![ដៃគូសន្តិសុខរ៉ែ](https://cdn.cambonomist.com/media/images/mrkkp22131.2e16d0ba.fill-960x540.jpg)
លោក ចូស ហ្វឺណាន់ដិស (Jose Fernandez) អនុរដ្ឋមន្ត្រីការបរទេសសហរដ្ឋអាម៉េរិកទទួលបន្ទុកកំណើនសេដ្ឋកិច្ច ថាមពល និងបរិស្ថានបានជួបពិភាក្សាជាមួយមន្ត្រីរដ្ឋាភិបាលឥណ្ឌូនេស៊ីអំពីភាពជាដៃគូសន្តិសុខរ៉ែ ដែលជាកិច្ចសហការរវាងប្រទេសចំនួន១៤ និងសហភាពអឺរ៉ុបនៅក្នុងដំណើរទស្សនកិច្ចរបស់លោកទៅកាន់ទីក្រុងហ្សាកាតា នៅក្នុងសប្តាហ៍នេះ។
លោក ហ្វឺណាន់ដិស បានប្រាប់សន្និសីទកាសែតនៅទីក្រុងហ្សាកាតាថា ភាពជាដៃគូសន្តិសុខរ៉ែ (MSP) នេះមានបំណងពន្លឿនការអភិវឌ្ឍខ្សែច្រវាក់ផ្គត់ផ្គង់រ៉ែសំខាន់ៗ ប្រកបដោយនិរន្តរភាព និងជួយសម្រួលដល់ការគាំទ្រផ្នែកហិរញ្ញវត្ថុ និងការទូត ហើយវានឹងក្លាយជាឱកាសមួយដើម្បីកែលម្អបទដ្ឋានបរិស្ថាន និងអភិបាលកិច្ចនៅក្នុងវិស័យរ៉ែរបស់ប្រទេសឥណ្ឌូនេស៊ី។
ប្រទេសឥណ្ឌូនេស៊ីដែលសម្បូរធនធានរ៉ែដូចជារ៉ែនីកែល ទង់ដែង និងបុកស៊ីតជាដើម មានបំណងអភិវឌ្ឍន៍ខ្លួនឱ្យក្លាយជាមជ្ឈមណ្ឌលផលិតថ្ម និងរថយន្តអគ្គិសនី។ ដូច្នេះហើយប្រទេសនេះបានពង្រីកឧស្សាហកម្មកែច្នៃរ៉ែនីកែលរបស់ខ្លួនយ៉ាងសម្បើមតាំងពីប្រទេសនេះបានហាមឃាត់ការនាំចេញរ៉ែមិនទាន់កែច្នៃក្នុងឆ្នាំ២០២០ ប៉ុន្តែអ្នកការពារបរិស្ថានបានបន្ទោសឧស្សាហកម្មនេះថា បានបំផ្លាញព្រៃឈើ និងបំពុលទឹក និងខ្យល់ដែលបណ្តាលមកពីការចំហុយរ៉ែទាំងនេះ។
លោក ហ្វឺណាន់ដិស បាននិយាយថា លោកជឿជាក់ថា ភាពជាដៃគូសន្តិសុខរ៉ែនេះនឹងនាំឱ្យមានការវិនិយោគកាន់តែច្រើននៅក្នុងប្រទេសឥណ្ឌូនេស៊ី ហើយការវិនិយោគនោះទៀតសោតគឺជាការវិនិយោគមួយដែលផ្តល់អត្ថប្រយោជន៍ដល់សហគមន៍ លើកកម្ពស់ច្បាប់ការងារ និង គាំទ្រដល់ច្បាប់បរិស្ថានផងដែរ។ លោកបានចាត់ទុកឥណ្ឌូណេស៊ី គឺជាប្រទេសមួយក្នុងចំណោមប្រទេសចំនួន៥ ដែលសហរដ្ឋអាមេរិកនឹងគាំទ្រ ដើម្បីក្លាយជាមជ្ឈមណ្ឌលផលិតគ្រឿងអេឡិចត្រូនិកមួយផងដែរ៕
អត្ថបទ៖ សុខ មង្គល