សម្តេច ហ៊ុន ម៉ាណែត ស្នើឱ្យក្រសួងស្ថាប័នរដ្ឋ កុំចាត់ទុកការងារអធិការកិច្ចជាការងារចុះចាប់

បើតាមការអះអាងរបស់សម្តេចធិបតី ការធ្វើអធិការកិច្ច គឺការតាមដានត្រួតពិនិត្យ និងផ្ដល់យោបល់ ក៏ដូចជាឆ្លុះបញ្ចាំងពីគុណសម្បត្តិ និងគុណវិបត្តិ ដើម្បីពង្រឹងប្រសិទ្ធភាពការងារប៉ុណ្ណោះ។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ស្នើឱ្យគ្រប់ក្រសួងស្ថាប័ន-រដ្ឋ កុំចាត់ទុកការងារអភិបាលកិច្ច គឺជាការងារចុះចាប់ឱ្យសោះ ដោយត្រូវគិតថា គឺជាដៃគូពង្រឹងការអនុវត្តការងារ ជួយតាមដានត្រួតពិនិត្យ និងផ្ដល់យោបល់ជាដើម ដ្បិតថា ការងារអធិការកិច្ច គឺជាការជួយដល់ការអនុវត្តអភិក្រមចំនួន៤ ដែលរាជរដ្ឋាភិបាលបានដាក់ចេញរួមមានឆ្លុះកញ្ចក់ ងូតទឹក ដុះក្អែល និងព្យាបាល មិនមានការអនុវត្តនូវអភិក្រមទី៥ ដែលជាការវះកាត់នោះទេ។ ការលើកឡើងបែបនេះរបស់សម្តេចធិបតីធ្វើឡើងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងអធិការកិច្ច នាថ្ងៃទី១៣ ខែកុម្ភៈ ឆ្នាំ២០២៤។

ដើម្បីពង្រឹងការអនុវត្តលើកិច្ចការងារអធិការកិច្ចឱ្យកាន់តែមានប្រសិទ្ធភាព សម្តេចធិបតី ហ៊ុន ម៉ាណែត ជំរុញឱ្យក្រសួងអធិការកិច្ចត្រូវយកចិត្តទុកដាក់លើការអភិវឌ្ឍធនធានមនុស្ស រៀបចំយន្តការនិងរបៀបរបបធ្វើការងារ និងបទដ្ឋានគតិយុត្តិ។ សម្រាប់សម្តេចធិបតី អ្នកចុះធ្វើអធិការកិច្ចគេគឺទាមទារឱ្យមានសមត្ថភាពខ្លាំងពូកែ តែបើអ្នកចុះធ្វើអធិការកិច្ចគេពុំមានសមត្ថភាព នោះអាចធ្វើឱ្យមានការវាយតម្លៃខុស និងធ្វើឱ្យប៉ះពាល់ដល់ប្រសិទ្ធភាពការងារ។

សូមជម្រាបថា ការងារសំខាន់ៗ របស់ក្រសួងអធិការកិច្ចមាន៣ចំណុច រួមមានការងារអធិការកិច្ច, ទទួលបេសកកម្មពីរាជរដ្ឋាភិបាល តាមដានការអនុវត្តច្បាប់ គឺការត្រួតពិនិត្យអនុលោមភាពនៃច្បាប់ និងបទដ្ឋានគតិយុត្តិ ដែលមានជាធរមាននៅកម្ពុជា និងការទទួលខុសត្រូវលើការទទួលពាក្យបណ្តឹង អង្កេត និងស្រាវជ្រាវ ទទួលពីប្រជាពលរដ្ឋ និងមានសមត្ថកិច្ចបើកការស្រាវជ្រាវ និងស៊ីបអង្កេតរាប់តាំងពីរូបវ័ន្តបុគ្គល និងនីតិបុគ្គល ដែលដើមបណ្តឹងបានប្តឹងទៅក្រសួង៕