លោក William Lai ដែលជាបេក្ខជនប្រធានាធិបតីជួរមុខសម្រាប់ការបោះឆ្នោតនាខែមករាខាងមុខ បន្ទាប់ពីលោកស្រីសៃ អ៊ុនវេន បានប្រកាសពីដំណើរមកកាន់ទឹកដីសហរដ្ឋអាមេរិក ដើម្បីចុះចត និងឈប់សម្រាក មុននឹងបន្តដំណើរទៅកាន់ទៅកាន់ប្រទេសប៉ារ៉ាហ្គាយ ដើម្បីពិធីស្បថចូលកាន់តំណែងប្រធានាធិបតីរបស់នេះនៅសប្តាហ៍ក្រោយ។
ទោះយ៉ាងណា បើយោងតាមក្រុមមន្ត្រីតៃវ៉ន់ឱ្យដឹងថា ទាំងតៃវ៉ាន់ និងសហរដ្ឋអាមេរិកមិនបានផ្តល់ព័ត៌មានលម្អិតច្បាស់លាស់អំពីកាលវិភាគថានឹងអាចជួបមន្ត្រីអាមេរិកណានោះទេ ក្នុងអំឡុងពេលលោកឈប់សម្រាកនៅទីក្រុងញូវយ៉កនេះ។ តែយ៉ាងណា លោកស្រី Laura Rosenberger ប្រធានវិទ្យាស្ថានអាមេរិចនៅតៃវ៉ាន់ (AIT) ដែលជាអង្គការគ្រប់គ្រងដោយរដ្ឋាភិបាលសហរដ្ឋអាមេរិក អនុវត្តលើទំនាក់ទំនងក្រៅផ្លូវការជាមួយតៃវ៉ាន់បាននិយាយថា គាត់នឹងជាមួយលោក Lai នៅទីក្រុង San Francisco។
អត្ថបទគួរអាន
តាមប្រភពពីមន្ត្រីតៃវ៉ាន់ដដែល ប្រទេសចិនទំនងជានឹងចាប់ផ្តើមសមយុទ្ធយោធានៅសប្តាហ៍ក្រោយនៅជិតកោះតៃវ៉ាន់ ដោយប្រើការឈប់សម្រាករបស់លោក Lai នៅសហរដ្ឋអាមេរិក ជាលេសដើម្បីបំភិតបំភ័យប្រជាជនតៃវ៉ាន់ មុនការបោះឆ្នោតនៅឆ្នាំក្រោយ។ ប៉ុន្តែមុនចាកចេញពីតៃវ៉ាន់ លោក William Lai បានប្រាប់អ្នកយកព័ត៌មានថា លោកនឹងទៅទីក្រុងញូវយ៉កសិន តែមិនមានអ្វីលើសពីដំណើរចុះចតឡើយ។ លោកបាននិយាយថា លោកនឹងប្រើប្រាស់ដំណើរទស្សនកិច្ចនៅប៉ារ៉ាហ្គាយមិនត្រឹមតែធ្វើឱ្យទំនាក់ទំនងកាន់តែស៊ីជម្រៅជាមួយប្រទេសនេះប៉ុណ្ណោះទេ ប៉ុន្តែថែមបង្កើនទំនុកចិត្តលើខ្លួនឯងជាមួយប្រទេសផ្សេងទៀត និងជួបជាមួយគណៈប្រតិភូមកពីដៃគូដែលមានគំនិតដូចគ្នា។ ការណ៍នេះនឹងអនុញ្ញាតឱ្យសហគមន៍អន្តរជាតិយល់ថា «តៃវ៉ាន់ជាប្រទេសដែលប្រកាន់ខ្ជាប់នូវលទ្ធិប្រជាធិបតេយ្យ សេរីភាព និងសិទ្ធិមនុស្ស និងចូលរួមយ៉ាងសកម្មក្នុងកិច្ចការអន្តរជាតិ»។
ប្រភពបីបានប្រាប់រ៉យទ័រថា រដ្ឋបាលលោក Biden មានបំណងចង់រក្សាដំណើរទស្សនកិច្ចរបស់លោក Lai ឱ្យមានលក្ខណៈស្ងប់ស្ងាត់ ដើម្បីកុំឱ្យមានភាពតានតឹងនៅមុនការបោះឆ្នោតរបស់តៃវ៉ាន់ និងដើម្បីរក្សាសន្ទុះប្រក្រតីភាពនៃទំនាក់ទំនងចិន និងអាមេរិកនាពេលថ្មីៗនេះ។ ក្នុងនោះ រួមបញ្ចូលទាំងការរំពឹងទុកនៃដំណើរទស្សនកិច្ចទៅកាន់សហរដ្ឋអាមេរិករបស់រដ្ឋមន្ត្រីការបរទេសចិនលោក Wang Yi ដែលអាចត្រួសត្រាយផ្លូវសម្រាប់កិច្ចប្រជុំរវាងប្រធានាធិបតីអាមេរិក Joe Biden និងមេដឹកនាំចិន Xi Jinping នៅឆ្នាំនេះផងដែរ៕
