ហេតុអ្វីបណ្ដាក្រុមហ៊ុនជប៉ុន នាំគ្នាដកខ្លួនចេញពីគម្រោងផ្លូវរថភ្លើងល្បឿនលឿនម៉ាឡេស៊ី-សិង្ហបុរី តម្លៃជាង២០ពាន់លានដុល្លារ?

ប្រភពមួយចំនួនរួមទាំងប្រភពពីរដ្ឋាភិបាលជប៉ុន និងម៉ាឡេស៊ី ផងបាននិយាយថា ក្រុមហ៊ុនជប៉ុន មួយចំនួនរួមទាំងក្រុមហ៊ុន East Japan Railway Co ផងដែរធ្លាប់សង្ឃឹមថា នឹងប្រើប្រាស់ប្រព័ន្ធរថភ្លើងល្បឿនលឿន ស៊ីនកានសេន (Shinkansen) របស់ជប៉ុន នៅក្នុងគម្រោងខាងលើនេះ ប៉ុន្តែពួកគេបានសម្រេចចិត្តដកខ្លួនចេញវិញដោយសារគិតថា គម្រោងនេះមានហានិភ័យខ្លាំងពេកព្រោះតែគ្មានការគាំទ្រផ្នែកហិរញ្ញវត្ថុពីរដ្ឋាភិបាលម៉ាឡេស៊ី។

ការណ៍នេះអាចនឹងធ្វើឱ្យបណ្ដាក្រុមហ៊ុនចិន ដែលជាគូប្រជែងពង្រឹងការឈរជើងកាន់តែរឹងមាំនៅក្នុងការសាងសង់ហេដ្ឋារចនាសម្ព័ន្ធក្នុងតំបន់អាស៊ីបូព៌ា បន្ទាប់ពីក្រុមហ៊ុនចិនទាំងនោះបានបញ្ចប់ការសាងសង់ផ្លូវរថភ្លើងល្បឿនលឿនមួយក្នុងឆ្នាំ២០២៣ នៅប្រទេសឥណ្ឌូនេស៊ី ហើយបច្ចុប្បន្នកំពុងសាងសង់ផ្លូវបែបនេះមួយទៀតនៅក្នុងប្រទេសថៃ។

ថ្ងៃចន្ទទី១៥ ខែមករា គឺជាថ្ងៃឱសានវាទនៃការដាក់ពាក្យដេញថ្លៃសម្រាប់គម្រោងសាងសង់ផ្លូវរថភ្លើងលឿនលឿននេះហើយ ខណៈដែលរដ្ឋាភិបាលម៉ាឡេស៊ី បានចាប់ផ្ដើមស្នើសុំឱ្យក្រុមហ៊ុននានាធ្វើការដេញថ្លៃតាំងពីខែកក្កដា ឆ្នាំ២០២៣ មកម្ល៉េះ។

គម្រោងនេះត្រូវបានគេរំពឹងថា នឹងចំណាយថវិកាសរុបរហូតដល់ទៅប្រមាណ២១ពាន់លានដុល្លារអាម៉េរិក ប៉ុន្តែរដ្ឋាភិបាលម៉ាឡេស៊ី មានបំណងដាក់គម្រោងនេះឱ្យស្ថិតនៅក្រោមការចំណាយរបស់ឯកជនជាជាងការចំណាយរបស់រដ្ឋាភិបាល ឬ ការធានាបំណុលបន្ថែម។

ប្រភពទាំងនេះបានបន្តថា ខណៈក្រុមហ៊ុនជប៉ុន កំពុងបោះបង់ចោលគម្រោងនេះ មានក្រុមហ៊ុនក្នុងស្រុកមួយចំនួនគ្រោងចាប់ដៃសហការជាមួយក្រុមហ៊ុនចិន និងអឺរ៉ុប ខ្លះទៀតដើម្បីធ្វើការដេញថ្លៃយកគម្រោងមួយនេះ។ រដ្ឋាភិបាលម៉ាឡេស៊ី គ្រោងនឹងជ្រើសរើសក្រុមហ៊ុនមួយចំនួននៅប៉ុន្មានខែខាងមុខ ហើយនឹងចាប់ផ្តើមការចរចាពេញលេញជាមួយរដ្ឋាភិបាលសិង្ហបុរី ឱ្យឆាប់បំផុតនៅចុងឆ្នាំនេះ។

សូមបញ្ជាក់ថា រដ្ឋាភិបាលម៉ាឡេស៊ី និងសិង្ហបុរី បានឈានដល់កិច្ចព្រមព្រៀមបឋមមួយនៅក្នុងឆ្នាំ២០១៣ លើការសាងសង់គម្រោងផ្លូវរថភ្លើងល្បឿនលឿនប្រវែង៣៥០គីឡូម៉ែត្រនេះដែលនឹងជួយកាត់បន្ថយរយៈពេលធ្វើដំណើរទៅមករវាងគូឡាឡាំពួ និងសិង្ហបុរី មកនៅត្រឹមតែ៩០នាទី បើធៀបនឹងការធ្វើដំណើរតាមរថយន្តដែលត្រូវចំណាយពេលដល់ទៅជាង៤ម៉ោង៕

អត្ថបទ៖ សុខ ជា