កូរ៉េខាងជើងលើកសរសើរកីឡាអូឡាំពិកនៅចិនថា ជាជោគជ័យដ៏អស្ចារ្យ

លោកគីម ជុងអ៊ុន បាននិយាយនៅក្នុងលិខិតនោះថា ការបើកដំណើរការ ដោយជោគជ័យនៃកីឡាអូឡាំពិករដូវរងានៅទីក្រុងប៉េកាំង ទោះបីជា​មានវិបត្តិសុខភាពទូទាំងពិភពលោកកំពុងអុកឡុក គឺជាជ័យជម្នះដ៏អស្ចារ្យមួយផ្សេងទៀតរបស់ប្រទេសចិន។ ឆ្លៀតក្នុងឱកាសនេះ របបក្រុងព្យុងយ៉ាងបានបង្ហាញការតាំងចិត្តខ្ពស់ ដើម្បីបន្តអភិវឌ្ឍទំនាក់ទំនងរវាងកុម្មុយនិស្តទាំងពីរ ក៏ដូចជាប្រទេសទាំងពីរឱ្យឈានទៅដល់ដំណាក់កាលខ្ពស់បំផុតថ្មីមួយ។

គួររំឭកថា អាជ្ញាធរកីឡា​កូរ៉េខាងជើង​កាលពីខែមករាបានផ្ញើរលិខិតទៅកាន់គណកម្មការ​អូឡាំពិកចិនថា នឹងមិនបញ្ជូនកីឡាករនិងមន្ត្រីពាក់ព័ន្ធទៅចូលរួមព្រឹត្តិការកីឡា​អូឡាំពិករដូវរងាឆ្នាំនេះទេ។ 

ការប្រកាសដកខ្លួនចេញនេះ ត្រូវបានកូរ៉េខាង​ជើង​ស្តីបន្ទោសលើជំងឺរាតត្បាតកូវីដ១៩ដែលបន្តរាលដាលឥតឈប់ឈរ។ ជាមួយគ្នានេះដែរ កូរ៉េខាងជើងមិនភ្លេចឡើយឆ្លៀតស្តីបន្ទោស ចោទប្រកាន់អាមេរិក និងសម្ព័ន្ធមិត្ត​ថា បានព្យាយាមធ្វើឲ្យព្រឹត្តិការណ៍កីឡាខាងលើប្រារព្ធឡើងមិនបានជោគជ័យ។ យ៉ាងណាមិញ ពិធីបើកសម្ពោធកីឡាអូឡាំពិករដូវរងានឹងចាប់ផ្តើមនៅល្ងាចថ្ងៃសុក្រនេះហើយ។

សូមជម្រាបថា ប្រទេសចិនគឺជាសម្ព័ន្ធមិត្តដ៏សំខាន់តែមួយគត់របស់កូរ៉េខាងជើង ចាប់តាំងពីប្រទេសទាំងពីរ​បាន​ចុះហត្ថលេខា​លើសន្ធិសញ្ញា​ក្នុងឆ្នាំ​១៩៦១ ខណៈទណ្ឌកម្មអន្តរជាតិដែលបានដាក់លើកម្មវិធីអាវុធនុយក្លេអ៊ែរ និងមីស៊ីលរបស់ទីក្រុងព្យុងយ៉ាង បានធ្វើឱ្យរបបផ្តាច់ការមួយនេះ កាន់តែពឹងផ្អែកខ្លាំងទៅលើទីក្រុងប៉េកាំងសម្រាប់ពាណិជ្ជកម្ម និងការគាំទ្រផ្សេងទៀត៕