រដ្ឋាភិបាលថៃ នឹងចាប់ផ្ដើមចែកលុយដល់ពលរដ្ឋជាង៤ពាន់លានដុល្លារ នៅខែកញ្ញា នេះ

អំឡុងពេលជជែកដេញដោលជុំវិញបញ្ហាថវិកានៅព្រឹទ្ធសភាថៃ អនុរដ្ឋមន្ត្រីក្រសួងហិរញ្ញវត្ថុ លោក ជូឡាពុន អាម៉នវីវ៉ាត់ (Julapun Amornvivat) បានលើកឡើងថា រដ្ឋាភិបាលថៃ បានត្រៀមថវិកាសរុបចំនួន៤៥០ពាន់លានបាត ឬជិត១៣,៣ពាន់លានដុល្លារអាម៉េរិក សម្រាប់កម្មវិធីចែកលុយឌីជីថលរបស់ខ្លួន។

នៅក្នុងកម្មវិធីចែកលុយឌីជីថលដែលត្រូវបានផ្ដួចផ្ដើមដោយអតីតនាយករដ្ឋមន្ត្រីថៃ លោក ស៊្រីថា ថាវីស៊ីន នេះ ពលរដ្ឋថៃរហូតដល់ទៅ៥០លាននាក់នឹងមានសិទ្ធិទទួលបានលុយពីកម្មវិធីនេះ ដោយក្នុងម្នាក់ៗទទួលបានលុយឌីជីថលប្រមាណ៣០០ដុល្លារអាម៉េរិក ដែលរដ្ឋនឹងបាញ់លុយឌីជីថលនោះឱ្យតាមកម្មវិធី App សម្រាប់ចាយនៅក្នុងតំបន់មូលដ្ឋានដែលពួកគេរស់នៅ ដើម្បីជំរុញសកម្មភាពសេដ្ឋកិច្ច។

កម្មវិធីចែកលុយដល់ពលរដ្ឋនេះជាផ្នែកមួយ នៃយុទ្ធសាស្ត្រដ៏ទូលំទូលាយរបស់រដ្ឋាភិបាលថៃ ដើម្បីជំរុញសេដ្ឋកិច្ចថៃ ដែលសម្រេចបានកំណើន២,៣% ក្នុងត្រីមាសទី២ ឆ្នាំនេះ។

ទោះជាយ៉ាងណា ការផ្លាស់ប្តូររដ្ឋាភិបាលថៃ កាលពីខែមុន ក្រោយតុលាការធម្មនុញ្ញថៃ បានសម្រេចដកលោក ស៊្រីថា ថាវីស៊ីន ចេញពីតំណែងនាយករដ្ឋមន្ត្រីបានធ្វើឱ្យកម្មវិធីចែកលុយនេះមានការកែប្រែខ្លះ។

លោកស្រី ផែថុងថាន ស៊ីណាវ៉ាត់ត្រា (Paetongtarn Shinawatra) នាយករដ្ឋមន្ត្រីថ្មីរបស់ថៃ បានប្រកាសកាលពីសប្ដាហ៍មុនថា ពលរដ្ឋខ្លះជាពិសេសអ្នកដែលគ្មាន ឬមិនសូវចេះប្រើប្រាស់ទូរស័ព្ទស្មាតហ្វូននឹងទទួលបានសាច់ប្រាក់តែម្ដងជំនួសឱ្យលុយឌីជីថល។

អនុរដ្ឋមន្ត្រីក្រសួងហិរញ្ញវត្ថុថៃលោក ជូឡាពុន អាម៉នវីវ៉ាត់ (Julapun Amornvivat) បានគូសបញ្ជាក់ថា គិតមកទល់ពេលនេះមានពលរដ្ឋចំនួន៣២លាននាក់ហើយដែលបានចុះឈ្មោះសម្រាប់កម្មវិធីចែកលុយនេះរួមទាំងក្រុមពលរដ្ឋដែលងាយរងគ្រោះផងដែរ ប៉ុន្តែសម្រាប់ពលរដ្ឋដែលគ្មាន ឬមិនសូវចេះប្រើប្រាស់ទូរស័ព្ទស្មាតហ្វូននឹងទទួលបានសាច់ប្រាក់តែម្ដង។

សូមបញ្ជាក់ថា ប្រទេសថៃ ដែលមានសេដ្ឋកិច្ចធំបំផុតទី២ ក្នុងតំបន់អាស៊ាន បន្ទាប់ពីឥណ្ឌូនេស៊ី មានប្រជាជនសរុបជិត៧០លាននាក់៕

ដោយ: តែម សុខុម