តើមានកត្តាអ្វីខ្លះ ដែលជំរុញឲ្យកំពង់ផែដ៏ធំបំផុតរបស់កម្ពុជាមួយនេះ សម្រេចបានកំណើនប្រាក់ចំណេញខ្ពស់យ៉ាងដូច្នេះ? ហើយចរន្ដនៃការដឹកជញ្ជូនតាមកំពង់ផែមានការធូរស្រាល ឬមមាញឹកយ៉ាងណាខ្លះ?
កំពង់ផែស្វយ័តព្រះសីហនុនៅត្រីមាសទី២ ឆ្នាំនេះ សម្រេចបានប្រាក់ចំណូលជាង២០លានដុល្លារ កើនឡើងជាង៦% បើធៀបនឹងរយៈពេលដូចគ្នាកាលពីឆ្នាំមុន ខណៈប្រាក់ចំណេញវិញបានហក់ឡើងដល់ដល់ទៅប្រមាណ១០លានដុល្លារ កើនជិត២២០%ឯណោះ។
បើតាមការគូសបញ្ចាក់ពីកំពង់ផែស្វយ័តក្រុងព្រះសីហនុ ការកើនឡើងនៃចំណូលនេះដែរ គឺដោយសារតែបរិមាណទំនិញ និងបរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុមានការកើនឡើង។ ប៉ុន្ដែ ការចំណាយលើប្រតិបត្តិការមានការកើនបានធ្វើឲ្យប្រាក់ចំណេញប្រតិបត្តិការមានការថយចុះ។ ដោយឡែក ប្រាក់ចំណេញសុទ្ធមានការហក់កើនឡើងខ្ពស់នេះ ក៏ដោយសារតែមានការចំណេញពីអត្រាប្ដូរប្រាក់យ៉េន មានការកើនឡើង បើធៀបនឹងត្រីមាសទី២ កាលពីឆ្នាំ២០២១។
ពាក់ព័ន្ធនឹងការដឹកជញ្ជូនទំនិញតាមកំពង់ផែសមុទ្រវិញ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែចង្វាក់ផ្គត់ផ្គង់នៅកម្ពុជាបានគូសបញ្ជាក់ថា តម្លៃដឹកជញ្ជូនទំនិញតាមកប៉ាល់នាពេលបច្ចុប្បន្ន គឺមិនមានការធ្លាក់ថ្លៃ និងមិនមានការកកស្ទះទំនិញ ឬ ទូកុងតឺន័រដូចពីមុននោះទេ ពោលគឺតម្លៃមានការធ្លាក់ចុះប្រមាណ ២ដងឯណោះ ដោយពីមុនតម្លៃដឹកជញ្ជូនក្នុងមួយទូកុងតឺន័រ មានតម្លៃប្រមាណជិត ២ម៉ឺនដុល្លារ ប៉ុន្តែបច្ចុប្បន្ន តម្លៃដឹកជញ្ជូនចុះមកសល់ត្រឹមតែប្រមាណ ៨ពាន់ ទៅ ៩ពាន់ដុល្លារប៉ុណ្ណោះក្នុងមួយទូកុងតឺន័រ។
អត្ថបទគួរអាន
លោក ជា ចាន់ដារ៉ា បានបញ្ជាក់បន្ថែមថា កាលពីមុនដោយសារបញ្ហាកូវីដ១៩ បានធ្វើឲ្យទំនិញមានការកកស្ទះក្នុងការនាំចេញ ប៉ុន្តែចាប់តាំងពីស្ថានភាពកូវីដ១៩ នៅកម្ពុជាមានការថមថយមក និងនៅតាមបណ្តាប្រទេសមួយចំនួនបានបើកដំណើរការប្រទេសរបស់ខ្លួនឡើងវិញនោះ បានធ្វើឲ្យការនាំចេញនំនិញកម្ពុជាចាប់ផ្តើមសម្រុកនាំចេញច្រើនគួរឲ្យកត់សម្គាល់។
សូមជម្រាបថា កំពង់ផែស្វយ័តក្រុងព្រះសីហនុ មានទំនិញឆ្លងកាត់ចំនួនប្រមាណ ៦លាន៩សែនតោន កើនឡើង ប្រមាណ៦% នៅក្នុងឆ្នាំ២០២១ និងសម្រេចបានចំណូលសរុបចំនួនប្រមាណ ៣៧៣ពាន់លានរៀល ឬ្មើនឹងប្រហែល៩០លានដុល្លារ កើនឡើងជាង១៧% បើធៀបនឹងការអនុវត្តក្នុងឆ្នាំ២០២០។ នេះបើយោងតាមការបញ្ជាក់ពីរដ្ឋមន្រ្តីក្រសួងសាធារណការ និងដឹកជញ្ជូន៕
