ដោយសារតែសេដ្ឋកិច្ចធ្លាក់ នៅប្រទេសថៃ ផ្ទះថ្មីលក់មិនសូវចេញ ប៉ុន្ដែផ្ទះប្រើរួចបែរជាមានទីផ្សារ

លោក វីឆ័យ វីរក្សកាផាន់ ( Vichai Viratkapan ) អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យថៃនេះបាននិយាយថា ទីផ្សារផ្ទះ និងខុនដូ ដែលប្រើប្រាស់រួចកំពុងមើលឃើញកំណើនទាំងការផ្គត់ផ្គង់ និងតម្រូវការ ដ្បិតផ្ទះទាំងនេះ មានតម្លៃសមរម្យជាង បើធៀបនឹងគម្រោងផ្ទះថ្មីៗ ដែលកំពុងជួបប្រឈមនឹងសេដ្ឋកិច្ចធ្លាក់ចុះ និងអត្រាការប្រាក់កើនខ្ពស់។

ពាក់ព័ន្ធនឹងស្ថានភាពនេះសារព័ត៌មានថៃ បានរាយការណ៍ថា ផ្នែកផ្គត់ផ្គង់កំពុងត្រូវបានជំរុញដោយការកើនឡើងនៃចំនួនអចលនទ្រព្យជាលំនៅដែលប្រើប្រាស់រួច ដ្បិតថា មានស្ថាប័នហិរញ្ញវត្ថុ និងក្រុមហ៊ុនគ្រប់គ្រងទ្រព្យសកម្មមួយចំនួន បានប្រមូលសម្បត្តិអចលនទ្រព្យទាំងនោះ ពីក្រុមអតិថិជន ដែលមានបញ្ហាផ្នែកឥណទាន។

លោក វីឆ័យ បានឲ្យដឹងថា ស្ថានភាពនេះវាបានលេចចេញ ចំពេលដែលសេដ្ឋកិច្ចថៃ កំពុងតែមានស្ថានភាពធ្លាក់ចុះ ។លោកបានអះអាងថា ស្ថានភាពនៅពេលបច្ចុប្បន្ននេះ គឺកំពុងតែកាត់បន្ថយអំណាចនៃការបញ្ជាទិញគម្រោងអចលនទ្រព្យជាលំនៅឋាន និងខុនដូនៅតាមគម្រោងថ្មីៗ ពីព្រោះអ្នកទិញចង់បានកន្លែងស្នាក់នៅដែលមានតម្លៃសមរម្យ។

អ្នកជំនាញរូបនេះបាននិយាយថា នៅពេលនេះពលរដ្ឋថៃ ភាគច្រើនកំពុងស្វែងរកលំនៅឋានដែលប្រើប្រាស់រួច ក្នុងតម្លៃទាប ពោលគឺនៅក្នុងរង្វង់តម្លៃ ប្រមាណជា ខ្ទង់ជាង ៤៣ ០០០ ដុល្លារ ឬទាបជាងនេះ ។

លោកបានបន្តថា ក្រៅពីអ្នកទិញជនជាតិថៃ ហើយនោះ អ្នកទិញបរទេសជាច្រើនក៏បានកំពុងតែស្វែងរកលំនៅឋាន ដែលប្រើប្រាស់ហើយនៅក្នុងតំបន់ទីក្រុងដែរ ដោយសារតែពួកគេគិតថា លំនៅស្ថានបែបនេះ គឺអាចរកទិញបានធំទូលាយ ហើយទីតាំងក៏ប្រសើរជាងគម្រោងថ្មីៗ ។

ក្នុងអំឡុងពេល៩ខែដំបូងនៃឆ្នាំ ២០២៣ សមាមាត្រនៃខុនដូមានការប្រើប្រាស់រួច ដែលបានផ្ទេរទៅឱ្យអ្នកទិញបរទេសបានកើនឡើងដល់ ៤០%។ ហើយប្រភពផ្គត់ផ្គង់គម្រោងប្រភេទនេះ ភាគច្រើន ត្រូវបានគេដឹងថា គឺបានលក់ដោយស្ថាប័នហិរញ្ញវត្ថុ និង ក្រុមហ៊ុនគ្រប់គ្រងទ្រព្យសម្បត្តិ ខណៈដែល តម្លៃនៃខុនដូទាំងនោះ គឺមានទំហំពី ៣១ ទៅ៥០ ម៉ែត្រការ៉េ រីឯតម្លៃវិញគឺនៅក្នុងរង្វង់ពី ៨៧ ០០០ដុល្លារ ទៅ ១៤ម៉ឺន៥ពាន់ដុល្លារ៕

ដោយៈ សរ សុជាតិ