងៃបន្ទាប់ពីមកដល់ផងដែរ។
សូមរំឮកថា ចាប់ពីថ្ងៃទី ២៩ ខែវិច្ឆិកាមក សេតវិមានអាមេរិក បានហាមប្រាមជនបរទេសស្ទើរតែទាំងអស់មិនឱ្យចូលសហរដ្ឋអាមេរិក ជាពិសេសពីបណ្តាប្រទេសនៅតំបន់អាហ្វ្រិកខាងត្បូងទាំង៨ ដោយសារតែការភ័យខ្លាចការរីករាលដាលនៃមេរោគកូវីដ១៩បំប្លែងថ្មី អូមីក្រុង ខណៈគិតមកដល់ពេលនេះ អាមេរិកបានឃើញ មេរោគបំប្លែងថ្មីនេះ កាន់តែច្រើនឡើងហើយ ពោលគឺរដ្ឋចំនួន ១៦ ក្នុងប្រទេសនេះត្រូវបានរកឃើញមេរោគថ្មីអូមីក្រុង។
អត្ថបទគួរអាន
យ៉ាងណាមិញ ប្រទេសបារាំង ដែលស្ថិតនៅក្នុងបញ្ជីឈ្មោះដែលអាមេរិកណែនាំពលរដ្ឋខ្លួនមិនឲ្យធ្វើដំណើរទៅនោះ ក៏បានឱ្យដឹងដែរថា បារាំងនឹងបិទក្លឹបកម្សាន្តពេលរាត្រីនៅមុនថ្ងៃបុណ្យណូអែល និងរឹតបន្តឹងវិធានការគម្លាតសង្គម ដើម្បីឆ្លើយតបទៅនឹងការរីករាលដាលមេរោគបំប្លែងថ្មី អូមីក្រុង ខណៈប្រទេសបារាំងកាលពីថ្ងៃចន្ទ បានរកឃើញករណីវិជ្ជមានមេរោគអូមីក្រុងចំនួន ២៥ ករណី។ ប៉ុន្តែ យ៉ាងណាក៏ដោយ ប្រទេសនេះមិនទាន់មានវិធានការចាំបាច់ណាមួយសម្រាប់បម្រាមគោចរ ឬការបិទខ្ទប់ប្រទេសឡើយ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
