អាជ្ញាធរកោះតៃវ៉ាន់បានព្យាយាមចរចាអស់រយៈពេលជាច្រើនខែ ដើម្បីទិញវ៉ាក់សាំងដោយផ្ទាល់ពីក្រុមហ៊ុនអាល្លឺម៉ង់ BioNTech ទើបតែនៅ ថ្ងៃចន្ទដើមសប្ដាហ៍នេះ ក្រុមហ៊ុនតៃវ៉ាន់ Foxconn និង TSMC បានបញ្ជាក់ថា ពួកគេបានឈានដល់កិច្ចព្រមព្រៀងដើម្បីទិញវ៉ាក់សាំងកូវីដ-១៩ BioNTech របស់ប្រទេសអាឡឺម៉ង់ ចំនួន១០លានដូស។
ប្រឈមមុខនឹងសម្ពាធសាធារណៈ ទាក់ទងនឹងការយឺតយ៉ាវកម្មវិធីចាក់វ៉ាក់សាំង កាលពីខែមុន អាជ្ញាធរកោះតៃវ៉ាន់ ក៏បានអនុញ្ញាតឲ្យស្ថាបនិកក្រុមហ៊ុន Foxconn គឺលោក Terry Gou ក៏ដូចជាក្រុមហ៊ុន TSMC ចរចាតំណាងឲ្យអាជ្ញាធរកោះតៃវ៉ាន់ដើម្បីចរចាទិញវ៉ាក់សាំងដោយផ្ទាល់ពីក្រៅបរទេស។
លោកហ្គូ ស្ថាបនិក ក្រុមហ៊ុនក្រុមហ៊ុន Foxconn បានបញ្ជាក់នៅលើទំព័រហ្វេសប៊ុករបស់លោកថា លោកមានការពេញចិត្តនឹងកិច្ចព្រមព្រៀងដែលបានចុះហត្ថលេខា ហើយលោកបានបញ្ជាក់ទៀតថា ក្រុមហ៊ុន Foxconn និង TSMC ក្នុងម្នាក់ៗនឹងទិញ ៥ លានដូសដើម្បីយកទៅបរិច្ចាគដល់អាជ្ញាធរកោះតៃវ៉ាន់ សម្រាប់ចាក់ជូនប្រជាពលរដ្ឋក្នុងការបង្កើនទំនុកចិត្ត និងទប់ស្កាត់ការរីករាលដាលនៃជម្ងឺកូវីដ-១៩។
អត្ថបទគួរអាន
កោះតៃវ៉ាន់ក៏បានបញ្ជាទិញវ៉ាក់សាំងជាច្រើនពីក្រុមហ៊ុន AstraZeneca របស់អង់គ្លេស និងក្រុមហ៊ុន Moderna របស់អាមេរិកជាដើម ខណៈដែលអាមេរិក និងជប៉ុនថ្មីៗនេះ ទើបតែបានបរិច្ចាគវ៉ាក់សាំង៥លានដូសរួចហើយដែរមកឲ្យកោះតៃវ៉ាន់នេះ ដើម្បីជួយពន្លឿនការចាក់វ៉ាក់សាំង។
តាមរយៈកិច្ចចរចាវ៉ាក់សាំងចំនួនដំបូងអាចនឹងបញ្ជូនមកដល់នៅខែកញ្ញាខាងមុខ ប៉ុន្ដែ មិនទាន់ច្បាស់ថានឹងមានចំនួនប៉ុន្មាននោះទេ។នេះបើតាមការចុះផ្សាយពីទីភ្នាក់ងារសារព័ត៌មានរ៉យទ័រ។
សូមជម្រាបដែរថា ការរីករាលដាលជម្ងឺកូវីដ១៩នៅកោះតៃវ៉ាន់ដ្បិតថា មានកើនឡើងច្រើន ប៉ុន្ដែ គឺស្ថិតក្នុងចំនួនមួយដែលអាចគ្រប់គ្រងបាននៅឡើយទេ ខណៈដែលបច្ចុប្បន្ន មានពលរដ្ឋកោះតៃវ៉ាន់ប្រមាណ១០%ប៉ុណ្ណោះនៃប្រជាជនសរុបជាង ២៣ លាននាក់ ដែលបានទទួលវ៉ាក់សាំង១ដូស៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
