លោក ហ្សេលេនស្គី មានសង្ឃឹមក្រោយប្រទេសនៅអឺរ៉ុបជិត៥០គាំទ្រជាថ្មី

ក្រោយទៅដល់ទីក្រុងហ្ក្រេណាដា ប្រទេសអេស្ប៉ាញ កាលពីថ្ងៃព្រហស្បតិ៍ ដើម្បីចូលរួមកិច្ចប្រជុំកំពូលសមាគមន៍នយោបាយអឺរ៉ុប លោក ហ្សេលេនស្គី មេដឹកនាំអ៊ុយក្រែន បាននិយាយថា «អឺរ៉ុបត្រូវខ្លាំងរឹងមាំ» ហើយជោគជ័យ ឬបរាជ័យនៅអ៊ុយក្រែន នឹងកំណត់វាសនា នៃអឺរ៉ុបទាំងមូល។

លោកអំពាវនាវឱ្យមេដឹកនាំអឺរ៉ុប ផ្តល់ជំនួយប្រព័ន្ធការពារដែនអាកាស គ្រាប់កាំភ្លើងធំ មីស៊ីលរយៈចម្ងាយ និងដ្រូនបន្ថែមទៀតដល់អ៊ុយក្រែនសម្រាប់ប្រើការក្នុងរដូវរងា ដែលនឹងចូលមកដល់ចុងឆ្នាំនេះ។

ប្រធានាធិបតីបារាំងលោក ម៉ាក្រុង បានយល់ស្របចំពោះការលើកឡើងរបស់លោក ហ្សេលេនស្គី នេះ តែទទួចថា ប្រសិនបើការប្តេជ្ញាចិត្តរបស់សហរដ្ឋអាមេរិក សម្រាប់អ៊ុយក្រែននៅតែរឹងមាំ នោះអឺរ៉ុបនឹងធ្វើសកម្មភាពដំបូងមុនគេ ព្រោះលោកថា អ៊ុយក្រែនជាអ្នកជិតខាងយើង។

ទោះយ៉ាងណា លោក ចូសេប បូរែល ប្រធានគោលនយោបាយការបរទេសអឺរ៉ុប ថ្លែងថា បើអឺរ៉ុបប្តេជ្ញាគាំទ្រអ៊ុយក្រែនជាថ្មីហើយ មិនចាំបាច់មានការបញ្ជាក់បន្ថែមពីការចូលរួមរបស់អាមេរិកនោះទេ។

មែនទែនទៅ ការគាំទ្រពីសំណាក់ប្លុកអឺរ៉ុប បានក្លាយកម្លាំងមួយកាន់តែសំខាន់ឡើង ក្រោយមានភាពចលាចលនយោបាយផ្ទៃក្នុងអាមេរិក និងភាពមិនច្បាស់លាស់ចំពោះជំនួយរាប់ពាន់លានដុល្លារសម្រាប់អ៊ុយក្រែន។

លោក ចូ បៃដិន កាលពីថ្ងៃអង្គារ បានអំពាវនាវប្រទេសសម្ព័ន្ធមិត្តរួមគ្នាជាមួយអាមេរិក គាំទ្រអ៊ុយក្រែនបន្តទៅទៀត ចំពេលដែលលោក បាននិងកំពុងកៀរគរការគាំទ្រពីក្រុមសាធារណរដ្ឋដែរ ក្រោយសមាជិកសភាសាធារណរដ្ឋខ្លះមានបំណងចេញច្បាប់កាត់ផ្តាច់ជំនួយឱ្យអ៊ុយក្រែន។

គួររំលឹកថា ច្បាប់មួយដែលសភាអាមេរិកទើបបានអនុម័ត ដើម្បីទ្រទ្រង់ដំណើរការរដ្ឋាភិបាលសហព័ន្ធរយៈពីរខែខាងមុន មិនបានបញ្ចូលជំនួយយោធាសម្រាប់អ៊ុយក្រែនឡើយ។

នៅក្នុងកិច្ចប្រជុំថ្ងៃព្រហស្បតិ៍នោះ មេដឹកនាំអឺរ៉ុបភាគច្រើន ក៏ដូចជាម្ចាស់ផ្ទះនៃកិច្ចប្រជុំ លោក Pedro Sánchez​នាយករដ្ឋមន្ត្រីអេស្ប៉ាញបានបង្ហាញពីការឈរយ៉ាងរឹងមាំនៅពីក្រោយអ៊ុយក្រែន ហើយបានផ្តល់ជំនួយយោធាថ្មីដល់អ៊ុយក្រែន ដូចជាប្រព័ន្ធប្រឆាំងយន្តហោះចម្បាំង យន្តហោះគ្មានមនុស្សបើក និងការបណ្តុះបណ្តាលសម្រាប់ទាហានអ៊ុយក្រែនជាដើម។ ក្នុងនោះ លោក ហ្សេលេនស្គី ក៏បានបើកជំនួបទ្វេភាគីជួបជាមួយអធិការបតីអាល្លឺម៉ង់ លោក Olaf Scholz ផងដែរ។

លោក ស្កូលហ្ស បានប្រាប់លោក ហ្សេលេនស្គី ថា ទីក្រុងប៊ែរឡាំង កំពុងធ្វើការលើការផ្តល់ប្រព័ន្ធការពារដែនអាកាស ផាទ្រីយ៉ូត (Patriot) មួយផ្សេងទៀតឱ្យអ៊ុយក្រែន ដើម្បីដំណើរការក្នុងរយៈពេលប៉ុន្មានខែខាងមុននេះ៕