យ៉ាងណាមិញអ្នកជំនាញ ដែលធ្វើការងារជាមួយអ្នករកស៊ីក្នុងសេដ្ឋកិច្ចកក្រៅប្រព័ន្ធបានជំរុញឱ្យរាជរដ្ឋាភិបាលគួររៀបចំយន្តការបណ្ដុះបណ្ដាលអ្នករកស៊ីក្នុងសេដ្ឋកិច្ចក្រៅប្រព័ន្ធឱ្យមានជំនាញច្បាស់លាស់ ដើម្បីឱ្យពួកគេប្រកបរបរតាមស្តង់ដា។
លោក វន់ ពៅ ប្រធានសមាគមប្រជាធិបតេយ្យឯកជ្យ នៃសេដ្ឋកិច្ចក្រៅប្រព័ន្ធ (IDEA) បានចាត់ទុកការសម្រេចផ្អាកការស្នើសុំច្បាប់អនុញ្ញាតប្រកបអាជីវកម្មរបស់រដ្ឋាភិបាលថា ជារឿងល្អ ដ្បិតការណ៍នេះបានរួមចំណែកមួយផ្នែកក្នុងការជួយប្រជាពលរដ្ឋ ដែលរកស៊ីក្នុងសេដ្ឋកិច្ចក្រៅប្រព័ន្ធ ដែលកំពុងជួបបញ្ហាការធ្លាក់ចុះប្រាក់ចំណូល ហើយវាក៏ជាការជួយលុបបំបាត់ក្តីបារម្ភចំពោះការបង់ពន្ធសម្រាប់ពួកគេផងដែរ។
យ៉ាងណាក៏ដោយ អ្នកដែលធ្វើការជាមួយអ្នករកស៊ីក្នុងសេដ្ឋកិច្ចក្រៅប្រព័ន្ធរូបនេះ បានជំរុញឲ្យរដ្ឋាភិបាលគួររៀបចំឲ្យមានយន្តការបណ្ដុះបណ្ដាលអ្នកប្រកបអាជីវកម្មក្នុងសេដ្ឋកិច្ចក្រៅប្រព័ន្ធឱ្យមានជំនាញច្បាស់លាស់ ដើម្បីអាចឱ្យពួកគេឈានទៅប្រកបរបរតាមស្តង់ដា ជាពិសេសគួរមានយន្តការផ្ដល់ឥណទានជាអត្រាការប្រាក់ទាប ឬគ្មានការប្រាក់ ដើម្បីពង្រឹង និងពង្រីកអាជីវកម្ម។ បន្ថែមលើរាជរដ្ឋាភិបាលក៏គួរគិតគូលើការពន្យាពេលសងបំណុលធនាគារ ដែលអ្នកប្រកបរបរសេដ្ឋកិច្ចក្រៅប្រព័ន្ធបានជំពាក់ ក៏ដូចជាការទប់ស្កាត់ជនបរទេស ដែលដណ្ដើមការងាររបស់ពលរដ្ឋផងដែរ។
ស្រដៀងគ្នានេះដែរលោកជំទាវឧកញ៉ា កែវ មុំ ប្រធានសភាមុខរបរ និងមីក្រូសហគ្រាសកម្ពុជាយល់ឃើញថា ដើម្បីឱ្យអ្នករកស៊ីក្រៅប្រព័ន្ធចូលក្នុងប្រព័ន្ធ គឺត្រូវតែមានផែនការយុទ្ធសាស្ត្រជួយដល់ពួកគេ ដូចជា បង្កើតឲ្យមានច្រកចេញចូលតែមួយនៅកន្លែងណាមួយ ដែលងាយស្រួលសម្រាប់ពួកគេអាចទទួលបានព័ត៌មានលឿន, មានយុទ្ធសាស្ត្រក្នុងការជួយពង្រឹងសមត្ថភាពរបស់ពួកគេ, ជួយដោះស្រាយបញ្ហាដែលពួកគេជួបប្រទះ, តម្លៃចុះបញ្ជីឱ្យសមស្រប ដែលអាចទទួលយកបាន និងពេលវេលានៃការចុះបញ្ជីឱ្យបានតាមកាលកំណត់ជាដើម។
អត្ថបទគួរអាន
ជុំវិញបញ្ហានេះដែរ ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានមានប្រសាសន៍ថា រាជរដ្ឋាភិបាលនីតិកាលទី៧ នៅតែមានគោលនយោបាយ សម្រាប់ជួយដល់អ្នកប្រកបរបរសេដ្ឋកិច្ចក្រៅប្រព័ន្ធ ហើយគោលនយោបាយដែលបានដាក់ចេញ ក៏មិនមែនជាការដាក់បន្ទុកដល់អ្នកប្រកបរបរសេដ្ឋកិច្ចក្រៅប្រព័ន្ធនោះដែរ តែជាការជួយបណ្ដុះបណ្ដាល និងជួយពង្រឹងមុខរបរ និងអាជីវកម្មរបស់ពួកគេទៅវិញទេ។
គួរបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានសម្រេចផ្អាកការផ្តល់សេវារដ្ឋបាលមួយចំនួនរបស់រដ្ឋបាលក្រុង ស្រុក ខណ្ឌ ពាក់ព័ន្ធនឹងការបំពេញបែបបទធ្វើអាជីវកម្ម បន្ទាប់ពីរាជរដ្ឋាភិបាលសង្កេតឃើញថា ការតម្រូវឱ្យស្នើសុំច្បាប់អនុញ្ញាតប្រកបអាជីវកម្ម និងបន្តសុពលភាពអាជីវកម្មនៅការិយាល័យច្រកចេញ-ចូលតែមួយ នៃរដ្ឋបាលក្រុង ស្រុក ខណ្ឌ បានបង្កឱ្យមានការព្រួយបារម្ភក្នុងចំណោមប្រជាពលរដ្ឋ ដែលកំពុងប្រកបអាជីវកម្ម, ការងារ និងមុខរបរនៅក្នុងសេដ្ឋកិច្ចក្រៅប្រព័ន្ធ។
យ៉ាងណាក៏ដោយសម្តេចធិបតី ហ៊ុន ម៉ាណែត អះអាងថា រាជរដ្ឋាភិបាលមានការចិត្តទុក និងផ្តល់អាទិភាពខ្ពស់ចំពោះពលរដ្ឋ ដែលប្រកបអាជីវកម្មក្នុងសេដ្ឋកិច្ចក្រៅប្រព័ន្ធ តាយរយៈការ កំពុងរៀបចំយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ ដែលនឹងត្រូវឱ្យអនុវត្តក្នុងពេលឆាប់ៗខាងមុខ ដើម្បីបង្កលក្ខណៈងាយស្រួល, ព្រមទាំងផ្តល់ប្រយោជន៍, ថែបំប៉ន និងលើកកម្ពស់ការយល់ដឹងដល់អ្នកប្រកបអាជីវកម្ម មុខរបរ និងការងារដែលស្ថិតនៅក្នុងសេដ្ឋកិច្ចក្រៅប្រព័ន្ធ៕
អត្ថបទ ៖ បូ ដូឡា
