ភាពជោគជ័យផ្នែកបច្ចេកទេសចុងក្រោយនឹងឈានដល់ប្រតិបត្តិការហោះហើរផ្លូវការនាពេលខាងមុខ

មន្ត្រីជាន់ខ្ពស់នៃរដ្ឋាលេខាធិការដ្ឋានអាកាសចរណ៍ស៊ីវិល បានគូសបញ្ជាក់ថា អាកាសយានដ្ឋានអន្តរជាតិសៀមរាបអង្គរ បានបញ្ចប់ការសាកល្បងបច្ចេកទេស និងការទទួលជើងហោះហើរចុងក្រោយដោយរលូន និងជោគជ័យ។ បើគ្មានការប្រែប្រួលទេ អាកាសយានដ្ឋានអន្តរជាតិ ដែលមានតម្លៃវិនិយោគជាង១ពាន់លានដុល្លារអាមេរិកមួយនេះ នឹងដាក់ឲ្យដំណើរការដំណាក់កាលទី១ នៅពាក់កណ្តាលខែតុលា។

នៅព្រឹកថ្ងៃទី៥ ខែតុលា ឆ្នាំ២០២៣ អាកាសយានដ្ឋានអន្តរជាតិសៀមរាបអង្គរ បានធ្វើតេស្តបើកទទួលជើងហោះហើរមិនមែនពាណិជ្ជកម្មចំនួនបីជើងព្រមគ្នាក្នុងរយៈពេលមួយម៉ោង។ ជើងហោះហើរទាំងនោះរួមមានក្រុមហ៊ុនអាកាសចរណ៍ Sky Angkor Airlines ហោះមកពីអាកាសយានដ្ឋានអន្តរជាតិភ្នំពេញ, ក្រុមហ៊ុន Cambodia Airways ហោះមកពីអាកាសយានដ្ឋានអន្តរជាតិក្រុងព្រះសីហនុ និងក្រុមហ៊ុន China Eastern Airlines ហោះមកពីអាកាសយានដ្ឋានអន្តជាតិគុនមីង នៃសាធារណរដ្ឋប្រជាមានិតចិន។ លទ្ធផលនៃការសាកល្បងទទួលជើងហោះហើរមិនមែនពាណិជ្ជកម្មនេះបានប្រព្រឹត្តទៅដោយរលូន និងជោគជ័យ។

ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបានវាយតម្លៃខ្ពស់លើដំណើរការបញ្ជាចរាចរដែនអាកាស និងបច្ចេកទេសពាក់ព័ន្ធដ៏ទៃទៀត ស្របតាមស្តង់ដាអន្តរជាតិ ចែងដោយអង្គការអាកាសចរស៊ីវិលអន្តរជាតិ។ ឯកឧត្តមបណ្ឌិតចាត់ទុកអាកាសយានដ្ឋាននេះ គឺជាសមិទ្ធផលហេដ្ឋារចនាសម្ព័ន្ធដ៏ថ្មីសឡាង ដែលនឹងចូលរួមចំណែកពង្រឹង និងពង្រីកសេវាកម្មដឹកជញ្ជូនអ្នកដំណើរ និងទំនិញតាមផ្លូវអាកាសពីប្រទេសកម្ពុជាទៅកាន់តំបន់ឆ្ងាយៗ និងក្នុងតំបន់ តាម រយៈការអនុញ្ញាតឱ្យយន្តហោះធុនមធ្យម និងធំដូចជា Airbus 350, Airbus 330 ឬ Boeing 787-900 អាចចុះចតបាន។ ទន្ទឹមនឹងនេះ អាកាសយានដ្ឋានអន្តរជាតិសៀមរាបអង្គរ នឹងចូលរួមចំណែកផងដែរ ដល់កំណើនសេដ្ឋកិច្ចកម្ពុជារយៈពេលវែងប្រកបដោយចីរភាព ជាពិសេសបង្កើនសមត្ថភាពប្រកួតប្រជែងរបស់កម្ពុជាក្នុងបរិការណ៍ នៃសមាហរណកម្មសេដ្ឋកិច្ចតំបន់អាស៊ាន និងពិភពលោក។

អាកាសយានដ្ឋានអន្តរជាតិសៀមរាបអង្គរ ដែលមានតម្លៃវិនិយោគចំនួន១,១០០លានដុល្លារអាមេរិក មានចំណតសម្រាប់ចតអាកាសយាន ចំនួន៣៨ចំណត និងមានសមត្ថភាពទទួលអ្នកដំណើរតាមផ្លូវអាកាសបាន៧លាននាក់ក្នុងឆ្នាំ២០២៤ និង១២លាននាក់ ក្នុងឆ្នាំ២០៤០។ ទន្ទឹមគ្នានេះ ក៏មានសមត្ថភាពផ្ទុកទំនិញតាមផ្លូវអាកាសបានចំនួន១ម៉ឺនតោន ក្នុងឆ្នាំ២០២៤ និង២ម៉ឺន៦ពាន់តោន ក្នុងឆ្នាំ២០៤០ ហើយអាចទទួលជើងហោះហើរបានជាង៦ម៉ឺន៥ពាន់ជើង ក្នុងឆ្នាំ២០២៤ និងជាង១១ម៉ឺនជើងនៅឆ្នាំ​២០៤០។

តាមគម្រោងអាកាសយានដ្ឋានអន្តរជាតិ សៀមរាបអង្គរ នឹងត្រូវសម្ពោធដាក់ឱ្យដំណើរការហោះហើរជាតិ និងអន្តរជាតិក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅថ្ងៃទី១៦ ខែតុលា ឆ្នាំ២០២៣ខាងមុខនេះ៕

អត្ថបទ ៖ បូ ដូឡា​