អង្គការសម្ព័ន្ធដើម្បីវ៉ាក់សាំងជាសកល GAVI បានអះអាងថា ក្នុងកិច្ចព្រមព្រៀងជាមួយក្រុមហ៊ុនផលិតវ៉ាក់សាំងរបស់ចិនចំនួនពីរ ស៊ីណូហ្វ្រាម និង ស៊ីណូវ៉ាក់ ជាលើកដំបូងនេះ ក្រុមហ៊ុនស៊ីណូហ្វាមនឹងត្រូវផ្គត់ផ្គង់វ៉ាក់សាំងប្រមាណ ១៧០លានដូសដល់ Covax រីឯស៊ីណូវ៉ាក់ ត្រូវផ្គត់ផ្គង់ក្នុងចំនួន ៣៨០លានដូស ចាប់ពីពេលនេះរហូតដល់ពាក់កណ្តាលឆ្នាំ ២០២២។សេចក្តីប្រកាសព័ត៌មានដដែលបានបន្ថែមថា ស្របពេលវត្តមាននៃមេរោគកូវីដ-១៩បំប្លែងខ្លួន ឌែលកំពុងរាលដាលខ្លាំង ក្រុមហ៊ុនផលិតវ៉ាក់សាំងចិនទាំងពីរនេះ ត្រូវចាប់ផ្តើមផលិតវ៉ាក់សាំងភ្លាមៗក្នុងចំនួនដំបូង ប្រមាណ ១១០លានដូស សម្រាប់ប្រទេសជាសមាជិកនៃយន្តការ COVAX ទាំងអស់។ប៉ុន្តែបើតាមសេចក្តីប្រកាសរបស់ក្រុមហ៊ុនចិនផ្ទាល់ បានបញ្ជាក់ថា វ៉ាក់សាំងស៊ីណូហ្វាម ចំនួន ៦០ លានដូសនឹងត្រូវផ្តល់ឲ្យចាប់ពីខែកក្កដារហូតដល់ខែតុលាឆ្នាំនេះ ចំណែកវ៉ាក់សាំងស៊ីណូវ៉ាក់ចំនួន ៥០លានដូស នឹងត្រូវផ្តល់ឲ្យចាប់ពីខែកក្កដារហូតដល់ខែកញ្ញាឆ្នាំនេះដូចគ្នា។
យ៉ាងណាមិញ អង្គការសម្ព័ន្ធដើម្បីវ៉ាក់សាំងជាសកល GAVI មិនបានបញ្ជាក់លម្អិតថា ប្រទេសនឹងទទួលបានវ៉ាក់សាំងទាំងនេះខ្លះនោះទេ។លោក សិត បឺកខ្លី (Seth Berkley) នាយកប្រតិបត្តិរបស់ GAVI បានគូសបញ្ជាក់ថា ការត្រៀមដឹកជញ្ជូនវ៉ាក់សាំងនឹងរួយរាល់ក្នុងពេលឆាប់ៗនេះ ដូច្នេះបានន័យថា យើងក៏នឹងទទួលបានវ៉ាក់សាំងក្នុងពេលឆាប់ៗដូចគ្នា។គួរជម្រាបថា អង្គការសម្ព័ន្ធដើម្បីវ៉ាក់សាំងជាសកល GAVI ជាអង្គការមានតួនាទីដឹកដឹកនាំយុទ្ធនាការចែកចាយវ៉ាក់សាំងដល់ក្រុមប្រទេសក្រីក្រ ប្រកបដោយតម្លាភាព ក្រោមយន្តការឈ្មោះថា COVAX ដែលបង្កើតឡើងដោយអង្គការសុខភាពពិភពលោក។
អត្ថបទគួរអាន
GAVI មិនបានឆ្លើយតបនឹងអ្នកសារព័ត៌មាននោះទេ នៅពេលគេព្យាយាមសុំការយល់ឃើញពីប្រសិទ្ធភាពនៃវ៉ាក់សាំចិនទាំងពីរ។
យ៉ាងណាក៏ដោយចុះ វ៉ាក់សាំងទាំងពីរប្រភេទសរបស់ចិន គឺរួមមានស៊ីណូហ្វាម ត្រូវបានអង្គការសុខភាពពិភពលោកទទួលស្គាល់ឲ្យប្រើប្រាស់សម្រាប់ក្របខណ្ឌបន្ទាន់រួចហើយ កាលពីអំឡុងដើមខែឧសភា ជាមួយនឹងការអះអាងប្រសិទ្ធភាពក្នុងរង្វង់ ៧៩%សម្រាប់គ្រប់វ័យ។ រីឯ វ៉ាក់សាំងស៊ីណូវ៉ាក់វិញ ក៏ត្រូវបាន WHO ទទួលស្គាល់កាលពីដើមខែមិថុនាហើយដែរ ជាមួយនឹងការអះអាងប្រសិទ្ធភាព ការពារពីការឆ្លងកូវីដ១៩បាន៥១% និងការពារកុំឲ្យធ្លាក់ខ្លួនឈឺកម្រិតធ្ងន់បាន១០០%។ នេះបើតាមការអះអាងរបស់អង្គការសុខភាពពិភពលោក។
សូមបញ្ជាក់ថា គិតមកដល់ថ្ងៃច័ន្ទដើមសប្តាហ៍នេះ សម្ព័ន្ធវ៉ាក់សាំងជាសកល GAVIក្រោមយន្តការCOVAX បានផ្គត់ផ្គង់វ៉ាក់សាំងបង្ការកូវីដ-១៩បានចំនួនជាង ១០០លានដូសហើយ ទៅកាន់សមាជិកចំនួន ១៣៥ប្រទេស និង ដែនដី៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
