លោក ស៊ូមេត ប្រាសុងផុនឆៃ (Sumed Prasongpongchai) នាយករងនៃវិទ្យាស្ថានត្បូងនិងគ្រឿងអលង្ការថៃ បាននិយាយថា តម្លៃនៃការនាំចេញគ្រឿងអលង្ការបស់ថៃចាប់ពីខែមករា ដល់ខែមេសា ឆ្នាំ២០២៣ គឺមានតម្លៃជិត ៣ ពាន់លានដុល្លារ ដោយបានកើនឡើងជាង ៥ ភាគរយ បើប្រៀបធៀបរយៈពេលដូចគ្នាក្នុងឆ្នាំ ២០២២។
ប៉ុន្តែ បើគិតតែខែមេសា ឆ្នាំ២០២៣, ការនាំចេញត្បូងនិងគ្រឿងអលង្ការរបស់រាជាណាចក្រមួយនេះ បានធ្លាក់ចុះជិត ៣០ ភាគរយ បើប្រៀបធៀបនឹងខែមេសា ឆ្នាំ២០២២ ដោយសារសេដ្ឋកិច្ចពិភពលោកបន្ថយល្បឿន។
លោក ស៊ូមេត បានប្រាប់សារព័ត៌មាន The Nation ថា វិបត្តិហិរញ្ញវត្ថុនៅសហរដ្ឋអាមេរិក និងអឺរ៉ុបបានជះឥទ្ធិពលយ៉ាងធ្ងន់ធ្ងរដល់តម្រូវការត្បូង និងគ្រឿងអលង្ការ។ លោកបានលម្អិតថា ការនាំចេញត្បូងនិងគ្រឿងអលង្ការរបស់ប្រទេសថៃក្នុងខែមេសាមានតម្លៃត្រឹមតែ ៤៥១ លានដុល្លារធ្លាក់ចុះ ២៨,៨៥ ភាគរយ។
អត្ថបទគួរអាន
លោកនាយករងនៃវិទ្យាស្ថានត្បូងនិងគ្រឿងអលង្ការថៃ បានពន្យល់ថា ទីផ្សារនាំចេញត្បូង និងគ្រឿងអលង្ការសំខាន់ៗជាច្រើនរបស់ប្រទេសថៃកាត់បន្ថយតម្រូវការ ក្នុងចំណោមនោះសហរដ្ឋអាមេរិកធ្លាក់ចុះជិត ១១ ភាគរយ អាល្លឺម៉ង់ជិត ២១ ភាគរយ ចក្រភពអង់គ្លេសជាង ១០ ភាគរយ បែលហ្សិក ១៦ ភាគរយ ឥណ្ឌាជិត ៧០ ភាគរយ និងជប៉ុនជិត ៤ ភាគរយ។ ប៉ុន្តែការនាំចេញទៅកាន់ប្រទេសចំនួនបីបានកើនឡើង ពោលគឺអ៊ីតាលីកើនជិត ៦២ ភាគរយ កោះហុងកុង ១៦៩ ភាគរយ និងអារ៉ាប់រួម ៤៤ ភាគរយ។
លោក ស៊ូម៉េត ជឿថា ការនាំចេញត្បូងនិងគ្រឿងអលង្ការនឹងរងផលប៉ះពាល់ពីកត្តាផ្សេងៗ ដូចជាវិបត្តិហិរញ្ញវត្ថុនៅសហរដ្ឋអាមេរិកនិងអឺរ៉ុប និងការថយល្បឿនក្នុងការស្ដារសេដ្ឋកិច្ចចិន។ អ្នកជំនាញរូបនេះរំពឹងថា ការនាំចេញត្បូងនិងគ្រឿងអលង្ការរបស់ថៃនឹងអាចប្រសើរឡើងនៅពេលសេដ្ឋកិច្ចពិភពលោកងើបឡើងវិញក្នុងឆមាសទី២នៃឆ្នាំនេះ។
លោក ស៊ូម៉េត បានជំរុញឱ្យសហគ្រិនគ្រឿងអលង្ការថៃធ្វើពិពិធកម្មទីផ្សារនាំចេញ និងកាត់បន្ថយការពឹងផ្អែកលើការនាំចេញទៅកាន់ទីផ្សារធំៗ។ លោកបានផ្ដល់គំនិតថា ពួកគេគួរតែជ្រៀតចូលទីផ្សារមជ្ឈិមបូព៌ា និងទីផ្សារអនឡាញ ព្រោះពាណិជ្ជកម្មអេឡិចត្រូនិកនៅមានសក្ដានុពលកើនឡើង៕
ដោយៈ សរ សុជាតិ
