សហភាពអឹរ៉ុប បានប្រកាសពីវិធានការបិទព្រំដែនរបស់ខ្លួនកាលពីថ្ងៃទី ១៧ ខែមីនា កន្លងទៅ ដោយការបិទនេះ គឺមានរយៈពេល ៣០ថ្ងៃ។
លោក លន់ យ៉េង អគ្គលេខាធិការ នៃលេខាធិការដ្ឋានសហព័ន្ធស្រូវអង្ករកម្ពុជា បើទោះបីជាមានការបិទព្រំដែនពីសំណាក់សហគមអឺរ៉ុបក៏ពិតមែន ប៉ុន្ដែ លោកថា វាមិនបានប៉ះពាល់ដល់ការនាំចេញអង្កររបស់កម្ពុជានោះទេ ផ្ទុយទៅវិញ វាបានធ្វើឲ្យតម្រូវការអង្ករទៅកាន់ទីផ្សារអឺរ៉ុបកំពុងកាន់តែកើនឡើងថែមទៀត។ ជាក់ស្ដែង បើតាមរបាយការណ៍របស់សហព័ន្ធស្រូវអង្ករកម្ពុជា បានឲ្យដឹងថា រយៈពេល ២ខែ ដំបូងនៅឆ្នាំ២០២០នេះ ការនាំចេញអង្កររបស់កម្ពុជា សម្រេចបានជាង ២២% ដោយក្នុងនោះ ការនាំចេញទៅអឺរ៉ុបមាន ២២%ដូចគ្នាដែរ ។ បើតាមលោក លន់ យ៉េង នៅក្នុងខែមីនានេះទៀតសោត ការនាំចេញអង្កររបស់កម្ពុជា នៅតែមានសន្ទុះកើនឡើងគួរឲ្យកត់សម្គាល់ ទាំងទៅទីផ្សារអឺរ៉ុប ប្រទេសចិន និងបណ្ដាប្រទេសទីផ្សារគោលដៅផ្សេងៗទៀត។
អត្ថបទទាក់ទង!
អគ្គលេខាធិការ នៃលេខាធិការដ្ឋានសហព័ន្ធស្រូវអង្ករកម្ពុជា បានគូសបញ្ជាក់ថា ជាទូទៅការបិទព្រំដែននេះ គឺបិទតែសម្រាប់ការធ្វើចរាចររបស់មនុស្សប៉ុណ្ណោះ មិនផ្ដោតលើការបិទទំនិញចេញចូលនោះទេ។ ហើយលោក សង្កេតឃើញថា នៅតាមច្រកកំពង់ផែ ដូចជានៅប្រទេសបារាំង ជាដើម នៅតែបន្តសកម្មភាពដឹកជញ្ជូនទំនិញធម្មតា។ណាមួយទៀត ចំពោះផលិតផលអង្ករ គឺជាតម្រូវការស្បៀងអាហារដែលការចាំបាច់សម្រាប់ការរស់នៅ ដូច្នេះ បើទោះបីជាពួកគេ ជួបបញ្ហាប្រឈមបែបណា ក៏នៅតែត្រូវការការទទួលទានដែរ ខុសពីផលិតផលផ្សេងៗទៀត ដែលមិនសូវចាំបាច់។
ទោះយ៉ាងណា បើតាមរបាយការណ៍ពីក្រសួងពាណិជ្ជកម្មកម្ពុជា ដែលភីអិនអិនទទួលបានកាលពីម្សិលមិញនេះ បានឲ្យដឹងថា ចំពោះការនាំចេញរបស់កម្ពុជាទៅសហភាពអឺរ៉ុប នៅក្នុងខែមីនានេះ គឺមានតម្លៃជាទឹកប្រាក់ជាង ២៥៥ លានដុល្លារអាមេរិក ធ្លាក់ចុះប្រហែល ៧% ធៀបនឹងខែកុម្ភៈ ដែលមានប្រមាណ២៧៤ លានដុល្លារអាមេរិក។ ដោយឡែក សម្រាប់ទីផ្សារអង់គ្លេសវិញ សម្រាប់ខែមីនា ធៀបនឹងខែកុម្ភៈ ក៏មានការធ្លាក់ចុះ ៧%ផងដែរ។
ជុំវិញទៅនឹងការបិទព្រំដែនរបស់សហភាពអឺរ៉ុបនេះដែរ បើយើងក្រឡេកទៅមើលប្រទេសវៀតណាមឯណោះវិញ ឃើញថា ការនាំចេញវៀតណាមទៅអឺរ៉ុបក៏មានការធ្លាក់ចុះគួរឲ្យកត់សម្គាល់ដែរ ពោលគឺ ធ្លាក់ចុះប្រមាណ៨%។ នេះបើតាមការបញ្ជាក់របស់ក្រសួងឧស្សាហកម្ម និងពាណិជ្ជកម្មនៃប្រទេសនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
