កម្ពុជារកចំណូលបានជិត៨០០លានដុល្លារពីការនាំចេញកៅស៊ូ និងផលិតផលធ្វើពីកៅស៊ូនៅ១១ខែឆ្នាំនេះ

លោក ម៉ែន សុភ័ក្រ ប្រធានសមាគមកៅស៊ូកម្ពុជា កត់សម្គាល់ឃើញថា តម្លៃជ័រកៅស៊ូនៅប៉ុន្មានខែចុងក្រោយនេះហាក់មានស្ថិរភាពល្អប្រសើរ ពោលគឺជ័រកៅស៊ូល្អអាចលក់បានក្នុងតម្លៃជាង១ពាន់៤រយដុល្លារក្នុង១តោន។ តែយ៉ាងណាអ្នកជំនាញរូបនេះអះអាងថា តម្លៃជ័រកៅស៊ូជាង១ពាន់៤រយដុល្លារ ក្នុងមួយតោននេះ ពុំទាន់អាចធ្វើឱ្យក្រុមហ៊ុនដាំកៅស៊ូទទួលបានចំណេញខ្ពស់នោះទេ ដោយសារមានការចំណាយច្រើន ប៉ុន្តែសម្រាប់កសិករមួយចំនួនអាចទទួលបានផលចំណេញ ប្រសិនបើពួកគេមិនសូវចំណាយលើការថែទាំច្រើន។

យោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា គិតចាប់ពីខែមករា ដល់ខែវិច្ឆិកា ឆ្នាំ២០២៣ ការនាំចេញកៅស៊ូ និងផលិតផលធ្វើពីកៅស៊ូ ទទួលបានប្រាក់ចំណូលជាង៧៨៩លានដុល្លារមានការកើនឡើងជាង៧៤% ខណៈកាលពីឆ្នាំ២០២២ ចំណូលបានពីការនាំចេញជ័រកៅស៊ូមានតែជាង៤៥២លានដុល្លារប៉ុណ្ណោះ។ ជ័រកៅស៊ូ និងផលិតផលធ្វើពីកៅស៊ូរបស់កម្ពុជា ភាគច្រើនត្រូវបាននាំចេញទៅទីផ្សារអាស៊ី ដូចជាប្រទេសចិន វៀតណាម ម៉ាឡេស៊ី សិង្ហបុរី និងប្រទេសជប៉ុនជាដើម។

សូមបញ្ជាក់ថា គិតត្រឹមឆ្នាំ២០២២ កម្ពុជាមានផ្ទៃដីដាំកៅស៊ូសរុបជាង៤០ម៉ឺនហិកតា ក្នុងនោះផ្ទៃដីចម្ការកៅស៊ូ កសិ-ឧស្សាហកម្ម មានជាង៤ម៉ឺនហិកតា, ផ្ទៃដីចម្ការកៅស៊ូសម្បទានដីសេដ្ឋកិច្ចមានជាង ១៩ម៉ឺនហិកតា និងផ្ទៃដីចម្ការកៅស៊ូគ្រួសារមានជាង១៦ម៉ឺនហិកតា។ ដោយឡែក ផ្ទៃដីចៀរជ័រកៅស៊ូ មានប្រមាណ៣១ម៉ឺនហិកតា និងផ្ទៃដីថែទាំមានជាង៩ម៉ឺនហិកតា៕

អត្ថបទ៖ បូ ដូឡា​