នេះបើតាមការអះអាងរបស់ឯកឧត្តម រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា ដែលបានគូសបញ្ជាក់បន្ថែមថា ក្នុងចំណោមទីតាំងល្បែងស៊ីសងខុសច្បាប់ ដែលបានបង្ក្រាបទាំងនោះ ក៏មានចំនួនត្រូវបានលួចលាក់បើកឡើងវិញផងដែរ។
ឯកឧត្តម រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា បានគូសបញ្ជាក់ប្រាប់ខេមបូណូមីសថា បច្ចុប្បន្នរាជរដ្ឋាភិបាលបានផ្តល់អាជ្ញាបណ្ណ និងអនុញ្ញាតឱ្យដំណើរការល្បែងតែពីរប្រភេទប៉ុណ្ណោះ រួមមាន ល្បែងកាស៊ីណូ និងល្បែងផ្សងសំណាង ដោយឡែកសម្រាប់ល្បែងតាមប្រព័ន្ធអេឡិចត្រូនិក គឺរាជរដ្ឋាភិបាលពុំមានការផ្តល់អាជ្ញាបណ្ណ ឬលិខិតអនុញ្ញាតឱ្យដំណើរការនៅកម្ពុជានោះទេ ពោលគឺរាល់ល្បែងអនឡាញទាំងអស់សុទ្ធសឹងជាល្បែងខុសច្បាប់។
យ៉ាងណាក៏ដោយ បើតាមការគូសបញ្ជាក់របស់ថ្នាក់ដឹកនាំរូបនេះ កាលពីពេលថ្មីៗ រាជរដ្ឋាភិបាលបានបង្កើតក្រុមការងារចំពោះកិច្ចមួយដើម្បីគ្រប់គ្រងផលប៉ះពាល់ និងចាត់វិធានការលើទីតាំងល្បែងខុសច្បាប់ទាំងនោះ ក៏ដូចជាឈានដល់ការលុបបំបាត់ឱ្យបាននូវទីតាំងល្បែងខុសច្បាប់ទាំងនោះឱ្យអស់ពីមូលដ្ឋាននៅទូទាំងប្រទេសផងដែរ។ ជាក់ស្តែងក្រោយមានការបញ្ជាពីប្រមុខរាជរដ្ឋាភិបាល អាជ្ញាធរសមត្ថកិច្ចបង្រ្កាបទីតាំងលេងល្បែងស៊ីសងខុសច្បាប់ទូទាំងប្រទេសបានជិត៦ពាន់កន្លែង។
បើតាមការអះអាងរបស់ថ្នាក់ដឹកនាំរូបនេះ ក្រោយពេលចុះបង្រ្កាបទីតាំងទាំងនោះបានមួយរយៈរួចមក អាជ្ញាធរសមត្ថកិច្ច ក៏បានចុះទៅស៊ើបបញ្ជាក់ដល់ទីតាំងទាំងនោះផ្ទាល់បន្ថែមទៀតផងដែរ និងបានរកឃើញថា មានទីតាំងមួយចំនួន១១៩ បានបើកអាជីវកម្មល្បែងខុសច្បាប់ឡើងវិញ ដែលតម្រូវឱ្យអាជ្ញារធរចុះបង្រ្កាបភ្លាមៗតែម្តង។
គួររំលឹកថា កាលពីថ្ងៃទី១៤ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាឱ្យអភិបាលរាជធានី-ខេត្តទាំងអស់បង្ក្រាបទីតាំងល្បែងខុសច្បាប់នៅដែនសមត្ថកិច្ចរបស់ខ្លួន ហើយក្នុងករណីមានទីតាំងល្បែងបើកថ្មីៗបន្ថែមទៀត ត្រូវចាត់វិធានការបិទជាបន្ទាន់ ឬឈានដល់ការដកអាជ្ញាបណ្ណក្នុងខេត្ត ឬនៅទូទាំងប្រទេសតែម្ដង៕
