ជប៉ុននឹងបង្កើនការជ្រើសរើសពលករជំនាញពីបរទេស ដើម្បីបំពេញតម្រូវដែលកំពុងខ្វះខាត

ជប៉ុនគ្រោងនឹងបង្កើនចំនួនកូតាពលករជំនាញបរទេស ដែលមានសិទ្ធិទទួលបានទិដ្ឋាការកម្មករជំនាញក្នុងរយៈពេល៥ឆ្នាំទ្វេរដង ចាប់ពីឆ្នាំ២០២៤នេះ ពោលគឺជប៉ុនគ្រោងនឹងបើកទ្វារទទួលពលករជំនាញបរទេសចំនួន៨០ម៉ឺននាក់ ដើម្បីឆ្លើយតបនឹងបញ្ហាកង្វះកម្លាំងពលកម្មក្នុងស្រុកនៅក្នុងវិស័យផលិតកម្ម សំណង់ និងកសិកម្ម។ តាមផែនការពីមុន ជប៉ុនគ្រោងទទួលពលករបរទេសជំនាញតែជាង៣៤ម៉ឺន៥ពាន់នាក់ប៉ុណ្ណោះនៅក្នុងរយៈពេល៥ឆ្នាំខាងមុខ។ បច្ចុប្បន្នប្រទេសដែលមានប្រជាពលរដ្ឋសរុបជាង១២៥លាននាក់នេះ ត្រូវបានគេដឹងថា មានពលរដ្ឋដែលមានអាយុចាប់ពី៦៥ឆ្នាំឡើងរហូតដល់ជាង២៩% ខណៈដែលអត្រាកំណើតបន្តថយចុះជាបន្តបន្ទាប់។

ដើម្បីដោះស្រាយបញ្ហានេះ រដ្ឋាភិបាលជប៉ុន បានដាក់ចេញនូវគោលនយោបាយទទួលពលករបរទេសជំនាញជាបន្តបន្ទាប់ ក្នុងនោះចន្លោះពីឆ្នាំ២០១៩ មកដល់ឆ្នាំ២០២៣ ជប៉ុនបានទទួលពលករជំនាញបរទេសប្រមាណ២០ម៉ឺននាក់ ដោយពលករបរទេសទាំងនេះតម្រូវឲ្យចេះប្រើប្រាស់ភាសាជប៉ុន។

គួរបញ្ជាក់ថា រាល់ការជ្រើសរើសពលករជំនាញបរទេសទៅធ្វើការនៅប្រទេសជប៉ុន គឺត្រូវឆ្លងកាត់ការប្រឡងច្បាស់លាស់ និងជ្រើសរើសតែអ្នកដែលមានជំនាញពិតប្រាកដ ហើយនៅក្នុងករណីពលករជំនាញទាំងនោះមានសក្តានុពល ហើយអាចពង្រឹងសមត្ថភាពខ្លួនដល់កម្រិតជំនាញការ ឬពលករកម្រិត២ នោះក្រុមពលករបរទេសជំនាញទាំងនោះ អាចមានសិទ្ធិបន្តធ្វើការងារ និងនាំសមាជិកក្រុមគ្រួសារ ហើយក៏អាចមានសិទ្ធិស្នើសុំសិទ្ធិស្នាក់នៅជាអចិន្រ្តៃយ៍នៅជប៉ុនផងដែរ។ បើតាមក្រសួងសុខាភិបាល ការងារ និងសុខមាលភាពជប៉ុន គិតត្រឹមខែតុលា ឆ្នាំ២០២៣ នៅទូទាំងប្រទេសជប៉ុនមានពលករបរទេសសរុបប្រមាណជា២លាននាក់៕​

ដោយៈ សរ សុជាតិ