កត្តានេះបានធ្វើឲ្យអ្នកជំនាញជំរុញឲ្យអ្នកវិនិយោគក្នុងវិស័យនេះត្រូវបង្កើនការប្រុងប្រយ័ត្នឲ្យបានខ្ពស់សម្រាប់ការបោះទុនវិនិយោគក្នុងវិស័យនេះនាពេលខាងមុខ។
អ្នកឧកញ៉ា លាង ម៉េង សហស្ថាបនិក និងជាប្រធានអគ្គនាយកក្រុមហ៊ុន ជីប ម៉ុង គ្រុប ដែលជាអ្នកវិនិយោគនៅក្នុងវិស័យសណ្ឋាគារនៅកម្ពុជាបានវាយតម្លៃថា ទីផ្សារសណ្ឋាគារនៅកម្ពុជានឹងអាចឈានទៅរកការផ្គត់ផ្គង់លើសតម្រូវការក្នុងរយៈពេលពី៤ទៅ៥ឆ្នាំខាងមុខនេះ។ ការវាយតម្លៃបែបនេះ ក៏ដោយសារតែអ្នកឧកញ៉ាសង្កេតឃើញថាតម្រូវការប្រើប្រាស់បន្ទប់សណ្ឋាគារលំដាប់អន្តរជាតិបច្ចុប្បន្នមានមិនដល់៥០% ផងនៃសណ្ឋាគារសរុបនៅកម្ពុជា។ កត្តានេះហើយវាបានធ្វើឲ្យអ្នកជំនួញដ៏ល្បីល្បាញរូបនេះស្នើឲ្យអ្នកវិនិយោគទាំងអស់ត្រូវបង្កើនការប្រុងប្រយ័ត្នលើការវិនិយោគក្នុងវិស័យសណ្ឋាគារនាពេលបច្ចុប្បន្ននិងទៅថ្ងៃអនាគត។ សម្រាប់អ្នកឧកញ៉ា លាង ម៉េង ដែលចង់ក្លាយជាចលករដ៏សំខាន់មួយក្នុងការជួយជំរុញកំណើនសេដ្ឋកិច្ចជាតិ មិនចង់ឃើញអ្នកវិនិយោគនៅកម្ពុជាវិនិយោគលើវិស័យអ្វីជាន់គ្នាច្រើនពេកនោះទេ។
អត្ថបទគួរអាន
បើតាមរបាយការណ៍របស់ក្រសួងទេសចរណ៍គិតត្រឹមដំណាច់ឆ្នាំ២០២២ កម្ពុជាមានសណ្ឋាគារសរុបប្រមាណ៧០០សណ្ឋាគារ និងមានបន្ទប់ជាង២ម៉ឺនបន្ទប់។ ក្នុងចំណោមសណ្ឋាគារទាំងនេះមានសណ្ឋាគារលំដាប់អន្តរជាតិជាង១៣០សណ្ឋាគារ ក្នុងនោះប្រមាណ៥០សណ្ឋាគារជាប្រេនឆាយរបស់អន្តរជាតិ និងជាង៨០សណ្ឋាគារជាសណ្ឋាគារលំដាប់ផ្កាយ៥ និងផ្កាយ៤ជាដើម ដែលត្រូវបានវាយតម្លៃគុណភាពដោយក្រសួងទេសចរណ៍ និងស្ថាប័នអន្តរជាតិ។ វិស័យសណ្ឋាគារត្រូវបានចាត់ទុកជាវិស័យមួយ ដែលបានរងផលប៉ះពាល់ខ្លាំងដោយសារវិបត្តិកូវីដ-១៩ ព្រោះមានសណ្ឋាគារមួយចំនួនបានផ្អាក ឬបិទអាជីវកម្មរបស់ខ្លួន ដោយសារខ្សត់ភ្ញៀវទេសចរ។
ជាក់ស្តែងក្នុងចំណោមសណ្ឋាគារលំដាប់អន្តរជាតិខាងលើមានសណ្ឋាគារជាង៥០សណ្ឋាគារបានផ្អាកអាជីវកម្មក្នុងអំឡុងវិបត្តិកូវីដ-១៩។ តែយ៉ាងណាមកទល់ពេលនេះសណ្ឋាគារទាំងនោះបានបើកដំណើរការឡើងវិញស្ទើរ១០០%ហើយ ក្រោយស្ថានភាពការឆ្លងរាលដាល់នៃជំងឺកូវីដ-១៩ នៅកម្ពុជា ក៏ដូចជាលើពិភពលោកមានភាពធូរស្បើយ។ យ៉ាងណាក៏ដោយវិស័យនេះនៅតែបន្តស្ថិតក្នុងភាពមិនច្បាស់លាស់នៃការងើបមករកប្រក្រតីភាពឡើងវិញ ដោយសារបច្ចុប្បន្នទាំងសេដ្ឋកិច្ចកម្ពុជា និងសកលលោកបន្តស្ថិតក្នុងភាពមិនប្រាកដប្រជា ដោយបង្កឡើងដោយវិបត្តិសង្គ្រាមនៅអ៊ុយក្រែន វិបត្តិអតិផរណា ការធ្លាក់ចុះខ្សែចង្វាក់ផ្គត់ផ្គង់សកល និងភាពតានតឹងពាណិជ្ជកម្មរវាងអាមេរិក និងចិនជាដើម។
បើតាមការគូសបញ្ជាក់របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ កម្ពុជាទទួលបានភ្ញៀវទេសចរអន្តរជាតិជាង៣លាននាក់នៅ៧ខែឆ្នាំនេះ ដែលធ្វើឲ្យឯកឧត្តមរំពឹងទទួលបានភ្ញៀវទេសចរអន្តរជាតិ៥លាននាក់នៅពេញមួយឆ្នាំ២០២៣ នេះ៕
