ភាពតានតឹងបានកើតឡើងជាថ្មី នៅតំបន់ឧបទ្វីបកូរ៉េ ខណៈសម្ពាធអន្តរជាតិក៏ធ្លាក់មកជាមួយគ្នាផងដែរ នៅពេលដែលកូរ៉េខាងជើងបានចាប់សាកល្បងមីស៊ីលគ្រប់ប្រភេទ រួមមានប្រភេទដែលបានហាមឃាត់ដោយក្រុមប្រឹក្សាសន្តិសុខអង្គការសហប្រជាជាតិ និងបានសាកល្បងជាច្រើនលើកច្រើនសារ ត្រឹមពេលតែមួយខែប៉ុណ្ណោះ។ ជាក់ស្តែង ខែមករា គឺជាគ្រាដែលមានភាពតានតឹង និងអង្រួនពិភពលោកខ្លាំងបំផុត ក្រោយរបបក្រុងព្យុងយ៉ាង សាកល្បងមីស៊ីលដល់ទៅ៧ដង ដោយមានទាំងមីស៊ីលល្បឿនលឿងជាងសំឡេង និងប្រភេទមីស៊ីលដែលមានសមត្ថភាពបាញ់ដល់ មូលដ្ឋានទ័ព ឬដែនដីរបស់សហរដ្ឋអាមេរិក នៅមហាសមុទ្រប៉ាស៊ីហ្វិក មីស៊ីលប្រដេញ មីស៊ីលអន្តរទ្វីបរយៈឆ្ងាយ និងជិតជាដើម។
អគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី លីនដា ថូម៉ាស់-ហ្គ្រីនហ្វៀល (Linda Thomas-Greenfield) បានអំពាវនាវឱ្យរបបផ្តាច់ការកូរ៉េខាងជើង បញ្ឈប់ការចាយលុយដ៏ច្រើនសន្ធឹកសន្ធាប់ទៅលើកម្មវិធីអភិវឌ្ឍគ្រាប់មីស៊ីល និងអាវុធនុយក្លេអ៊ែរ ហើយងាកមកផ្តោតការយកចិត្តទុកដាក់ ជាអាទិភាពលើតម្រូវការចាំបាច់នៃប្រជាជនរបស់ខ្លួនវិញ។
ប៉ុន្តែជាការឆ្លើយតប ក្រសួងការបទេសកូរ៉េខាងជើងនៅថ្ងៃពុធនេះ បានចេញសេចក្តីថ្លែងការណ៍មួយថា ការធ្វើតេស្តមីស៊ីលចាប់តាំងពីចូលដល់ឆ្នាំថ្មី ឆ្នាំ២០២២មក គឺតំណាងឲ្យសមិទ្ធិផលគួរឱ្យកត់សម្គាល់របស់ក្រុងព្យុងយ៉ាង។ ប្រការនេះសបញ្ជាក់កាន់តែច្បាស់់ ពីភាពរីកចម្រើននៃសមត្ថភាពយោធារបស់កូរ៉េខាងជើង ស្របតាមការអះអាងរបស់ប្រមុខដឹកនាំ លោកគីម ជុងអ៊ុនដែលសច្ចាបន្តអភិវឌ្ឍកម្លាំងយោធារបស់ខ្លួនឲ្យកាន់តែខ្លាំងក្លា។អត្ថបទគួរអាន
សេចក្តីថ្លែងការណ៍ក្រុងព្យុងយ៉ាងដដែលបន្តអួតសរសើរខ្លួនឯងទៀតថា៖ « «សព្វថ្ងៃ ប្រទេសជាច្រើនកំពុងខ្ជះខ្ជាយពេលវេលាដោះស្រាយជាមួយអាមេរិក ដោយការចុះញ៉ម និងស្ដាប់បង្គាប់ទាំងងងឹតងងុល។ ហើយនៅលើពិភពលោក មានតែកូរ៉េខាងជើងតែមួយគត់ ដែលអាចអង្រួនពិភពលោក តាមរយៈការធ្វើតេស្ដមីស៊ីលដែលអាចបាញ់ដល់គ្រប់ទីកន្លែងនៅក្នុងសហរដ្ឋអាមេរិក និងហ៊ានតតាំងជាមួយអាមេរិក ដោយមិនញញើតនោះឡើយ។ មានជិត២០០ប្រទេសនៅលើពិភពលោក ប៉ុន្តែមានប្រទេសតិចតួចណាស់ ដែលមានគ្រាប់បែកអ៊ីដ្រូសែន មីស៊ីលបាលិស្ទិកអន្តរទ្វីប និងមីស៊ីលល្បឿនលឿនជាងសំឡេង»។
ដោយឡែក នៅក្រោយមានសេចក្តីថ្លែងការណ៍ដូចនេះ ក្រសួងការបរទេសអាមេរិក មិនមានប្រតិកម្មអ្វីច្រើនឡើយ ក្រៅតែពីការបញ្ជាក់ជាថ្មីថា អាមេរិកមិនមានចេតនាអាក្រក់ជាមួយកូរ៉េខាងជើងឡើយ ហើយបន្តអំពាវនាវឲ្យរបបព្យុងយ៉ាង វិលរកតុចរចាឡើងវិញ។ ប៉ុន្តការអំពាវនាវនេះ ត្រូវបានរបបក្រុងព្យុងយ៉ាងទាត់ចោល។
សូមបញ្ជាក់ថា ចាប់តាំងពីឆ្នាំ២០១៧មក កូរ៉េខាងជើង មិនបានធ្វើតេស្ដអាវុធនុយក្លេអ៊ែរនោះទេ ទើបតែនៅដើមឆ្នាំ២០២២នេះប៉ុណ្ណោះ ដែលកូរ៉េខាងជើងចាប់ផ្ដើមបាញ់បង្ហោះកាំជ្រួញមីស៊ីលជាច្រើនប្រភេទផ្សេងៗគ្នាជាបន្ដបន្ទាប់។ យ៉ាងណាមិញការធ្វើតេស្ដកន្លងមកនេះ កំពុងបង្កក្តីបារម្ភថា ទីក្រុងព្យុងយ៉ាងអាចនឹងឈានដល់ការធ្វើតេស្ដអាវុធនុយក្លេអ៊ែរឡើងវិញក្នុងពេលឆាប់ៗផងដែរ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
