លោក ភីធ័រ ទៀច ស្វែល (Peter Tirschwell) អនុប្រធានក្រុមហ៊ុន S&P Global Market Intelligence និងជាប្រធាន TPM ដែលជាក្រុមហ៊ុនគ្រប់គ្រងស្ថិតិកុងតឺន័រមហាសមុទ្រ បានឲ្យដឹងថា ភាពទន់ខ្សោយនៃទីផ្សាអចលនទ្រព្យ ភាពអត់ការងារធ្វើរបស់យុវជន កំណើនសេដ្ឋកិច្ចយឺត និងការកើនឡើងនូវសញ្ញានៃបរិត្តផរណារបស់ខ្លួន កំពុងតែធ្វើឲ្យគេគិតថា សេដ្ឋកិច្ចចិនធ្លាក់ចុះ ប៉ុន្តែទោះបីជាយ៉ាងណាក៏ដោយក៏ចិននៅតែត្រួតត្រាចំណែកភាគរយនៃទីផ្សារការនាំចេញក្នុងកម្រិតខ្ពស់ដដែល។
អ្នកជំនាញសេដ្ឋកិច្ចរូបនេះ បានសរសេរនៅក្នុងបទអត្ថាធិប្បយរបស់កាសែត Nikkei ថា ការពិតអំពីប្រទេសចិន គឺពិតជាមានភាពស្រពិចស្រពិល ដោយសារច្រវាក់ផលិតកម្មទំនិញមួយចំនួនត្រូវបានផ្លាស់ប្តូរទៅទីតាំងផ្សេងទៀត ដើម្បីកាត់បន្ថយការចំណាយ ឬកាត់បន្ថយហានិភ័យនៃខ្សែច្រវាក់ផ្គត់ផ្គង់ ប៉ុន្តែទោះបីជាយ៉ាងណាក៏ដោយ ផលិតផលបច្ចេកវិទ្យាបៃតងកំពុងរីកចម្រើន។
លោក ភីធ័រ បានអះអាងថា ការនាំចេញទំនិញបច្ចេកវិទ្យាបៃតង កំពុងមានសន្ទុះខ្លាំង ទោះបីជាអត្រាការនាំចេញទៅក្រៅប្រទេសទាំងមូលរបស់ចិន កំពុងធ្លាក់ចុះប្រមាណជា ៦,៤% ហើយក៏ដោយកាលពីខែតុលាថ្មីៗនេះ។
លទ្ធផលនេះ គឺជាធ្វើឲ្យមានតុល្យភាពឡើងវិញដ៏សំខាន់នៃការនាំចេញរបស់ប្រទេសចិន បើទោះបីជាប្រទេសនេះនៅតែរក្សាការជឿជាក់យ៉ាងមុតមាំថា ជាប្រទេសនាំចេញទំនិញធំបំផុតរបស់ពិភពលោកក៏ដោយ។ ជាការពិតណាស់ ចំណែកនៃការនាំចេញរបស់ចិន ទៅកាន់ពិភពលោកផ្សេងទៀតក្នុងលក្ខខណ្ឌតម្លៃ គឺមិនមានការផ្លាស់ប្ដូរទេ ចាប់តាំងពីឆ្នាំ ២០១៧ មក គឺនៅក្នុងកម្រិតប្រមាណជា ៣៦ ភាគរយ។
ទោះយ៉ាងណា ការផ្លាស់ប្តូរទីតាំងនៃខ្សែសង្វាក់ផ្គត់ផ្គង់កំពុងបង្កើនល្បឿន ដោយក្រុមហ៊ុនចម្រុះជាតិសាសន៍បានផ្លាស់ប្តូរប្រភពផលិតកម្មពីប្រទេសចិនទៅកាន់ទីតាំងនៅទូទាំងអាស៊ីអាគ្នេយ៍ អឺរ៉ុបខាងកើត អាហ្វ្រិកខាងជើង និងអាមេរិកឡាទីន៕
ដោយៈ សរ សុជាតិ
