ក្រុមប្រឹក្សាធុរកិច្ចអាស៊ាននិងអ្នកពាក់ព័ន្ធកំពុងគូសវាសជំហានដែលត្រូវដើរ ដើម្បីពង្រឹងមជ្ឈភាព, អនុវត្តដំណោះស្រាយប្រកបដោយភាពច្នៃប្រឌិត និងតស៊ូមតិឱ្យមានបរិយាប័ន្នសំដៅបង្កើនភាពធន់ក្នុងតំបន់ ដើម្បីធានាឱ្យអាស៊ានអាចក្លាយជាមជ្ឈមណ្ឌលនៃកំណើននៅលើពិភពលោក។ នេះបើយោងតាមលោក អាជេត រ៉ាសជីត ប្រធានក្រុមប្រឹក្សាធុរកិច្ចអាស៊ាន ដែលបាននិយាយនៅឯកិច្ចប្រជុំរបស់មេដឹកនាំអាស៊ានជាមួយតំណាងមកពីក្រុមប្រឹក្សាធុរកិច្ចអាស៊ានកាលពីថ្ងៃពុធ។
លោកបានបន្ថែមថា ក្នុងនាមជាដៃគូយុទ្ធសាស្ត្ររបស់រដ្ឋាភិបាលមកពីវិស័យឯកជន ក្រុមប្រឹក្សាធុរកិច្ចអាស៊ាននឹងបន្តគាំទ្រតំបន់នេះឱ្យក្លាយជាតំបន់មួយដែលលើកតម្កើងបរិយាប័ន្នសម្រាប់ភាគីនានា ដើម្បីជួយពួកគេឲ្យរីកចម្រើនជាមួយគ្នា។
លោក រ៉ាសជីត ដែលជាប្រធានសភាពាណិជ្ជកម្មនិងឧស្សាហកម្មឥណ្ឌូណេស៊ីផងដែរនោះ បានបន្តថា៖ «គ្មាននរណាម្នាក់ត្រូវគេទុកចោលទេ ប្រទេសសមាជិកអាស៊ានទាំងអស់នឹងរីកចម្រើនជាមួយគ្នា ហើយក្លាយជាផ្នែកមួយនៃដំណើររបស់អាស៊ានដែលជាចំណុចកណ្តាលនៃកំណើនសេដ្ឋកិច្ចពិភពលោក។»
អត្ថបទគួរអាន
លោកបានបន្តថា ក្រុមប្រឹក្សាធុរកិច្ចអាស៊ានតែងតែផ្តល់យោបល់ជាយុទ្ធសាស្ត្រផ្សេងៗពីវិស័យឯកជនដល់ថ្នាក់ដឹកនាំប្រទេសអាស៊ាន។
លោកបានបន្ថែមថា៖ «ការធ្វើដូច្នេះមានគោលបំណងលើកទឹកចិត្តចំពោះសមាហរណកម្មសេដ្ឋកិច្ចក្នុងតំបន់កាន់តែខ្លាំងឡើង និងលើកកម្ពស់គម្រោងដែលហុចផលក្នុងរយៈពេលខ្លី និងក្នុងរយៈពេលវែង។»
ដោយឡែក លោក ប៊ែណាឌីណូ វេហ្គា អនុប្រធានក្រុមប្រឹក្សាធុរកិច្ចអាស៊ានបានលើកឡើងថា ក្រុមប្រឹក្សាធុរកិច្ចអាស៊ានបានបន្តលើកទឹកចិត្តចំពោះការអនុវត្តកម្មវិធីទីផ្សារតែមួយ តាមរយៈបទប្បញ្ញត្តិស្ដីពីរបាំងមិនមែនពន្ធគយ សមាហរណកម្មពាណិជ្ជកម្មក្នុងវិស័យសេវាកម្ម ក៏ដូចជារំហូរកាន់តែប្រសើរឡើងនៃការវិនិយោគ កម្មករជំនាញ តួអង្គអាជីវកម្ម និង មូលធន៕
