លោក ពូទីន បានធ្វើការអត្ថាធិប្បាយទៅកាន់អ្នកសារព័ត៌មានក្នុងស្រុករុស្ស៊ីមួយថ្ងៃបន្ទាប់ពីប្រធានាធិបតីអ៊ុយក្រែន លោក ហ្សេលេនស្គី បានធ្វើដំណើរទៅជួបលោក ចូ បៃដិន នៅសេតវិមាន ក៏ដូចជាសមាជិកសភាអាមេរិកផ្សេងទៀត ដើម្បីស្នើសុំការគាំទ្រទាំងថវិកា និងយោធាជាដើម។
លោកពូទីនបាននិយាយថា «គោលដៅរបស់ទីក្រុងម៉ូស្គូ គឺមិនមែនដើម្បីពង្រីកជម្លោះយោធានោះទេ ប៉ុន្តែផ្ទុយទៅវិញ គឺដើម្បីបញ្ចប់សង្គ្រាមនេះ ហើយរុស្ស៊ីនឹងខិតខំបញ្ចប់រឿងនេះ ឱ្យកាន់តែឆាប់កាន់តែល្អ»។
យ៉ាងណាក៏ដោយ អ្នកនាំពាក្យសេតវិមានអាមេរិក លោក ចន ខឺប៊ី (John Kirby) បាននិយាយដោយគ្មានសង្ឃឹមថា ទីក្រុងម៉ូស្គូមិនបានបង្ហាញពីឆន្ទៈក្នុងការចរចា ដើម្បីបញ្ចប់សង្គ្រាមនោះទេមកទល់នឹងម៉ោងនេះ ចាប់តាំងពីកងទ័ពរុស្ស៊ីបានចូលលុកលុយប្រទេសអ៊ុយក្រែនកាលពីខែកុម្ភៈមក។
លោក Kirby បានបន្ថែមទៀតថា ផ្ទុយទៅវិញ អ្វីគ្រប់យ៉ាងដែលលោក ពូទីនកំពុងធ្វើទាំងនៅលើដី និងនៅលើអាកាស គឺសបង្ហាញយ៉ាងច្បាស់ក្រឡែតថា រុស្ស៊ីកំពុងធ្វើឱ្យប្រជាជនអ៊ុយក្រែនឈឺចាប់ និងកំពុងពង្រីកជម្លោះឱ្យកានតែធំ។
អត្ថបទគួរអាន
ទន្ទឹមនឹងគ្នានេះ អ្នកនាំពាក្យសេតវិមានរូបនេះបានគូសបញ្ជាក់ឡើងវិញថា ប្រធានាធិបតីអាមរិកលោក បៃដិន នៅតែបន្តបើកផ្លូវសម្រាប់កិច្ចចរចាសន្តិភាពជាមួយលោក ពូទីន ប៉ុន្តែប្រធានាធិបតីរុស្ស៊ីរូបនេះបានបង្ហាញពីជំហរ «មិនមានបំណងចរចា» បន្ទាប់ពីការពិគ្រោះយោបល់ជាមួយអ៊ុយក្រែន និងសម្ព័ន្ធមិត្តរបស់សហរដ្ឋអាមេរិក។
រុស្ស៊ីតែងតែអះអាង ខ្លួននៅតែបន្តបើកចំហរសម្រាប់ការចរចា ប៉ុន្តែអ៊ុយក្រែន និងសម្ព័ន្ធមិត្ត សង្ស័យថា លោកពូទីន មានផែនការចរចាដើម្បីទិញពេលវេលាបន្ទាប់ពីការបរាជ័យ និងការដកថយជាបន្តបន្ទាប់របស់ខ្លួនតែប៉ុណ្ណោះ។
យ៉ាងណាក៏ដោយចុះ លោក ពូទីន ក៏បានប្រាប់អ្នកយកព័ត៌មានក្នុងទីក្រុងម៉ូស្គូថា៖ ការកើនឡើងនៃអរិភាពមានតែនាំទៅរកការខាតបង់ដោយអយុត្តិធម៌តែប៉ុណ្ណោះ»។ «ជម្លោះប្រដាប់អាវុធទាំងអស់តែងត្រូវបញ្ចប់តាមមធ្យោបាយមួយ ឬវិធីផ្សេងទៀតដោយការចរចាមួយចំនួនលើផ្លូវការទូត» ហើយមិនយូរមិនឆាប់ ភាគីណាមួយក្នុងស្ថានភាពជម្លោះ នឹងចូលតុអង្គុយចរចា ដើម្បីកិច្ចព្រមព្រៀងសន្តិភាព ហើយរុស្ស៊ីមិនបោះបង់ការចរចាចោលទេ»។
ទន្ទឹមនឹងការលើកឡើងពីការចរចាបញ្ចប់សង្គ្រាម លោក ពូទីន ក៏នៅឆ្លៀតនិយាយឌឺដងផ្លែផ្កាដាក់អាមេរិក ជុំវិញការផ្គត់ផ្គង់របស់ទីក្រុងវ៉ាស៊ីនតោននូវប្រព័ន្ធខែលការពារមីស៊ីលដែនអាកាស Patriot ទៅឱ្យអ៊ុយក្រែន ដោយលោកពូទីនថា វាចាស់ណាស់ ហើយវាមិនដំណើរការដូចប្រព័ន្ធ S-300 របស់រុស្ស៊ីទេ។ លោក ពូទីន ក៏បាននិយាយផងដែរថា ការកំណត់តម្លៃលើប្រេងរបស់រុស្ស៊ីដោយបណ្តាប្រទេសលោកខាងលិច ដែលរៀបចំឡើង ដើម្បីកំណត់ប្រាក់ចំណូលម៉ូស្គូក្នុងការផ្គត់ផ្គង់ក្នុងសង្គ្រាមនោះ គឺនឹងមិនធ្វើឱ្យខូចសេដ្ឋកិច្ចរុស្ស៊ីឡើយ ហើយនៅសប្តាហ៍ក្រោយនេះ លោកនឹងចុះហត្ថលេខាលើក្រឹត្យដើម្បីឆ្លើយតបនឹងការកំណត់តម្លៃប្រេងរុស្ស៊ីនេះផងដែរ៕
