ក្រុមមេដឹកនាំកោះតៃវ៉ាន់ប្រកាសថា នឹងបរិច្ចាគប្រាក់ខែផ្ទាល់ខ្លួន សម្រាប់កិច្ចប្រឹងប្រែងជួយសង្គ្រោះអ៊ុយក្រែន

កោះតៃវ៉ាន់សម្ដែងការអាណិតអាសូរយ៉ាងខ្លាំង ចំពោះការផ្ទុះសង្គ្រាម​នៅអ៊ុយក្រែនសម្រាប់ប្រជាជន អ៊ុយក្រែនផ្ទាល់ ដោយសារតែកោះតៃវ៉ាន់នេះ អាចដឹងបានពីការលំបាករបស់ពលរដ្ឋ​អ៊ុយក្រែន ព្រោះថា​ខ្លួនក៏ធ្លាប់ទទួលបានរង​នូវការ​គំរាមកំហែង​ប្រឈមមុខជាប្រចាំថ្ងៃពី​សំណាក់​រដ្ឋាភិបាល​ចិនផងដែរ។ ដូចដែលបានដឹងថា ទីក្រុងប៉េកាំងចាត់ទុកតៃវ៉ាន់ជាទឹកដីរបស់ខ្លួន ហើយតែងតែ​បានបង្កើន​សម្ពាធយោធា​របស់ខ្លួនជាច្រើនលើកច្រើនសារ​ទៅ ​លើកោះមួយនេះ។

តៃវ៉ាន់បានបញ្ជូនជំនួយដំបូងរបស់ខ្លួនក្នុងទម្រង់ជាការផ្គត់ផ្គង់​វេជ្ជសាស្រ្ត​ចំនួន ២៧ តោនទៅកាន់ប្រទេសអ៊ុយក្រែនផងដែរ កាលពីពេលថ្មីៗនេះ។ ជាមួយគ្នានេះ លោកស្រី សៃ អ៊ីនវេន បាននិយាយថា កម្លាំងនៃលទ្ធិប្រជាធិបតេយ្យពិភពលោកដែលគាំទ្រអ៊ុយក្រែន​កំពុងមានការកើនឡើងខ្លាំង ខណៈរុស្ស៊ីហៅ សកម្មភាពរបស់ខ្លួន​នៅអ៊ុយក្រែនថា​ ជាប្រតិបត្តិការពិសេស។  ក្នុងនាមជា​សមាជិក​នៃដៃគូសកល​នៃលទ្ធិប្រជាធិបតេយ្យ តៃវ៉ាន់​នឹងមិន​អវត្តមានទេ ហើយតែវ៉ាន់​នឹងគាំទ្រអ៊ុយក្រែន​យ៉ាងពេញទំហឹង។

គួរជម្រាបថា ក្រសួងការបរទេសតៃវ៉ាន់​នឹងផ្តល់ព័ត៌មានលម្អិត​នៃគណនី​ធនាគារ​ដែលបង្កើតឡើងដោយសមាគម​សង្គ្រោះគ្រោះមហន្តរាយរបស់តៃវ៉ាន់ សម្រាប់ការបរិច្ចាគ​ជំនួយសង្គ្រោះអ៊ុយក្រែន តាមរយៈការបរិច្ចាគប្រាក់បៀវត្សរ៍ប្រចាំខែក្រុមមេដឹកនាំតៃវ៉ាន់ ខណៈដែល មេដឹកនាំតៃវ៉ាន់ម្នាក់ៗត្រូវបានគេដឹងថា ទទួលបានប្រាក់បៀវត្សរ៍ជាង ១ម៉ឺន ៥ពាន់ដុល្លារ ក្នុងមួយខែ។ មន្ត្រីជាន់ខ្ពស់កោះតៃវ៉ាន់ បាននិយាយថា ខ្លួនបានស្នើសុំការិយាល័យទូតរបស់ខ្លួននៅទីក្រុង Warsaw ប្រទេសប៉ូឡូញ និងអង្គការមិនមែនរដ្ឋាភិបាលដែលបានជ្រើសទុកជាមុន ឱ្យជួយចែកចាយ​មូលនិធិ​ដើម្បីជួយជនភៀសខ្លួនអ៊ុយក្រែនផងដែរ។

ក្រៅពីនេះ តៃវ៉ាន់កាលពីសប្តាហ៍មុនក៏បានប្រកាសថា ខ្លួនត្រូវបានចូលរួមដោយការដាក់ទណ្ឌកម្មលើរុស្ស៊ីផងដែរ បើទោះបីជាពាណិជ្ជកម្មផ្ទាល់ខ្លួនជាមួយប្រទេសនេះមានតិចតួចក៏ដោយ៕ 

 អត្ថបទ ស៊ើង និមល់