ក្រុមហ៊ុនសារព័ត៌មាន ហ្វកស៍ ញូស៍ (Fox News) កាលពីថ្ងៃអង្គារ បានយល់ព្រមបង់ប្រាក់ឱ្យក្រុមហ៊ុន ដូមីនៀន (Dominion) ក្នុងទំហំទឹកប្រាក់ $787 លានដុល្លារ ដើម្បីបញ្ចៀសការជុំនំជម្រះតាមផ្លូវតុលាការលើពាក្យបណ្តឹងរបស់ក្រុមហ៊ុនផលិតសម្ភារៈបម្រើឱ្យការបោះឆ្នោតនៅសហរដ្ឋអាមេរិកនេះ។
ការទូទាត់ដ៏គួរឱ្យភ្ញាក់ផ្អើលនេះបានលេចចេញមក ខណៈដែលគេរំពឹងថានឹងមានសេចក្តីថ្លែងការណ៍ជាសាធារណៈពីភាគីទាំងសងខាង ក្នុងសវនាការមួយ នៅតុលាការនៃរដ្ឋ ឌីឡាវ៉ា (Delaware) ជាហេតុធ្វើឱ្យរឿងក្ដីបរិហារកេរ្តិ៍បញ្ចប់ភ្លាមៗ។ មុននេះ វាបានធ្វើឱ្យ ហ្វកស៍ ញូស៍ រងភាពអាម៉ាស់អស់រយៈពេលជាច្រើនខែ ហើយអាចតម្រូវឱ្យស្ថាបនិកបណ្ដាញសារព័តមាន ហ្វកស៍ ញូស៍ គឺលោក រូពើ មើដុក (Rupert Murdoch) ក៏ដូចជាលោក ថាក់ឃើ ខាលសុន (Tucker Carlson) និងលោក ស៊ាន ហានីធី (Sean Hannity) ដែលជាអ្នកអធិប្បាយដ៏ល្បីនៅសារព័ត៌មាននេះ ឡើងផ្តល់សក្ខីកម្មជាសាធារណៈទៀតផង។
អត្ថបទគួរអាន
បន្ទាប់ពីចៅក្រម ឈ្មោះ អេរិក ដេវីស (Eric Davis) បានប្រកាសអំពីកិច្ចព្រមព្រៀងខាងលើរួច មេធាវីរបស់ក្រុមហ៊ុន ដូមីនៀន គឺលោក ចាស្ទីន ណេលសុន (Justin Nelson) បានប្រាប់អ្នកសារព័ត៌មាននៅខាងក្រៅបន្ទប់តុលាការថា៖ «សច្ចភាពពិតជាសំខាន់ណាស់។ ការកុហកបង្កផលវិបាក»។
ក្រុមហ៊ុនសារព័ត៌មាន ហ្វកស៍ ញូស៍ បាននិយាយថា៖ «យើងសង្ឃឹមថា ការសម្រេចចិត្តរបស់យើង ក្នុងការដោះស្រាយជម្លោះនេះ ជាមួយក្រុមហ៊ុន ដូមីនៀន ជាលក្ខណៈមិត្តភាព, ជំនួសឱ្យការកាត់សេចក្ដីដែលធ្វើឱ្យបែកបាក់គ្នា, នឹងអនុញ្ញាតឱ្យប្រទេសនេះដើរឆ្ពោះទៅមុខ ចេញពីបញ្ហាទាំងនេះ»។
ការទូទាត់នេះគឺជាចំនួនប្រាក់ដ៏ច្រើនសន្ធឹកសន្ធាប់ សូម្បីតែចំពោះក្រុមហ៊ុនដ៏ធំដូច ហ្វកស៍ នេះ។ សំណងចំនួន ៧៨៧,៥ លានដុល្លារ គឺប្រហែល ១ ភាគ ៤ នៃទឹកប្រាក់ ២,៩៦ ពាន់លានដុល្លារ ដែលក្រុមហ៊ុនសារព័ត៌មាននេះ រកបានជារួមកាលពីឆ្នាំមុន។
គួរបញ្ជាក់ថា ក្រុមហ៊ុន ដូមីនៀន បានប្តឹង ហ្វកស៍ ញូស៍ ទាមទារសំណង ១,៦ ពាន់លានដុល្លារ ដោយលើកហេតុផលថា បណ្តាញសារព័ត៌មានកំពូលនៅអាមេរិកនេះ បានធ្វើឱ្យខូចកេរ្តិ៍ឈ្មោះរបស់ក្រុមហ៊ុន តាមរយៈការផ្សព្វផ្សាយការចោទប្រកាន់ដែលថាមានការក្លែងបន្លំលទ្ធផលបោះឆ្នោតដោយឧបករណ៍របស់ក្រុមហ៊ុន ទើបបណ្ដាលឱ្យលោក ដូណាល ត្រាំ ចាញ់ឆ្នោតលោក ចូ បៃដិន៕
