ផលិតកម្មរថយន្តអគ្គិសនី កំពុងប្រជែងគ្នានៅបណ្ដាប្រទេសក្នុងតំបន់អាស៊ាន

ក្រោយពេលថៃបង្ហើបពីការខិតខំប្រឹងប្រែងក្នុងការជំរុញ និងលើកទឹកចិត្តឲ្យវិនិយោគគិនពីអារ៉ាប់ប៊ីសាអូឌីតចូលមកក្នុងឧស្សាហកម្មផលិតរថយន្តអគ្គិសនីនៅក្នុងប្រទេសខ្លួន សារព័ត៌មាននានានៅក្នុងតំបន់បានរាយការណ៍ជាបន្តបន្ទាប់ថា ប្រទេសវៀតណាម ឥណ្ឌូនេស៊ី និងម៉ាឡេស៊ីកំពុងខិតខំប្រឹងប្រែងយ៉ាងសកម្មនៅក្នុងទីផ្សាវិនិយោគ ដើម្បីជំរុញឲ្យតំបន់អាស៊ីអាគ្នេយ៍ក្លាយជាមជ្ឈមណ្ឌលផលិតកម្មរថយន្តអគ្គិសនីមួយនៅលើពិភពលោក។

បើតាមការចុះផ្សាយរបស់សារព័ត៌មាន Vietnam News ក្រុមហ៊ុនផលិតរថយន្តអគ្គិសនីដំបូងរបស់វៀតណាម VinFast គ្រោងនឹងសាងសង់រោងចក្រមួយ ដែលមានទំហំទុនវិនិយោគជិត ១៩ទ្រីលានរូពី ឫប្រមាណជា១ពាន់២រយលានដុល្លារនៅក្នុងប្រទេសឥណ្ឌូនេស៊ី។ VinFast ដែលត្រូវបានគេស្គាល់ថា ជាក្រុមហ៊ុនផលិតរថយន្តអគ្គិសនីដ៏ធំជាងគេមួយនៅអាស៊ីអាគ្នេយ៍ ដែលកំពុងនាំចេញទៅកាន់អឺរ៉ុប និងអាម៉េរិក នឹងចាប់ផ្តើមសាងសង់រោងចក្រផលិតរថយន្តអគ្គីសនីឱ្យបានឆាប់តាមដែលអាចធ្វើទៅបាន។

ដោយឡែកបើតាមសេចក្តីរាយការណ៍របស់សារព័ត៌មាន Nikkei ក្រុមហ៊ុនផលិតរថយន្តប្រូតុង ហូលឌីង (Proton Holding) បានអូសទាញក្រុមហ៊ុនផលិតរថយន្តចិន Geely ដើម្បីរួមគ្នាបណ្តាក់ទុននៅក្នុងឧស្សាហកម្មផលិតរថយន្តអគ្គិសនីនៅម៉ាឡេស៊ី ដែលមានទំហំវិនិយោគចំនួន១០ពាន់លានដុល្លារ។ តាមកិច្ចព្រមព្រៀង ក្រុមហ៊ុនរថយន្ត Geely របស់ចិន គឺបានកាន់កាប់ភាគហ៊ុនសរុប៤៩,៩ភាគរយនៅក្រុមហ៊ុន Proton។

លោក លី ស៊ូហ្វូ (Li Shufu) ប្រធានក្រុមហ៊ុនរថយន្ត Geely ទើបតែបញ្ចេញនូវផែនការវិនិយោគលើរថយន្តអគ្គិសនីនៅក្រៅប្រទេសចិន កាលពីខែមុនប៉ុណ្ណោះ ខណៈដែលក្រុមហ៊ុន កំពុងតែកាន់កាប់លើផលិតកម្មរថយន្តអគ្គិសនីក្រោមយីហោមួយចំនួនដូចជា Volvo និង Polestar ជាដើម។ លោក មានទំនុកចិត្តខ្ពស់លើទស្សនវិស័យទីផ្សារនៅបណ្តាប្រទេសអាស៊ីអាគ្នេយ៍ ហើយលោកនឹងរួមគ្នាកសាងសមាហរណកម្មសេដ្ឋកិច្ចក្នុងតំបន់តាមរយៈការអភិវឌ្ឍន៍ប្រកបដោយគុណភាពខ្ពស់។

លោកបានបន្តថា គោលដៅរបស់ Geely គឺដើម្បីធ្វើឲ្យ Proton ទៅជាម៉ាកយីហោរថយន្តកំពូលទាំងបីនៅអាស៊ីអាគ្នេយ៍ ហើយរថយន្តអគ្គិសនី គឺជាគម្រោងផលិតកម្ម ដែលមិនអាចខ្វះបានចំពោះគោលដៅនោះ ខណៈបច្ចុប្បន្នក្រុមហ៊ុនកំពុងធ្វើការលើការបណ្តុះបណ្តាលធនធានមនុស្ស៥ពាន់នាក់នៅក្នុងវិស័យរថយន្តថាមពលថ្មីក្នុងរយៈពេល៥ឆ្នាំ៕

ដោយៈ សរ សុជាតិ