ឌូបៃ ជួបគ្រោះទឹកជំនន់យ៉ាងកម្រ ក្រោយជួបព្យុះភ្លៀងកំណាចបំផុតក្នុងពេលជាង៧ទសវត្សរ៍មកនេះ

អាកាសយានដ្ឋានអន្តរជាតិឌូបៃ ពេលនេះកំពុងជួបភាពវឹកវរយ៉ាងខ្លាំង ដោយជើងហោះហើររាប់រយត្រូវបានលុបចោល ហើយបានប្រកាសអាសន្នកុំឱ្យអ្នកដំណើរទៅកាន់ទីនោះដោយសារកំពុងមានទឹកជំនន់​។ កាលពីថ្ងៃពុធ ទី១៧ ខែមេសា ជើងហោះហើររហូតដល់ទៅប្រមាណ៣០០ជើង នៅអាកាសយានដ្ឋានអន្តរជាតិ ក្រុងឌូបៃ ដែលជាមជ្ឈមណ្ឌលដ៏សំខាន់មួយសម្រាប់ភ្ជាប់ជើងហោះហើរទៅកាន់គ្រប់ទ្វីបទាំងអស់ត្រូវបានលុបចោល ហើយជើងហោះហើររាប់រយផ្សេងទៀតត្រូវបានពន្យារពេល បន្ទាប់ពីជួបព្យុះភ្លៀងដ៏កំណាចមិនធ្លាប់មានក្នុងពេល៧៥ឆ្នាំមកនេះ កាលពីថ្ងៃអង្គារ ទី១៦ ខែមេសា។ នេះបើយោងតាមទិន្នន័យរបស់គេហទំព័រតាមដានជើងហោះហើរ Flight Aware។

អាកាសយានដ្ឋានអន្តរជាតិក្រុងឌូបៃ ដែលកាលពីឆ្នាំមុនទទួលបានអ្នកដំណើររហូតដល់ទៅជាង៨០លាននាក់បានព្រមានថា ខ្លួនអាចត្រូវការពេលវេលារាងយូរបន្តិចទម្រាំស្ដារស្ថានភាពមកប្រក្រតីឡើងវិញ​។ ទន្ទឹមនេះអាកាសយានដ្ឋានអន្តរជាតិ ក្រុងឌូបៃ បាននិយាយថា ខ្លួនបានជួបការលំបាកក្នុងការបញ្ជូនចំណីអាហារទៅឱ្យអ្នកដំណើរជាប់នៅលើផ្លូវក្បែរៗនោះ ដែលត្រូវបានកាត់ផ្ដាច់ដោយទឹកជំនន់។

សូមបញ្ជាក់ថា អាជ្ញាធរបានព្រមានថា យោងតាមការព្យាករឧតុនិយមបង្ហាញថា អាចនឹងមានព្យុះភ្លៀងដ៏កំណាចបន្ថែមទៀត ខណៈដែលតំបន់វាលទំនាបជាច្រើនត្រូវបានជន់លិចនៅឡើយ៕

ដោយ: តែម សុខុម