អាជ្ញាធរជាតិអប្សរារៀបចំផ្លូវដើរកម្សាន្តបែប Trekking ក្នុងព្រៃធម្មជាតិនៅសួនរុក្ខជាតិអង្គរ ដើម្បីទាក់ទាញទេសចរ

ទន្ទឹមនេះ ដើម្បីបន្ថែមសក្តានុពលដល់តំបន់រមណីយដ្ឋានអង្គរឱ្យកាន់តែមានភាពទាក់ទាញ អាជ្ញាធរជាតិអប្សរា កំពុងរៀបចំផ្លូវក្នុងព្រៃធម្មជាតិ ក្នុងសួនរុក្ខជាតិអង្គរ ដែលនឹងផ្តល់ភាពងាយស្រួលដល់អ្នកទេសចរ អាចដើរកម្សាន្តបែប Trekking និងស្វែងយល់អំពីជីវចម្រុះបន្ថែមនៅក្នុងព្រៃទំហំ១៥០ហិកតា ដោយឥតគិតថ្លៃ ពីក្លោងទ្វារចូលនៃសួនរុក្ខជាតិអង្គរ រហូតដល់កសិន្ធុខាងត្បូងនៃប្រាសាទអង្គរវត្ត។

បើតាមឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ការរៀបចំផ្លូវក្នុងព្រៃធម្មជាតិក្នុងសួនរុក្ខជាតិអង្គរនេះ គឺស្របតាមការដាក់ចេញនូវយុទ្ធនាការ«ទស្សនាសៀមរាបឆ្នាំ២០២៤» របស់រាជរដ្ឋាភិបាលដោយផ្តោតលើការផ្សព្វផ្សាយអំពីសក្តានុពលនៃខេត្តសៀមរាប ដែលមានគោលដៅទេសចរណ៍ជាច្រើន លើសពីការទស្សនាតែប្រាង្គប្រាសាទឱ្យបានកាន់តែទូលំទូលាយ ដើម្បីទាក់ទាញទេសចរមកទស្សនាកាន់តែច្រើនឡើងបន្ថែមទៀត៕