តម្លៃប្រាក់ដុល្លារអាម៉េរិក ស្ថិតនៅទ្រឹងនាថ្ងៃអង្គារ ទី៩ ខែមករា នេះ ខណៈនៅក្នុងទីផ្សាររូបិយប័ណ្ណឌីជីថល ឬ គ្រីបតូ ប៊ីតខញ (Bitcoin) បានហក់ឡើងថ្លៃខ្លាំងបំផុតមិនធ្លាប់មានចាប់តាំងពីខែមេសា ឆ្នាំ២០២២ ដោយសារមានការរំពឹងទុកកាន់តែខ្លាំងឡើងថា នៅក្នុងពេលដ៏ខ្លីខាងមុខនេះនឹងមានការអនុម័ត Bitcoin ETF ដែលជាមូលនិធិជួញដូរអត្រាប្ដូរប្រាក់ Bitcoin។
ទន្ទឹមនេះតម្លៃប្រាក់អឺរ៉ូ បានហក់ឡើងថ្លៃលើកចុងក្រោយដល់ជាង១,០៩ដុល្លារអាម៉េរិក ធៀបនឹង១អឺរ៉ូ បើធៀបនឹង១,០៨ដុល្លារអាម៉េរិក ក្នុង១អឺរ៉ូ ខណៈប្រាក់យ៉េន របស់ជប៉ុន បានឡើងថ្លៃបន្តិចដោយ១ដុល្លារអាម៉េរិក ប្ដូរបាន១៤៥យ៉េន បន្ទាប់ពីបានធ្លាក់ថ្លៃខ្លាំងទល់នឹងប្រាក់ដុល្លារអាម៉េរិក ខណៈដែលផលបត្ររតនាគារសហរដ្ឋអាម៉េរិក បានធ្លាក់ចុះ។
ការប្រែប្រួលតម្លៃរូបិយប័ណ្ណទាំងនេះ គឺមួយផ្នែកដោយសារតែការស្ទង់មតិចុងក្រោយបំផុតរបស់ធនាគារកណ្ដាលអាម៉េរិក សាខាក្រុងញូវយ៉ក ដែលបានបង្ហាញថា ការរំពឹងទុករបស់អតិថិជនអ្នកប្រើប្រាស់កាលពីខែធ្នូ នៅសហរដ្ឋអាម៉េរិក ចំពោះអតិផរណាបានធ្លាក់ចុះដល់កម្រិតទាបបំផុតមិនធ្លាប់មានក្នុងរយៈពេលជិត៣ឆ្នាំមកនេះ។
ទិន្នន័យស្ដីពីអតិផរណានៅក្នុងសហរដ្ឋអាម៉េរិក នឹងត្រូវចេញផ្សាយក្នុងសប្តាហ៍នេះដែលនឹងផ្ដល់ភាពកាន់តែច្បាស់លាស់ថា តើមានឱកាសច្រើនកម្រិតណាដែលធនាគារកណ្ដាលអាម៉េរិក នឹងត្រូវបញ្ចុះអត្រាការប្រាក់ក្នុងឆ្នាំនេះ។
លោក ខាយ រ៉ត់ដា (Kyle Rodda) អ្នកវិភាគទីផ្សារហិរញ្ញវត្ថុជាន់ខ្ពស់នៅគេហទំព័រ Capital.com បាននិយាយថា ចំណុចសំខាន់គឺស្ថិតលើទិន្នន័យទាក់ទងនឹងការរំពឹងទុកចំពោះកម្រិតអតិផរណានៅពេលខាងមុខ។
អ្នកវិភាគរូបនេះបានបន្ថែមថា ទោះបីជាទីផ្សារការងារនៅតែមានភាពរឹងមាំជាមួយនឹងអត្រាគ្មានការងារធ្វើទាបយ៉ាងណាក្ដី ក៏លោកនៅតែមើលឃើញអតិផរណានៅសហរដ្ឋអាម៉េរិក ស្ថិតក្នុងកម្រិតមួយដែលអាចនឹងជំរុញឱ្យធនាគារកណ្ដាលអាម៉េរិក បញ្ចុះអត្រាការប្រាក់ក្នុងពេលឆាប់ៗនេះ៕
អត្ថបទ៖ សុខ ជា
