ក្រុមហ៊ុន Amazon Web Services (AWS) ដែលជាបុត្រសម្ព័ន្ធនៃក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាម៉េរិក Amazon.com, Inc បានទម្លាយឱ្យដឹងតាមរយៈសេចក្ដីថ្លែងការណ៍ថា ខ្លួនគ្រោងបោះទុនវិនិយោគក្នុងទំហំទឹកប្រាក់រហូតដល់ទៅជាង១៥ពាន់លានដុល្លារ ដើម្បីពង្រីកហេដ្ឋារចនាសម្ព័ន្ធសេវាកម្ម Cloud ឬ Cloud Computing នៅទីក្រុងតូក្យូ និងក្រុងអូសាកា ប្រទេសជប៉ុន ដើម្បីបំពេញតម្រូវការដែលចេះតែបន្តកើនឡើងឥតឈប់ឈរ។
ក្រុមហ៊ុន Amazon Web Services (AWS) បាននិយាយថា ការវិនិយោគលើកក្រោយនេះ គឺបន្ថែមពីទុនវិនិយោគក្នុងទំហំជាង១០ពាន់លានដុល្លារ ដែលខ្លួនបានចំណាយចន្លោះពីឆ្នាំ២០១១ ដល់ឆ្នាំ២០២២ ដើម្បីបង្កើនសមត្ថភាពផ្ដល់សេវាកម្ម Cloud ឬ Cloud Computing នៅក្នុងប្រទេសជប៉ុន។
អត្ថបទគួរអាន
សេវាកម្ម Cloud ឬ Cloud Computing គឺជាសេវាកម្មដែលអាចគ្រប់គ្រង រក្សាទុក ឬ ធ្វើប្រតិបត្តិការទិន្នន័យនៅកន្លែងរួមមួយ។ ការធ្វើដូចនេះមិនចាំបាច់មានហាដវែរខ្លួនឯងនោះទេ ហើយក៏មិនចាំបាច់មានទីកន្លែងទុកហាដវែរនោះដែរ ពីព្រោះអ្វីៗគឺត្រូវបានផ្តល់ដោយក្រុមហ៊ុនផ្តល់សេវាកម្ម Cloud ហើយអ្វីដែលត្រូវធ្វើគឺគ្រាន់តែបង់ថ្លៃសម្រាប់ការប្រើប្រាស់សេវាកម្មនេះប៉ុណ្ណោះ។
បច្ចុប្បន្នក្រុមហ៊ុនខ្នាតយក្សមួយនេះកំពុងផ្តល់សេវាកម្មបច្ចេកវិទ្យា ជិនណឺរ៉េធីវ អេអាយ (Generative AI) ដល់ក្រុមហ៊ុនអតិថិជនជប៉ុនធំៗរួមមានទាំងក្រុមហ៊ុន អាសាហ៊ិ គ្រុប (Asahi Group) ក្រុមហ៊ុន ម៉ារូបេនី (Marubeni) និងក្រុមហ៊ុន ណូមូរ៉ា ហូលឌីង (Nomura Holdings) ផងដែរ។
ការវិនិយោគនេះកើតមានឡើង ខណៈដែលរដ្ឋាភិបាលជប៉ុន និងវិស័យសាជីវកម្មកំពុងប្រជែងគ្នាដើម្បីដើរតាមឱ្យទាន់ការវិវត្តនៃបច្ចេកវិទ្យា AI។ កាលពីឆ្នាំមុន នាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) បានជួបជាមួយថ្នាក់ដឹកនាំនៃក្រុមហ៊ុន OpenAI ដែលជាអ្នកបង្កើតបច្ចេកវិទ្យា ChatGPT និងក្រុមហ៊ុនផលិតបន្ទះឈីបកម្រិតខ្ពស់ អិនវីឌៀ (Nvidia) ដើម្បីពិភាក្សាអំពីបទប្បញ្ញត្តិគ្រប់គ្រង AI និងហេដ្ឋារចនាសម្ព័ន្ធបច្ចេកវិទ្យា AI៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
