មែនទែនទៅ លោកពូទីនបានប្រើប្រវត្តិសាស្រ្តនៃសង្គ្រាមលោកលើកទី២ ដើម្បីផ្សព្វផ្សាយពីរបៀបវារៈនយោបាយរបស់លោកក្នុងប៉ុន្មានឆ្នាំថ្មីៗនេះ ខណៈដែលវិមានក្រឹមឡាំងបានចាត់ទុកជ័យជំនះរបស់ខ្លួនក្នុងសង្គ្រាមលោកលើកទី២ ប្រដូចសង្គ្រាមក្នុងប្រទេសអ៊ុយក្រែននេះ នៅក្នុងអ្វីដែលប្រជាជនរុស្ស៊ីហៅថា សង្គ្រាមស្នេហាជាតិដ៏អស្ចារ្យ។
មកដល់ទីក្រុង Volgograd ភាគខាងត្បូង ដើម្បីប្រារព្ធពិធីរំលឹកខួបលើកទី៨០ នៃជ័យជំនះរបស់កងទ័ពនៃសហសូវៀតនៅសមរភូមិ ស្តាលីនហ្ក្រាត(Stalingrad) លើកងទ័ពណាស៊ីអាល្លឺម៉ង់ លោក ពូទីន លើកឡើងថា រុស្ស៊ីគ្មានជម្រើសអ្វីផ្សេងនោះទេ គឺត្រូវតែប្រយុទ្ធតទៅមុខទៀត។
លោកបានចាត់ទុកប្រតិបត្តិការយោធាពិសេសរបស់រុស្ស៊ីនៅអ៊ុយក្រែនទៅនឹងសង្រ្គាមប្រឆាំងនឹងពួកណាស៊ីអាល្លឺម៉ង់ក្នុងឆ្នាំ១៩៤១-១៩៤៥ ហើយបាននិយាយថា ជនជាតិរុស្ស៊ីទាំងប្រុសទាំងស្រីបានត្រៀមខ្លួនរួចរាល់ហើយ ដើម្បីប្រយុទ្ធរហូតដល់ទីបញ្ចប់។ លោកបានសង្កត់ធ្ងន់ថា ជាថ្មីម្តងទៀត រុស្ស៊ីត្រូវតែបង្ខំចិត្តទប់ទល់នឹងការចង់ឈ្លានពានរបស់កម្លាំងនៃប្រទេសលោកខាងលិចដែលកំពុងតែប្រមូលផ្តុំគ្នា។
អត្ថបទគួរអាន
លោកពូទីន បានបន្ថែមថាយើងប្រហែលជានឹងមិនបញ្ជូនរថក្រោះបន្ថែមទៀតទៅកាន់ព្រំដែនរបស់ពួកគេទេ ប៉ុន្តែយើងមានអ្វីមួយដែលត្រូវឆ្លើយតប ហើយវាមិនមែនគ្រាន់តែអំពីការប្រើប្រាស់រថពាសដែកនោះទេ អ្នកគ្រប់គ្នាគួរតែយល់ពីរឿងនេះហើយ។
បើទោះបីជា មិនបាននិយាយឲ្យចំពីការប្រើប្រាស់អាវុធនុយក្លេអ៊ែរក៏ដោយចុះ ប៉ុន្ដែ នៅត្រង់ចំណុចដែលបុរសខ្លាំងពូទីនបាននិយាយនេះ គឺគ្មានអ្វីក្រៅតែពីការបើកសន្លឹកបៀរធំចុងក្រោយរបស់ខ្លួន គឺអាវុធនុយក្លេអ៊ែរនោះទេ ដោយលោកអះអាងថា បច្ចុប្បន្នរុស្ស៊ីកំពុងរងការគម្រាមកំហែងពីកងរថក្រោះរបស់អាល្លឺម៉ង់ Leopard ដែលប្រកាសផ្តល់ឱ្យអ៊ុយក្រែននោះ។
ជាក់ស្តែង ចាប់តាំងពីការបញ្ជូនទាហានចូលប្រទេសអ៊ុយយក្រែនកាលពីខែកុម្ភៈឆ្នាំមុន លោកពូទីនបានគំរាមម្តងហើយម្តងទៀតថា នឹងប្រើអាវុធនុយក្លេអ៊ែរប្រឆាំងនឹងលោកខាងលិច ប្រសិនបើជម្លោះកាន់តែរីកធំ និងពិបាកទប់ទល់ជាមួយកងកម្លាំងអ៊ុយក្រែន ដែលមានលោកខាងលិចនៅជួយពីក្រោយ។
សូមជម្រាបដែរថា ពិធីបុណ្យរំលឹកខួបនៃជ័យជំនះក្នុងសង្គ្រាមលោកលើកទី២ នៅឯទីក្រុងភាគខាងត្បូងនៃប្រទេសរុស្ស៊ីនេះធ្វើឡើង ស្របពេលដែលវិមានក្រឹមឡាំងកំពុងបង្កើនការវាយលុកទៅលើប្រទេសអ៊ុយក្រែន ដែលមានទាហានបម្រុងរាប់ម៉ឺននាក់កំពុងរង់ចាំបញ្ជាឱ្យចូលប្រយុទ្ធក្នុងពេលខាងមុខ។ ទីក្រុងមូស្គូថ្មីៗនេះបានប្រកាសពីជោគជ័យលើការដណ្តើមបានទីក្រុង Soledar ភាគខាងកើតអ៊ុយក្រែនពីដៃកងកម្លាំងកៀវវិញ ដែលវាជាជ័យជំនះលើកទីមួយលើសមរភូមិរយៈជាង១១ខែមកនេះ ក្រោយពីបានដកថយជាបន្តបន្ទាប់កាលពីពេលកន្លងទៅ៕
