![ក្រុមហ៊ុនផលិតរថយន្តអគ្គិសនីវៀតណាម VinFast](https://cdn.cambonomist.com/media/images/VinFast123.2e16d0ba.fill-960x540.jpg)
ក្រុមហ៊ុន VinFast ដែលបង្កើតឡើងដោយកំពូលមហាសេដ្ឋីមានទ្រព្យច្រើនបំផុតរបស់វៀតណាម គឺលោក ហ្វាំ ញ៉ាត វួង (Pham Nhat Vuong) ក្នុងឆ្នាំ២០១៧ និងដែលបានងាកមកផលិតរថយន្តអគ្គិសនីសុទ្ធក្នុងឆ្នាំ២០២២ បាននិយាយថា ខ្លួននឹងចែកចាយរថយន្តឱ្យបានចំនួន៨ម៉ឺនគ្រឿងនៅឆ្នាំនេះ ពោលគឺធ្លាក់ចុះពីផែនការចាស់១០ម៉ឺនគ្រឿង។ ការលក់របស់ក្រុមហ៊ុនផលិតរថយន្តអគ្គិសនីវៀតណាមមួយនេះ បានកើនឡើង២៤% ឈានដល់ប្រមាណ១ម៉ឺន២ពាន់គ្រឿងក្នុងត្រីមាសទី២ បើធៀបនឹងត្រីមាសទី១។
គិតជារួម ក្រុមហ៊ុន VinFast លក់រថយន្តអគ្គិសនីបានជាង២ម៉ឺន១ពាន់៧០០គ្រឿងក្នុងឆមាសទី១ដើមឆ្នាំ២០២៤ ដោយកើនឡើង៩២% បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែតួលេខនេះបង្ហាញថា ទើបតែសម្រេចបានប្រមាណ១ភាគ៤ប៉ុណ្ណោះនៃការព្យាករប្រចាំឆ្នាំថ្មីរបស់ក្រុមហ៊ុននេះ។
ក្រុមហ៊ុននេះនៅតែរំពឹងថា នឹងសម្រេចបានកំណើនលក់ដាច់ខ្លាំងនៅក្នុងឆមាសទី២ ឆ្នាំនេះ ដែលជំរុញដោយម៉ូឌែលរថយន្តសម្បូរបែប និងការពង្រីកទីផ្សារនៅក្នុងតំបន់សំខាន់ៗរួមទាំងទីផ្សារថ្មីនៅអាស៊ី និងបណ្ដាទីផ្សារដែលមានស្រាប់ផងដែរ។
តាមរយៈសេចក្តីថ្លែងការណ៍របស់ខ្លួន ក្រុមហ៊ុន VinFast បាននិយាយថា ខ្លួននឹងពន្យារពេលបើកដំណើរការរោងចក្រនៅរដ្ឋ North Carolina ដែលបានគ្រោងទុកសម្រាប់ឆ្នាំ២០២៥ រហូតដល់ឆ្នាំ២០២៨៕
ដោយ: តែម សុខុម