កំពង់ផែទេសចរណ៍ខេត្តកំពត អាចនឹងបើកដំណើរការឆាប់ៗ ខណៈបច្ចុប្បន្នកំពុងដំណើរការជ្រើសរើសក្រុមហ៊ុនដើម្បីគ្រប់គ្រង និងធ្វើប្រតិបត្តិការ

មន្ត្រីជាន់ខ្ពស់ក្រសួងទេសចរណ៍និយាយក្នុងក្របខណ្ឌ​សុំមិនបញ្ចេញឈ្មោះ បានឱ្យដឹងថា កំពង់ផែទេសចរណ៍អន្តរជាតិ ខេត្តកំពត ដែលបានសាងសង់រួចរាល់អស់រយៈពេលជិតពីរឆ្នាំ តែមិនទាន់អាចដាក់ឱ្យប្រើប្រាស់បាននោះ បច្ចុប្បន្នក្រុមការងារអន្តរក្រសួងកំពុងខិតខំជំរុញ និងដោះស្រាយលើបញ្ហានេះ និងកំពុងដំណើរការនីតិវិធីជ្រើសរើសក្រុមហ៊ុនសម្រាប់គ្រប់គ្រង និងធ្វើប្រតិបត្តិលើកំពង់ផែមួយនេះ ដោយតាមផែនការ គម្រោងនេះអាចនឹងដាក់ឱ្យដំណើរការនៅចុងឆមាសទី១ ឬដើមឆមាសទី២ឆ្នាំនេះ។

ពាក់ព័ន្ធគម្រោងនេះដែរ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងដែរថា ក្រសួងសាធារណការ និងដឹកជញ្ជូន បានចាត់ក្រុមបច្ចេកទេសទៅពិនិត្យ និងសិក្សាលើគម្រោងលើកកម្ពស់ជម្រៅផ្លូវទឹកនៅកំពង់ផែទេសចរណ៍អន្តរជាតិ ខេត្តកំពតនេះ ជាបន្តបន្ទាប់ផងដែរ ក្រោយពីមានការជំរុញពីឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ឱ្យក្រសួងសាធារណការ និងដឹកជញ្ជូន ធ្វើយ៉ាងណាដោះស្រាយបញ្ហាជម្រៅទឹកនៅទីនោះ ដើម្បីជំរុញឱ្យកំពង់ផែទេសចរណ៍អន្តរជាតិនេះ អាចដាក់ឱ្យដំណើរការបាន។

សូមបញ្ជាក់ថា ក្រោយកំពង់ផែទេសចរណ៍អន្តរជាតិនេះ ដាក់ឱ្យដំណើរការ វានឹងក្លាយជាច្រកទ្វារដ៏សំខាន់មួយសម្រាប់កម្ពុជា ក្នុងការទទួលភ្ញៀវទេសចរជាតិ និងអន្តរជាតិ កាន់តែច្រើនបន្ថែមទៀត តាមរយៈការធ្វើដំណើរកម្សាន្តតាមផ្លូវទឹក ពីកន្លែងមួយទៅកន្លែងមួយ ពីប្រទេសមួយ ទៅប្រទេសមួយទៀត ដ្បិតថា ការតភ្ជាប់ទេសចរណ៍តាមផ្លូវទឹក បានជួយសម្រួលដល់កាធ្វើទេសចរណ៍ជាច្រើនទាំងពេលវេលា និងថវិការផងដែរ។

បើតាមក្រសួងសាធារណការ និងដឹកជញ្ជូន គម្រោងសាងសង់កំពង់ផែទេសចរណ៍ខេត្តកំពតនេះ មានទីតាំងស្ថិតនៅក្នុងស្រុកទឹកឈូ ខេត្តកំពត ដោយលាតសន្ធឹងលើផ្ទៃដីទំហំជាង៤ហិកតា ដែលបានបើកការដ្ឋានសាងសង់កាលពីខែសីហា ឆ្នាំ២០១៨ និងបានបញ្ចប់ការសាងសង់ជាស្ថាពរ កាលកាលពី ខែមិថុនា ឆ្នាំ២០២២ ជាមួយទុនវិនិយោគជាង៩,២លានដុល្លា ក្រោមថវិកាបដិភាគរវាងធនាគារអភិវឌ្ឍន៍អាស៊ី និងរាជរដ្ឋាភិបាលកម្ពុជា៕