ក្រុមហ៊ុនផលិតរថយន្តជប៉ុន បានឱ្យដឹងកាលពីថ្ងៃព្រហស្បតិ៍ថា ក្រុមហ៊ុន Honda Motor នឹងបិទរោងចក្រ Accord Sedan ក្នុងប្រទេសចិន ដើម្បីផ្តោតកម្លាំងផលិត និងពង្រឹងបច្ចេកវិទ្យាលើផលិតកម្មរថយន្តអគ្គិសនី ចំពេលមានការប្រកួតប្រជែងខ្លាំងជាមួយនឹងក្រុមហ៊ុននៅក្នុងស្រុកផ្សេងៗទៀត។ ក្រុមហ៊ុន Honda នឹងបិទប្រតិបត្តិការរោងចក្រផលិតរថយន្តម៉ូដែលនេះ នៅក្នុងប្រទេសចិន ចាប់ពីខែតុលា ខាងមុខតទៅ ខណៈដែលគេដឹងថា ប្រតិបត្តិការផលិតរថយន្តរបស់ក្រុមហ៊ុននេះ អាចផលិតរថយន្តម៉ូដែល Accord Sedan បានចំនួន៥ម៉ឺនគ្រឿង នៅក្នុងមួយឆ្នាំ។
ដោយឡែក កិច្ចសហការលើផលិតកម្មរថយន្តជាមួយនឹងក្រុមហ៊ុនផ្សេងទៀត ដូចជា ក្រុមហ៊ុនផលិតរថយន្តរបស់រដ្ឋចិន គឺក្រុមហ៊ុន Guangzhou Automobile Group និង ក្រុមហ៊ុន Dongfeng ដែលមានកម្លាំងផលិត២៤ម៉ឺនគ្រឿងក្នុងមួយឆ្នាំ ក៏នឹងផ្អាកផលិតកម្មនៅខែវិច្ឆិកា ខាងមុខផងដែរ។
អ្នកនាំពាក្យរបស់ក្រុមហ៊ុននេះ បាននិយាយថា ការបិទរបស់ក្រុមហ៊ុន Honda នឹងធ្វើឲ្យផលិតកម្មរថយន្តរបស់ចិន ធ្លាក់ចុះពីជិត១,៥លានគ្រឿង មកត្រឹម១,២លានគ្រឿង នៅក្នុងមួយឆ្នាំ។ នេះគឺជានិន្នាការថ្មីមួយនៃទីផ្សារថយន្តជប៉ុន នៅក្នុងប្រទេសចិន បន្ទាប់ពីក្រុមហ៊ុន Nissan បានបង្ហើបអំពីព័ត៌មានប្រហាក់ប្រហែលនេះកាលពីពេលថ្មីៗកន្លងទៅ។
ទោះបីជាក្រុមហ៊ុន Honda បិទផលិតកម្មរោងចក្រផលិតរថយន្តរបស់ខ្លួន ប៉ុន្តែក្រុមហ៊ុននៅតែមានគម្រោងបន្តជាមួយនឹងដៃគូនៅក្នុងប្រទេសចិន តាមរយៈការពង្រឹង និងជំរុញផលិតកម្មរថយន្តអគ្គិសនី ដែលមានបច្ចេកវិទ្យាខ្ពស់ដើម្បីប្រជែងនឹងទីផ្សារ។
ក្រុមហ៊ុននេះ បានសន្យាថា នឹងពង្រឹងផលិតកម្មផលិតផលថ្មី ដែលនឹងដំណើរការដោយរោងចក្រផលិតកម្មរថយន្តអគ្គិសនី ដែលកំពុងសាងសង់ក្រោមកិច្ចសហការជាមួយនឹងក្រុមហ៊ុន Guangzhou Automobile Group និងក្រុមហ៊ុន Dongfeng ហើយគ្រោងនឹងចាប់ផ្តើមផលិតនៅរោងចក្រថ្មីទាំងពីរនៅចុងឆ្នាំនេះ៕
ដោយៈ សរ សុជាតិ
