ការចំណាយរបស់ពិភពលោកលើបច្ចេកវិទ្យាព័ត៌មាន ឬ IT នឹងកើនឡើងដល់៥ទ្រីលានដុល្លារអាម៉េរិក

តាមរយៈសេចក្តីថ្លែងការណ៍ចេញផ្សាយកាលពីថ្ងៃពុធ សប្តាហ៍មុន ក្រុមហ៊ុនស្រាវជ្រាវ និងប្រឹក្សាយោបល់បច្ចេកវិទ្យាអាម៉េរិក ហ្គាតន័រ អ៊ីង (Gartner Inc) បាននិយាយថា ការចំណាយលើបច្ចេកវិទ្យាព័ត៌មាន ឬ IT នៅទូទាំងពិភពលោកត្រូវបានរំពឹងថា នឹងកើនឡើង៦,៨% នៅក្នុងឆ្នាំនេះ បើធៀបនឹងឆ្នាំមុន ហើយអត្រានេះ គឺទាបជាងការព្យាករកំណើន៨% សម្រាប់ឆ្នាំនេះ ដែលត្រូវបានធ្វើឡើងក្នុងត្រីមាសចុងឆ្នាំមុន។

ក្រុមហ៊ុននេះបានបន្ថែមថា ខណៈដែលបច្ចេកវិទ្យាបញ្ញាសិប្បនិមិត្តជំនាន់ថ្មី Generative AI បានលេចចេញឡើងនៅក្នុងឆ្នាំ២០២៣ កំណើននៃការចំណាយលើបច្ចេកវិទ្យាព័ត៌មាន ឬ IT នឹងមិនប្រែប្រួលខ្លាំងនោះទេក្នុងរយៈពេលដ៏ខ្លីខាងមុខ។

លោក ចន ដេវីដ ឡឺបឡក់ (John-David Lovelock) អនុប្រធានផ្នែកស្រាវជ្រាវនៅក្រុមហ៊ុនហ្គាតន័រ (Gartner) និងជាអ្នកវិភាគបាននិយាយថា ខណៈដែលបច្ចេកវិទ្យា Generative AI នឹងផ្លាស់ប្តូរអ្វីៗគ្រប់យ៉ាងហើយនោះ វានឹងមិនបង្កផលប៉ះពាល់ខ្លាំងដល់ការចំណាយលើបច្ចេកវិទ្យាព័ត៌មាន ឬ IT នោះទេ។ ក្រុមហ៊ុនហ្គាតន័រ (Gartner) បាននិយាយថា សេវាកម្មបច្ចេកវិទ្យាព័ត៌មាន ឬ IT នឹងបន្តកើនឡើងក្នុងឆ្នាំ២០២៤ នេះ ដែលនឹងធ្វើឱ្យការចំណាយលើ IT មានចំណែកធំបំផុតជាលើកដំបូងមិនធ្លាប់មាន ហើយរំពឹងថា ការចំណាយលើ IT នឹងកើនឡើងដល់៨,៧%ក្នុងឆ្នាំ២០២៤ នេះឈានរហូតដល់១,៥ទ្រីលានដុល្លារ។

ក្រុមហ៊ុននេះនិយាយថា កំណើនលើសេវាកម្មបច្ចេកវិទ្យា IT នេះ ភាគច្រើនគឺដោយសារតែសហគ្រាសនានាវិនិយោគលើប្រសិទ្ធភាពរបស់ស្ថាប័ន និងគម្រោងបង្កើនប្រសិទ្ធភាពរបស់ពួកគេ ហើយការវិនិយោគទាំងនេះនឹងមានសារៈសំខាន់ ស្របពេលសេដ្ឋកិច្ចបច្ចុប្បន្នស្ថិតក្នុងស្ថានភាពមិនប្រាកដប្រជា៕​​​

អត្ថបទ៖ សុខ ជា