បច្ចុប្បន្នធនាគារនៅជប៉ុន ត្រូវបានអនុញ្ញាតឱ្យកាន់កាប់ភាគហ៊ុនតែជាង៥%ប៉ុណ្ណោះ នៅក្នុងក្រុមហ៊ុនដែលមានអាយុក្រោម១០ឆ្នាំ តាមរយៈក្រុមហ៊ុនបុត្រសម្ព័ន្ធដែលមានឯកទេសក្នុងការវិនិយោគ ហើយគេរំពឹងថា ទីភ្នាក់ងារសេវាកម្មហិរញ្ញវត្ថុនឹងធ្វើវិសោធនកម្មច្បាប់ធនាគារនៅខែមិថុនា ឆ្នាំ២០២៤ បន្ទាប់ពីមានការស្នើសុំពីសាធារណជន ខណៈដែលនាយករដ្ឋមន្ត្រីជប៉ុនលោក ហ្វូមីអូ គីស៊ីដា បានកំណត់យកអាជីវកម្មបង្កើតថ្មី ឬ Startups ជាសសរស្ដម្ភដ៏រឹងមាំសម្រាប់គោលនយោបាយសេដ្ឋកិច្ចរបស់រដ្ឋាភិបាលរបស់លោក។
ជាគោលការណ៍ធនាគារនៅជប៉ុនមិនអនុញ្ញាតឱ្យមានសិទ្ធិបោះឆ្នោតនៅក្នុងក្រុមហ៊ុនប្រតិបត្តិការរបស់ពួកគេលើសពី៥%ឡើយ ហើយការកំណត់បែបនេះ គឺដើម្បីធានាថា ពួកគេមានភាពរឹងមាំផ្នែកហិរញ្ញវត្ថុ និងដើម្បីការពារការប្រមូលផ្តុំនៃភាពជាម្ចាស់ឧស្សាហកម្ម។ ប៉ុន្តែមានករណីលើកលែងមួយសម្រាប់ការចាប់ផ្តើមអាជីវកម្មមានអាយុក្រោម១០ឆ្នាំ ដែលអនុញ្ញាតឱ្យធនាគារអាចកាន់កាប់ភាពជាម្ចាស់រហូតដល់១០០% តាមរយៈក្រុមហ៊ុនបុត្រសម្ព័ន្ធឯករាជ្យដែលមានឯកទេសខាងការវិនិយោគ។
ឥឡូវទីភ្នាក់ងារសេវាកម្មហិរញ្ញវត្ថុកំពុងពិចារណាពីការពង្រីកករណីលើកលែងនេះថែមទៀត ដើម្បីរួមបញ្ចូលសហគ្រាសឯកជនខ្នាតតូច និងមធ្យមដែលមានអាយុលើស១០ឆ្នាំ ហើយដែនកំណត់ថ្មីនឹងត្រូវកំណត់ដោយផ្អែកលើតម្រូវការឧស្សាហកម្មក្នុងចំណោមកត្តាផ្សេងៗទៀត។
ការចាប់ផ្តើមស្រាវជ្រាវនិងអភិវឌ្ឍន៍តែងតែចំណាយពេលយូរដើម្បីនាំយកផលិតផលទៅកាន់ទីផ្សារ ហើយពេលវេលាដើម្បីបង្កើតប្រាក់ចំណេញពីការវិនិយោគភាគច្រើន គឺចាប់ពីរយៈពេលកំណត់១០ឆ្នាំឡើងទៅ។ បើតាមក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុនបានឱ្យដឹងថា ការចាប់ផ្តើមអាជីវកម្មជាង៦០% ដែលផ្ដោតលើការស្រាវជ្រាវ និងការអភិវឌ្ឍបានចំណាយពេលជាង១០ឆ្នាំទើបអាចគេស្គាល់ជាសាធារណៈ។
បើតាមសមាគមវិនិយោគទុនជប៉ុនបានឱ្យដឹងថា ការផ្គត់ផ្គង់ប្រាក់ទាំងប្រថុយប្រថានដល់ការអាជីវកម្មបង្កើតថ្មី គឺពិតជាដើរតួនាទីសំខាន់ណាស់ពាក់ព័ន្ធនឹងដើមទុន និងមូលនិធិវិនិយោគរួម។ តួយ៉ាង មាន ៤១% នៃការរៃអង្គាសមូលនិធិវិនិយោគកាលពីដោយអាជីវកម្មបង្កើតថ្មី ក្នុងឆ្នាំ២០២២ គឺជាការបណ្ដាក់ទុនវិនិយោគរួមគ្នា ខណៈមូលនិធិបានមកពីស្ថាប័នហិរញ្ញវត្ថុផ្សេងទៀត គឺមានត្រឹមតែប្រមាណ ៣,៥%ប៉ុណ្ណោះ៕
