ក្នុងបទសម្ភាសន៍ដោយទូរទស្សន៍រដ្ឋរុស្ស៊ី រដ្ឋមន្ត្រីការបរទេស សឺរីហ្កី ឡាវរ៉ូវ(Sergei Lavrov) ត្រូវបានចោទសួរថា តើមានភាពចាំបាច់អ្វីខ្លះដែលគេត្រូវធ្វើដើម្បីបញ្ចៀសសង្គ្រាមលោកលើកទីបី? ហើយថាតើស្ថានភាពបច្ចុប្បន្នអាចប្រៀបធៀបទៅនឹងវិបត្តិមីស៊ីលនៅគុយបាឆ្នាំ ១៩៦២ បានដែរឬទេ?
ប្រមុខការទូតរុស្ស៊ីរូបនេះឆ្លើយថា ហានិភ័យនៅក្នុងពេលឥឡូវនេះ គឺមានច្រើនច្រើនលើសលុបណាស់។ រដ្ឋមន្ត្រីការបរទេសរុស្ស៊ីបន្ថែមទៀតថា លោកមិនចង់និយាយអ្វីច្រើនដោយគ្មានអំណះអំណាងនោះទេ ប៉ុន្តែមនុស្សជាច្រើនបានឃើញស្រាប់ហើយ។ គ្រោះថ្នាក់ គឺនឹងមានធ្ងន់ធ្ងរណាស់ ហើយវាពិតប្រាកដថែមទៀត គេមិនត្រូវមើលស្រាលវាឡើយ។
ជុំវិញការអះអាងពីភាគីរុស្ស៊ីនេះ រដ្ឋមន្ត្រីការបរទេសអ៊ុយក្រែន លោក ឌីមេទ្រី គូឡេបា(Dmytro Kuleba) បានចាត់ទុកការអះអាងពីទីក្រុងម៉ូស្កូថា ជាការបំភិតបំភ័យ ហើយលោកបានចាត់ទុកការគំរាមនេះ ថាជាសញ្ញានៃភាពទន់ខ្សោយរបស់រុស្ស៊ី ជ្រើសយកវិធីគំរាមមកប្រើប្រាស់។
គួរជម្រាបថា ការព្រមានរបស់រុស្ស៊ីនេះធ្វើឡើងនៅបន្ទាប់ពីប្រទេសលោកខាងលិច បាននិងកំពុងបង្កើនការផ្តល់សព្វាវុធដល់អ៊ុយក្រែន ខណៈដែលបច្ចុប្បន្នប្រទេសធំៗជាច្រើនពិសេសសហរដ្ឋអាមេរិក បានផ្តល់សព្វាវុធធន់ធ្ងន់ និងទំនើបៗដល់កងទ័ពអ៊ុយក្រែន ហើយថែមទាំងកំពុងបង្ហាត់បង្រៀនឲ្យចេះប្រើប្រាស់ស្ទាត់ជំនាញថែមទៀត។
គួររំឭកថា កាលពីថ្ងៃទី២៤មេសាអំឡុងពេលបំពេញទស្សនកិច្ចនៅទីក្រុងកៀវ រដ្ឋមន្ត្រីការបរទេសសហរដ្ឋអាមេរិក លោក អាន់តូនី ប្លីងខេន(Antony Blinken) និងរដ្ឋមន្ត្រីការពារជាតិ ឡយ អូស្ទីន(Lloyd Austin) បានសន្យាផ្តល់ជំនួយយោធាបន្ថែមទៀតសម្រាប់អ៊ុយក្រែន។
អត្ថបទគួរអាន
បន្ថែមពីលើការផ្តល់ឲ្យនេះ ក្រសួងការបរទេសសហរដ្ឋអាមេរិកកាលពីថ្ងៃចន្ទ បានចេញសេចក្តីប្រកាសបន្ទាន់មួយដើម្បីអនុម័ត លក់គ្រាប់កាំភ្លើងក្នុងតម្លៃ ១៦៥លានដុល្លារទៅឱ្យអ៊ុយក្រែនផងដែរ។ មន្ទីរបញ្ចកោណបាននិយាយថា ការលក់គ្រាប់កាំភ្លើងនេះ អាចរួមបញ្ចូលទាំងគ្រាប់ សម្រាប់កាំភ្លើងធំ គ្រាប់កាំភ្លើងធំរបស់រថក្រោះ និងឧបករណ៍បាញ់គ្រាប់បែកដៃផងដែរ។
ឯកអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន បានប្រាប់សហរដ្ឋអាមេរិកឱ្យបញ្ឈប់ការបញ្ជូន សព្វាវុធដល់អ៊ុយក្រែនជាបន្ទាន់ ដោយព្រមានថា សព្វាវុធរបស់លោកខាងលិចទាំងនេះ ប្រៀបដូចជាសាំងចាក់ទៅលើភ្លើងជម្លោះដែលកំពុងតែឆាបឆេះដូច្នោះដែរ។
យ៉ាងណាក៏ដោយ សហរដ្ឋអាមេរិកគ្រោងនឹងធ្វើជាម្ចាស់ផ្ទះនៃកិច្ចប្រជុំមួយ ដែលរំពឹងថានឹងមានវត្តមាន ៤០ប្រទេសចូលរួមនៅសប្តាហ៍នេះ សម្រាប់កិច្ចពិភាក្សាយោធា ដែលនឹងផ្តោតលើការផ្តល់អាវុធដល់ អ៊ុយក្រែនបន្តទៀត។
សូមជម្រាបថា ការលុកលុយរបស់រុស្ស៊ីរយៈពេលជាងពីរខែមកលើអ៊ុយក្រែន ជាការវាយប្រហារដ៏ធំបំផុតលើប្រទេសក្នុងតំបន់អឺរ៉ុប គិតចាប់តាំងពីក្រោយសង្គ្រាមលោកលើកទី២មក។ សង្គ្រាមនេះ បានធ្វើឱ្យមនុស្សរាប់ពាន់នាក់ស្លាប់ ឬរងរបួស បំផ្លិចបំផ្លាញទីក្រុង ហេដ្ឋរចនាសម្ព័ន្ធយ៉ាងសន្ធឹកសន្ធាប់ និងបង្ខំឲ្យមនុស្សជាង ៥លាននាក់ភៀសខ្លួនទៅក្រៅប្រទេស ខណៈជាង៧លាននាក់ផ្សេងទៀត គ្មានផ្ទះសម្បែងរត់ភៀសខ្លួននៅក្នុងប្រទេស៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
