លោកចូ បៃដិន បានថ្លែងនៅក្នុងសន្និសីតកាសែតនៅទីក្រុងហាណូយថា «ខ្ញុំមិនចង់រាំងខ្ទប់ចិននោះទេ»។ ក្រោមរដ្ឋបាលរបស់លោក អាមេរិកមិនចង់ធ្វើទុក្ខបុកម្នេញប្រទេសចិន ហើយទីក្រុងវ៉ាស៊ីនតោនក៏មានគោលដៅធ្វើឱ្យទំនាក់ទំនងមហាអំណាចដើរលើផ្លូវត្រូវដែរ។ នេះបើតាមការថ្លែងរបស់លោក បៃដិន ដែលកំពុងមានវត្តមាននៅក្នុងប្រទេសវៀតណាម ដើម្បីរឹតចំណងការទូតជាមួយប្រទេសក្បែរខាងចិនមួយនេះ។
ឆ្លៀតក្នុងឱកាសនោះ ប្រធានាធិបតីអាមេរិករូបនេះ ក៏បានលើកឡើងពីបច្ចុប្បន្នភាពសេដ្ឋកិច្ចរបស់ប្រទេសចិនដែរ។ លោកថា កំណើនសេដ្ឋកិច្ចរបស់ប្រទេសចិនបាន និងកំពុងធ្លាក់ចុះ ដោយសារតែសេដ្ឋកិច្ចពិភពលោកខ្សោយព្រមទាំងគោលនយោបាយរបស់ចិនខ្លួនឯងផ្ទាល់។ លោកមិនបានបញ្ជាក់លម្អិតថាជាគោលនយោបាយអ្វីនោះទេ តែសង្កត់ធ្ងន់ថា ស្ថានភាពសេដ្ឋកិច្ចរបស់ចិនកំពុងស្ថិតក្នុងវិបត្តិ ក៏ព្រោះតែបញ្ហាក្នុងវិស័យអចលនទ្រព្យ និងភាពអត់ការងារធ្វើរបស់យុវជនកើនឡើងខ្ពស់។
អត្ថបទគួរអាន
យោងតាមទិន្នន័យពាណិជ្ជកម្មកាលពីខែសីហាកន្លងទៅ ការនាំចេញ និងការនាំចូលរបស់ប្រទេសចិនបានរួមតូចនៃការធ្លាក់ចុះវិញ ក្រោយអាជ្ញាធរចិនបានបង្កើនតម្រូវការក្នុងស្រុក និងដាក់ចេញគោលនយោបាយបន្ថយអតិផរណា។ ទោះយ៉ាងណា គោលដៅកំណើនសេដ្ឋកិច្ច៥% ដែលចិនបានប្រកាសសម្រេចឱ្យបានក្នុងឆ្នាំ២០២៣ ហាក់មិនអាចសម្រេចបានឡើយ បើសិនបញ្ហាអចលនទ្រព្យ ការចំណាយលើការប្រើប្រាស់ និងកំណើនឥណទាននៅបន្តការធ្លាក់ចុះទៀតនោះ អ្នកវិភាខ្លះថា វានឹងបន្តទាញទម្លាក់កំណើនសេដ្ឋកិច្ចឱ្យនៅទាប។
បន្ថែមពីនេះ លោកចូ បៃដិន ក៏បានគូសបញ្ជាក់ដោយទាញភ្ជាប់បញ្ហាសេដ្ឋកិច្ចរបស់ប្រទេសចិននេះថា នឹងមិនអាចជាមូលហេតុឱ្យប៉េកាំងឈ្លានពានកោះតៃវ៉ាន់ដែរ។ ហើយអាមេរិកនឹងនៅតែជាមហាអំណាចប៉ាស៊ីហ្វិក និងគ្មានបំណងដកខ្លួនចេញពីតំបន់នេះឡើយ។ គួររំលឹកថា បៃដិនកំពុងបំពេញទស្សនកិច្ចនៅក្នុងប្រទេសមួយថ្ងៃ មុននឹងចាកចេញទៅកាន់រដ្ឋអាឡាស្កា ដើម្បីរំលឹកខួបសោកនាដកម្មនៅថ្ងៃទី១១ ខែកញ្ញា។
